Yên Bái bax jông cxuô luôs hâux lưv trâu tưr thik cơưv tiêr ntơưr lớp 12 shông 2025

              Cưk kriê Nguyễn Thị Thanh Huyền-Phưv thơưx seiz car tsêr cơưv cxênhx 3 Hoàng Quốc Việt, TP Yên Bái heik, jiês tưr thik ntơưr shông no, tsêr cơưv muôx 270 lênhx shux xênhz cxaz chuôz dưv thik, hâur co muôx iz lênhx shux xênhz tsi tsuv tưr thik. Đhâu 3 jiês thik siv, shux xênhz chor điểm tưz siêz mê njik . Taz sik, jax xav fax thiêz luk Anh cux tsênhv tsi yuô tâu trơưk tsưr ziv xar. Chênhr viv li, tsêr cơưv lok six moz siêz kriê nzir têx txux chi trâu chor shux xênhz zôngx ziv zuôr tưr thik tsi yuô tâu ntơưr chiê paz têx shux xênhz tưr thik tâu ntơưr jông. “Đhâu thik siv jiês tiv 2, tsêr cơưv tưz muôz tas nro chor shux xênhz zôngx ziv tưr thik tsi yuô tâu ntơưr co lok uô iz paz. Chor cưk kriê ntơưr zuôr muôx tsưr ziv kriê cxaz trâu têx shux xênhz co. Iz chas buôk ti kriê txux chi pêv lớp cơưv, têx lênhx cưk kriê tsênhv choz jax cơưv trâu shux xênhz lok uô thiêz cơưv cxaz hâur tsêr hur si. Iz chas ntơư, chor cưk kriê ntơưr tsênhv kriê nzir đhâu sâuv mạng xã hội, têx zar hnuz kêix trâu shux xênhz thiêz. Hâur têx hnuz tsênhv yuôr zos kriê shux xênhz uô siv têx jax thik, tsêr cơưv zuôr pheiz shux xênhz uô têx paz hâur lớp chiê chor nhuôs muôx têx siz paz tâu thiêz chiê cưk kriê zôngx ziv sox seiz, kriê cxaz nzir têx txux chi zuôr trâus txos trâu shux xênhz”.

             Cưk kriê Phạm Viết Thắng-Phưv thơưx seiz car tsêr cơưv cxênhx 3 Lê Quý Đôn, huyện Trấn Yên heik pâuz: Jiês thik shông no tsêr cơưv muôx 370 lênhx shux xênhz cxaz chuôz dưv thik. Co cux zos shông xuz thơưx tưr thik trơưk tsaz yênhx zoz zux phổ thông yiêz, chênhr viv li tsêr cơưv tưz piêr kriê nzor txos trâu shux xênhz lok têx hlôngr yiêz, iz cxiê têx tsi thôngx li cxiê shông. Tsênhv tsênhz, jax ngữ văn cux tưr thik iz zav li cxiê shông, taz sik tsi tưr thik têx jax muôx nhoz hâur ntơưr cơưv chiê txo grêk tsơưs siz zâuv cơưv uô cê, cơưv trơưk têx jax luôs lưv tus tưz sâu uô tsês, iz chas ntơư phuôx huiz shux xênhz txux chi tsưr ziv xar tơưv. Têx jax tsênhv yuôr zos thik trắc nghiệm, taz sik cux tsi thôngx li cxiê jiês: Iz chas câu hỏi trắc nghiệm, tsênhv muôx têx kror txơưr đuô li: Zos thiêz tsi zos.... “Tsêr cơưv tưz yax kriê txos shux xênhz têx kror yiêz hâur cui tinhv tưr thik cơưv tiêr ntơưr shông no, tsưr tsix phênhz, kriê shux xênhz xeir têx jax thik huv đros zuk pênhr xưv. Iz chas ntơư piêr kriê, heik trâu shux xênhz lok têx tsưr ziv uô jax thik. Tsêr cơưv cux tsưr tsix têx jiês sik thav đros shux xênhz chiê paz chor nhuôs shux xênhz truôx siêz đuô thâuv tưr thik ntơưr”.

           Shông 2025, tỉnh Yên Bái tsưr tsix iz Hôiv đôngx thik, muôx 32 qơư tưr thik ntơưr-tsar ndê 4 qơư pir li shông 2024. Tas nro tỉnh muôx 400 ntâu qar thik, 9.400 ntâu lênhx shux xênhz đas cir dưv thik, hâur co 9.100 ntâu lênhx zos shux xênhz cơưv lơưr tsaz yênhx zoz zux phổ thôngz shông 2018. Njuôk xav muôx zuôr xar 2 cxênhz lênhx canr bôv, cưk kriê, nhân viên zuôr tâu hu tuôx uô hâux lưv phưx vưv jiês thik.

          Pos Tô Thị Ánh-Phưv Giám đốc Sở Zoz zux tỉnh Yên Bái heik pâuz, đros trâu luôs hâux lưv kriê cxaz têx txux chi yuôr trâus trâu shux xênhz, Sở zoz zux tưz hux jos đros lưv lươngv Công an cơưv shâuv têx cui tinhv thik trâu canr bôv, cưk kriê ntơưr thiêz chor nênhs uô hâux lưv phưx vưv tưr thik ntơưr; iz chas ntơư hux jos đros cxuô thax tsav qơư bax jông cxuô luôs hâux lưv trâu têx qơư thik, qar tưr thik ntơưr. “Sở Zoz zux tưz chox kriê cxuô qơư zoz zux kriê cxaz nzir têx txux chi yuôr trâus trâu shux xênhz, hâur co moz siêz txos chor shux xênhz cơưv tsi yuô tâu ntơưr. Iz chas Sở tso tơưv jax tưr thik siv, cxuô luz tsêr cơưv cux tsi so qênhz yuôx, tsưr tsix thik siv 2, 3 jiês thiêz chiê chor shux xênhz uô tâu têx jax thik jông đuô. Muôx têx heik, txos nhiv no, têx shux xênhz tưz bax txâuk txux chi, truôx siêz chiê tưr thik ntơưr”.

            Cux lơưr pos Tô Thị Ánh-Phưv Giám đốc Sở Zoz zux tỉnh Yên Bái, ngênhx zuôr tror hux jos đros cxuô ngênhx, ntơưv qơư uô luôs hâux lưv yax kriê, hu zâuv cxuô lênhx nênhs đros cxaz chuôz tsưr tsix tưr thik ntov jông, truôx tuk; uô jông hâux lưv kriê cxaz têx txux chi trâu shux xênhz lớp 12; qênhz shuôs, paz max shux xênhz muôx luz nênhx txov nhêv, tsi chiê lênhx shux xênhz tưs tso ntơưr tsês, tsi tưr thik viv txov nhêv. Iz chas ntơư, cxiv tsa tsưr ziv taz por truôx tuk zoz thôngz, vêv xênhz zav nox thiêz phax tir thêir têx tsi jông tiv ntux uô  ruôr hiêv hâur cheix muôx nas chuô./.

Thừa Xuân-Riê Lâux cxeik, nhênhv