Jơnau yal tàm Pơrjum, tơngai do, broă lơh, adăt boh lam bè ù tiah rơhời mŭt tàm rài kis, tơnguh uă bơta pràn atbồ dà lơgar, pơgồp bal bơtàu tơnguh lơh sa mpồl bơtiàn, gàr niam dà lơgar, lơngăp lơngai mờ bơtàu tơnguh kơl jăt dà lơgar; tơnguh nùs nhơm pin dờn làng bol, mpồl lơh sa kă bro bal mờ cau bơcri priă. Mơya, mùl màl gam gŏ ală bơta kal ke, gơkòl bè rơndăp ù tiah ờ hềt ndrờm bal…

Tàm pơrjum, Thủ tướng ồng Phạm Minh Chính đơs loh: kơnòl broă kwơ màng ngan mờ jal mhar nàng bơsong ală gơkòl mờ lơh niam wơl, bơtơl Jơnau lơh nền tàm pơrjum sồ 18 mờ lơh tơngu me tam gơl, bơtơl Adăt Ù tiah nam 2024. Thủ tướng sồr lơh wơl, bơtơl ờ uă kơnòl, gùng dà broă lơh bè broă pơn jăt tai lơh gơs gùng dà broă lơh, broă atbồ, ngui ù, tàm hơ̆ bơtơl ală gùng dà broă lơh bè rơndăp ù tiah, broă rơndăp ngui ù. Ai lài broă ai geh bă ù nàng bơtàu tơnguh mpồl phan bơna ndrờm bal, lơh sa mờ măi mok, broă lơh drơng ala, bơtàu tơnguh tiah drà; geh sùm di pal bă ù lơh kòi nàng gàr tơl phan sa ai dà lơgar in.