Nkual neh Điện Biên nar aơ mô dơn n’gloh lam nuih n’hâm nsan dăng kăl e ma hôm dôl rgâl dăng ma nău rlay kah n’hanh ntik n’hao ăp rnoh khlay văn hóa way ơm tâm hun hao pâl nđaih. Ntơm bah ăp lễ hội geh âk săk tơm tât ƀon pâl nđaih nsum mpôl, lĕ rngôch dôl rgop buăt nthoi dăng janh kăl e tât đah ngăch ngăr aƀaơ. Mô dơn ƀư geh âk tay ntŭk rlong uănh saơ an năch ma hôm joi geh trong rêh jŏ jong, tâm njăr trong hun hao bah Điện Biên nar aơ.

Ta xã Thanh Yên, lễ khăm bản – tâm rsach dak bah ƀon lan Lào mhe ƀư mô dơn lah nău kan tĭng nău way huêng khlay bôk năm, ma dôl mbrơi dơi ƀư tĭng trong ăp tŏng rêng lơn, nkre đah nkơnh n’hơ pâl nđaih. Lễ hội mpơl tay ăp tŏng ăp nău way ơm kơt dăn nău lap, kât rse brai ti, ôp brah dak me… ăp ndơ nsĭt tĭng nău rêh ôp brah lah yang bah ƀon lan. Yuh Nguyễn Thị Nguyệt, nuĭh ƀon lan phường Điện Biên Phủ, n’gor Điện Biên nkoch: 

Lor bôk năp gĭt n’hanh tât râng pâl tâm rsach dak ta Thanh Yên, bol trong hăn jêr jŏt du đêt n’hanh ngai yơn tât râng gâp saơ dŭt di nuih n’hâm yor ta aơ dŭt rhơn mƀak n’hanh he saơ lah lễ hội dja dơi ƀư mbro ri kônh wa mbra ơm geh ntŭk pâl gay mât ndray săk tơm rnoi nuĭh bah Lào.

Wa Trần Thế Hoàn, Groi Kruanh UBND xã Thanh Yên, n’gor Điện Biên an gĭt, ntơm bah wơl geh bah nuĭh ƀon lan tâm ntik n’hao rnoh khlay văn hoá n’hanh nău ŭch rlong geh bah năch, n’gâng kan xã Thanh Yên dôl rƀŏng trong ndơ̆ lễ hội jêng ntŭk pâl nđaih văn hóa huêng khlay ntĭt êng, đah trong ƀư mât ndray drăp ndơ ơm yău ntlơi an tay mpơl săk ta ntŭk.

UBND xã dôl geh trong nchrăp mât ndray n’hanh ntik n’hao ăp rnoh khlay uĕh êng bah lễ hội dja gay jêng rup uĕh văn hóa săk ntơr êng n’hanh drăp ndơ ơm yău ntlơi an tay mpơl săk bah xã. Aơ dơi ntrŏng lah nău dơn kan rgum tơm tâm trong nchrăp mât ndray ăp drăp ndơ ơm yău văn hóa mô mpơl săk ta ntŭk tâm let năp tay.

Phường Mường Lay lah ntŭk wăch rgum ntŭk văn hóa bah nuĭh Thái N’glang bah me dak me Đà giang, trong ntĭt leo pâl nđaih nsum mpôl dôl an saơ nsĭt nău dơi kloh. Ăp jay rot way ơm mô dơn lah ntŭk gŭ rêh, ma hôm jêng ntŭk manh bĭch măng; ăp măng sông rnăk wâl jêng rlong kah ndơ sa; ăp điệu xòe, nău way ơm jêng ndơ geh ƀư văn hóa rhŏ dŏng năch. Yuh Lò Huyền Giang, nuĭh ƀon Chi Luông 1, phường Mường Lay, n’gor Điện Biên an gĭt, nău râng na nê̆ bah nuĭh ƀon lan tâm nău kan pâl nđaih hŏ njêng luh tơm wăng sa đăp mpăn.

Rnôk râng ƀư pâl nđaih nsum mpôl, gâp ndrel rnăk wâl hŏ geh âk tơm ndơ wăng sa đăp mpăn bah ăp rhŏ dŏng kơt: wơt năch, n’gon sa n’hanh nkoch mbơh ăp ndơ geh ƀư ta ntŭk nơm. Bah meng nê, săk gâp nơm hôm kơt nti tay dŭt âk nău blău đŏng kơt mbơh ngơi, ƀư ndơ rhŏ dŏng n’hanh wơt năch. Ntơm bah nê kơl gâp saơ dơi nău n’hao êng săk rnôk rgop tâm nău mât ndray, nkơnh n’hơ văn hóa bah rnoi nuĭh he tât đah băl mpôl tâm n’hanh bah dih dak.

Nô Lường Văn Muôn, Kruanh ƀon pâl nđaih nsum mpôl Phiêng Lơi, phường Điện Biên Phủ, n’gor Điện Biên an gĭt: ăp ndơ sa way ơm bah nuĭh Thái, lơn lah ăp ndơ gŭch dôl dơi kônh wa tâm ƀon ntik n’hao jêng ndơ geh ƀư lăp uĕh măt uănh ntơm bah nkret njêng tât dăp pla, rgop n’hao săk blău rhŏ dŏng, ntoch jong mông nar rlong saơ n’hanh manh gŭ nde bah năch pâl nđaih.

Đah ăp ndơ sa bah ƀon ri aƀaơ mpôl hên hŏ n’hanh dôl ƀư dŭt uĕh mpeh ăp ndơ sa bah nuĭh Thái. Lơn lah mpôl hên way ƀư mpeh ndơ gŭch gay rhŏ dŏng năch. Lơn âk năch rnôk hăn tât ƀon ri ŭch da dê.

 Ngoăy tâm ăp nău rgâl dŭt njrăng uănh khlay tâm trong ƀư pâl nđaih aƀaơ bah n’gor Điện Biên lah nău rgâl ăp nău kan, nar văn hóa bah nklang nkual jŭr tât ăp ƀon lan. Yor aơ lah ntŭk mât ndray ăp tŏng n’hanh dŭt ngăn ngăn rnoh khlay văn hóa, nkre nta trong dơh gay nuĭh ƀon lan râng na nê̆ tâm rêng rnoh khlay pâl nđaih. Tĭng wa Trần Hải Hà, Nuĭh dơi manh ƀư Giám đốc Sở Văn hóa, Thể thao n’hanh pâl nđaih n’gor Điện Biên, trong tât dja mô dơn kơl n’hao nău dơi âk rlong gĭt saơ an năch, ma hôm njêng luh krêp dêh đah mât ndray n’hanh hun hao rnôk nuĭh ƀon lan nơm jêng tơm nuĭh nkre mât ndray, nkre dŏng ăp rnoh khlay văn hóa.

 Tâm nău leo ƀư ăp nar kan mpeh văn hóa, mpôl hên mbra ƀư âk lơn ta ăp ƀon pâl nđaih nsum mpôl, ƀon văn hóa gay nta trong dơh, nta trong an ăp ƀon pâl nđaih nsum mpôl, ƀon văn hóa, ăp nuĭh tơm homeStay geh rnôk tât đah ntŭk rhŏ dŏng, nkơnh n’hơ pâl nđaih n’hanh hun hao pâl nđaih ta ƀon, ta thôn bah he. Rnôk năch hăn tât ta aơ, khân păng mbra geh ndơ ma rlong saơ mpeh văn hóa, rlong kah mpeh ndơ ngêt sa, n’hao nău dơi rlong gĭt âk ntil n’hanh n’hao nău dơi di nuih n’hâm bah năch.

Ăp nău rgâl kloh bah pâl nđaih Điện Biên dơi mpơl ntơm bah ăp khay bôk năm 2026, n’gor wơt geh nklăp 550.000 tơ̆ năch, hao bơi 30% rđĭl đah ndrel khay dja năm e nơh. 72 năm lôch lơh dơi Điện Biên Phủ, nuih n’hâm nsan hao dăng kăl e nha hôm ring lam tay đŏng, jêng ntŭk nsing nuih n’hâm gay Điện Biên nar aơ đăt ndal. Rnôk ăp rnoh khlay văn hóa way ơm dơi rlay kah, mât ndray n’hanh rgâl jêng ndơ geh ƀư pâl nđaih ntĭt êng, me neh tă lah ntŭk tâm lơh tâm su dŭt krit nji kăl e dôl mbrơi mpơl ntoh tay nău khlay lah ntŭk rgum tât geh âk săk tơm.