Pahadar 100 thun harei Bao chi Cach mang Viet Nam, page ini di TP.HCM parang iek yaok rituh blah thaot binguk ka bruk dak padang saong patagok di gah Bao chi CMVN. Ong Nguyễn Mạnh Cường, Akok Mban Tuyen giao saong Dan van Thanh uy TP.HCM khan lac, bao chi hu jeng tatua pambuak Ndang, Karja haong bhap bini; Mbao chi jeng hu rik daong  ngak brei manuac sia pacheih tui, ngak brei rahra bhap bini jia hatai tame jalan tacei ba di Đảng saong jalan patagok  di CNXH di taneh ia. Abih di nyu nan lac, dalam vaktu yam tame dunya pambak praong, mbao chi yau tatua pambuak bruk jum pataom, rik tame paglong labik dang di Viet Nam haong dunya.  

Tinh Dong Thap birau peih bruk jao brei yai Bao chi di tinh mbang ka VIII. Ong  Bùi Thanh Hồng, Akok Kapol urang vak Bao tỉnh Đồng Tháp khan lac, dom kadha hu ba tame pakacah mbao chi pambuak siam bruk pathau khan, palih ruah biak rilo kadha siam gheih, khan ka dom bruk daok rah tabiak, samar, njauk  lagaih haong raidiuk di tinh saong bhum taneh. Tapa dom kadha payua mai pakacah  brei mboh mbao chi ngak siam bruk pathau khan, rik tame yaih khan thaot binguk tinh Dong Thap.

Piah daong tame ngak brei cakrok kinh te meng 8% tagok, meng akaok thun tal ini, dom gah, dom pakat di tinh Ben Tre kham merat ngak drah samar bru pakacah ngak mbang pala drak saong mek hu rilo jak jeng siam mekre. Dalam nan, gah yulit patui bruk cakrok glong. Piah ngak bruk ba tabiak, tinh Ben Tre  pakhang bruk pachreih dom gah, bhap bini  buh jien tame ngak jalan mbak ndap nda ky thuat gah yulit rivang ma-in; pachreih dom po buh jien tame ngak mbang suai lavik, hu angan je, naih joi bruk rivang ma-in yulit…

4/ Meng harei 16 bilan 6, taong abih 36 xa, phuong birau di tinh Binh Duong hu ngak bruk iek dahlau  dom Pasak Duh ka bruk Hanh chinh karja. Dalam 3 harei bruk ngak iek, meng harei 16 bilan 6 tal harei 18 bilan 6, 36 xa, phuong taduan hu labaih 19.000 ho so. Yaom lac mboh hu rilo bruk jak jeng, min bruk ngak iek dahlau mboh hu rilo kan kandah camereip ngak bruk, dalam nan hu rilo jabat oh hu kuhria caga tani tanat labik taduan mek harak gal saong labik ka bhap bini daok cang.

5/ Di huyen Chau Thanh, tinh Hau Giang birau rah tabiak 3 mbang glut jaleih ar kraong kuhria atah labaih 90m, ngak khat lahik jaik 400 trieu dong. Kayua ia nduac khang. Kuhria meng akok thun tal ini, tinh Hau Giang rah tabiak 30 labik glut jaleih atah 817 met, kuhria khat lahik jaik 3,7 ti dong. Dalam nan glut jaleih taneh rah tabiak rilo di huyen Chau Thanh ngan haong 24 labik.

Indonesia daok kuhria caga panduan ba bhap bini di Iran meng jalan tabak dalam tuk Iran saong Israel mesruh metak daok catang dalam dom harei tapa. Urak ini, hu labaih 380 bhap bini Indonesia di Iran, abih di nyu nan lac ban ine Tehran. Rajaei Indonesia taong yaom bruk nan dak harei dak cuang kandah rilo mbang patuh phao taong kalin, oh lac pamong tame bol lin bo daok taong tame bhap bini rahra.

Rajaei Brazil pasang iek hu jak jeng jit kum manuk ada anek ruak catang (IAAP) di taphon manuk ada pablei, hadei 28 harei oh hu urang birau njom ruak saong ngak tantu dom jalan pacang jt ruak. Dahlau di nan, sa var raong manuk ada di ban Montenegro duah mboh sa sruh jit ruak. Hadei di nan, Brazil hu peih ngak rilo jalan pacang caga chip saong padeih bruk raong glang manuk ada di labik hu jit ruak. Brazil urak ini lac taneh ia pablei tabiak negar langiu ralo abih.

Labaih 700 urang daok lahik hadei ia ribuk sua praong rah tabiak di puac bilan 5 di bang Niger, bhum kreh negar Nigeria, ngak takik abih di nyu 207 urang metai saong yaok ribau urang lahik sang danaok. Gah daong duah urang gam jabat chuc nang daok ngak bruk di dom labik gaok kan ndah, yaom lac hu labiah 3 adit tapa kuhria meng tuk rah tabiak bala. Yaok thun, bala meng langik tasik ngak yaok rituh urang metai saong ngak khat lahik biak ralo drap ar di taneh ia Tay Phi ini./.