Mek radaih piah pajeng mbang jien, min ong Nguyễn Quang Huấn, quan Đống Đa taok papaok hala juk gam di ralaoh radaih piah padauk taka ralaoh pacang camera dauk di taong bhat: “Raidiuk biak kan kandah, rilo tuk brei pacang piah plaih nyaik hu taong bhat tapa camera. Hadei tuk njauk taong bhat dahlak hulin hu papaok mbang pagam tabiak saong ngak ka siam…”

Pandar mbang pagam juk, kaya pabang mbaok piah pacang sa banah ralaoh radaih, gaok mai pacang abih ralaoh radaih meng mbang tauk pagam – lac sa dalam dom bruk kuhria sanak jak di dom po radaih piah plaih bruk pasang iek di kapul chuc nang. Tui Luat su Đặng Văn Cường, Akaok jabat luat su Chinh Phap, Kapul Luat su ban ine Ha Noi, ngan haong dom bruk karei di gauk po radaih hu ngak karei, salih dom lek taka di radaih di drei: “Rilo urang oh iek praong hukum jalan, bhian ngak chung suan hukum di jalan mbak nan pacang khau tin di drei, pacang ralaoh radaih di drei piah plaih jabat chuc nang chap mek taong bhat.”

Dom janih ngak chung hukum di jalan mbak mai meng dom bruk karei di gauk. Min kayua dom bruk ngak chung yau ini ba tal bruk “urang ini ngak, urang karei ciuk”. Kayua yau nan, oh takik bruk yau sa-ai Nguyễn Văn Thành, quan Thanh Xuân hu lahik prein nao tal labik suan hukum saong lahik biak rilo prein piah brei thau lac drei oh ngak suan. Abih di nyu hu ieu lac, tuk mboh radaih di drei njauk pak ba taong yaom kayua taong bhat tapa camera: “Biak mboh kan ciuk ngan haong dom bruk ngak chung hukum yau nan saong ngak kan kandah biak praong tal tukvak saong prein yava. Bruk oh njauk drei ngak bo drei gilac nao langyah tantu cambaih laih piah ka urang thau, rilo meng lac di dom tinh atah…”

Bruk pacang, tauk ralaoh radaih ieu lac dom bruk ngak chung hukum praong ngak kanjah jhak tal bruk siam mekre jalan mbak jeng yau ngak srau kadau dalam rahra. Njauk caik hatai sangka, dalam bruk pablei salih pajeng ba ini jeng rah tabiak oh takik. Trung ta Trần Văn Hưng - Jabat polih jalan mbak Kong an ban ine Ha Noi brei thau, ngan haong dom bruk ini, kapul chuc nang canh sat jalan mbak brei hu taong bhat catang. “Urang peih radaih blaoh pacang ralaoh radaih atau ralaoh radaih maong oh mboh cambaic laic tantu ye brei kakei brei ka nyu thau dahlau. Daok ngan haong dom bruk pandar janih karei piah pacang, ngak lahai ralaoh radaih piah plaih bruk taong bhat tapa camera ye brei ngak catang…” Trung ta Trần Văn Hưng khan yau nan. 

Tui dom urang ilamo ngak gah hukum, langiu bruk ngak ja ralaoh radaih, plaih nyaik bruk taong bhat tapa camera, rilo urang daok pandar bruk ini piah padauk khau tin di radaih tuk ngak dom bruk suan hukum yau bleik  klaik, sahuah, meblah jien jalan mbak atau plaih bruk pasang iek di jabat chuc nang… Ini lac bruk ngak hu kuhria caga dahlau. Bruk ini njauk brei taong bhat, gaok mai daok  maong yau lac bruk ngak duan trak dalam dom bruk ngak chung.

Dom jabat pachreih rahra brei thau dom bruk ngak chung tapa thaik thaot haong dom jabat chuc nang lac sa dalam dom jalan langyah lagaih abih piah ngak patakik bruk ini./.