Tàm sàh Thanh Yên, lơh yàng khăm ƀòn, do là lơh yàng sàc dà bơh làng bol kòn cau Lào dê pa geh bơyai lơh ờ mìng là broă lơh pin dờn bồ nam, mờ gam rơhời geh bơyai lơh jăt gùng dà broă lơh di pal rơlao, pơgồp bal mờ broă yal lòt nhơl. Lơh chờ lơh geh wơl tơl ală broă lơh yàng ờs mờng bè răc dan kờñ geh bơta bơtoah, kơ̆t che brài tềng ngko tê, lơh yàng duh khoai yàng dà dờng… ală bơta tờm geh uă bơta niam tàm rài kis pin dờn bơh mpồl bơtiàn dê. Lŏ Nguyễn Thị Nguyệt, cau kis tàm sơnah ƀòn Điện Biên Phủ, càr Điện Biên pà git: “Dơ̆ sơnrờp git mờ tus bal lơh chờ sàc dà tàm Thanh Yên, bŭ lah gùng lòt kung gơtìp ờ uă kal ke mờ ngài, mơya tus bal añ gơlơh chờ hờp ngan tài nùs nhơm tàm do chờ hờp ngan mờ añ gŏ gơlơh di lah lơh chờ do geh bơyai lơh sùm den làng bol rơ̆p geh ƀlàng nhơl nàng prăp gàr bơta niam chài jơi bơtiàn cau Lào dê”.

Ồng Trần Thế Hoàn, Phó Củ tịc Anih duh broă Làng bol sàh Thanh Yên, càr Điện Biên pà git, bơh jơnau kơ̆p gơn sùm làng bol dê tàm broă ngui ală bơta niam chài mờ jơnau kờñ bơh cau năc lòt nhơl dê, gơnoar atbồ sàh Thanh Yên gam ai geh gùng dà broă lơh nàng ai broă lơh yàng do gơs phan lòt nhơl niam chài pin dờn krơi is, pơgồp bal tàm broă prăp gàr phan lời wơl ờ di phan bơna tàm sàh dê. “Anih duh broă làng bol sàh gam geh broă rơndăp lơh nàng prăp gàr mờ ngui ală bơta kwơ krơi is bơh broă lơh chờ do dê nàng gơs bơta niam chài krơi is mờ phan lời wơl ờ di phan bơna sàh dê. Do geh sền là kơnòl tờm tàm broă rơndăp lơh prăp gàr ală phan lời wơl niam chài ờ di phan bơna tàm sàh dê tàm tơngai tus”.

Sơnah ƀòn Mường Lay là anih tơrgùm bơta niam chài bơh kòn cau Thái Kò dê tềng gah dà dờng Đà, broă lơh lòt nhơl mpồl bơtiàn gam pà gŏ geh cồng nha loh làng ngan. Ală hìu hờ đang ờs mờng ờ mìng là anih ơm kis, mờ gam gơs hìu ơm; ală dơ̆ sào sa hìu nhă neh gơs phan sa nàng cau năc in; ală săp tamya xòe, bơhiàn ờs mờng neh gơs phan niam chài drơng cau năc lòt nhơl in. Lŏ Lò Huyền Giang, làng bol kis tàm ƀòn Chi Luông 1, sơnah ƀòn Mường Lay, càr Điện Biên pà git, broă tus bal tơn bơh làng bol tàm broă lơh lòt nhơl neh lơh geh priă kơl jăp. “Tŭ tus bal lơh broă lòt nhơl mpồl bơtiàn, añ bal mờ hìu nhă neh geh uă priă kơl jăp bơh ală broă lơh drơng ala bè: wă năc, trŭ sa mờ yal ală phan bơh sơnah ƀòn dê. Bơdìh hơ̆ tai, să tờm añ gam bơsram tai uă ngan bè broă boh bơr, lơh broă drơng ala mờ wă cau năc. Bơh tŭ hơ̆ dong kờl añ gŏ geh nùs nhơm pơnyờ să tŭ neh pơgồp bal tàm broă prăp gàr, yal bơta niam chài bơh jơi bơtiàn dê tus mờ ală bơyô tàm lơgar mờ lơgar bơdìh”.

Bi Lường Văn Muôn, Kwang atbồ ƀòn lòt nhơl mpồl bơtiàn Phiêng Lơi, sơnah ƀòn Điện Biên Phủ pà git: ală phan sa ờs mờng kòn cau Thái dê, tàm hơ̆ uă ngan là ală phan sa buh gam geh làng bol tàm ƀòn ngui gơs phan sa bơkah bơh broă lơh tus mờ broă ràng tơlik yờ sa, pơgồp bal tàm broă tơnguh uă bơta niam broă lơh drơng ala, tơn jŏ tơngai lơh mờ ơm bơh cau năc lòt nhơl in. “Gơwèt mờ ală phan sa bơh ƀòn dê den tŭ do bol añ neh mờ gam lơh niam bè ală phan sa kòn cau Thái dê. Tàm hơ̆ uă ngan là bol añ kờñ bè phan sa buh nàng drơng cau năc in. Geh uă cau năc tŭ tus tàm ƀòn den ndrờm kờñ sa lơm”.

Dùl tàm ală tam gơl pal kah ngan tàm broă lơh lòt nhơl tŭ do bơh càr Điện Biên dê là broă tam gơl ală broă lơh, broă niam chài bơh tàm tiah tàm dơlam rê tus tàm ală ƀòn. Tài do là anih gam prăp tơl mờ mùl màl ngan ală bơta kwơ niam chài, mờ ai tơl bơta niam nàng làng bol tus bal tàm mpồl ală bơta kwơ lòt nhơl. Jăt ồng Trần Hải Hà, atbồ ing Kwang lam bồ Sờh Niam chài, Tàp pràn să jan mờ Lòt nhơl càr Điện Biên pà git, broă lơh do ờ mìng dong kờl tơnguh broă lơh ai cau năc in, mờ gam ai geh broă pơgồp bal đah prăp gàr mờ bơtàu tơnguh tŭ làng bol gơs cau tờm tàm broă prăp gàr, mờ lơh ală bơta kwơ niam chài.

Ồng Trần Hải Hà pà git: “Tàm broă bơyai ală broă lơh bè niam chài, bol añ rơ̆p bơyai lơh uă rơlao tàm ală ƀòn lòt nhơl mpồl bơtiàn, ƀòn niam chài nàng ai geh bơta niam, ai geh dơ̆ niam ală ƀòn lòt nhơl mpồl bơtiàn, ƀòn niam chài, ală cau tờm HomeStay in geh dơ̆ niam tìp mờ drà kă bro, yal broă lòt nhơl mờ bơtàu tơnguh lòt nhơl tàm ƀòn, tàm thôn bơh să tờm dê. Tŭ cau năc tus tàm do, cau năc geh tơl bơta niam nàng lơh bè niam chài, lơh bè phan sa, tơnguh broă lơh mờ tơnguh nùs nhơm di pal bơh cau năc dê”.

Ală broă tam gơl loh làng bơh lòt nhơl càr Điện Biên dê geh ai tơngŏ tơn bơh tàm ală nhai bồ nam 2026, càr wă geh di pơgăp 550 rơbô dơ̆ cau năc, gơguh mờr 30% pơn drờm mờ tŭ do nam lài. 72 nam tơnơ̆ mờ Tam lơh Pha lin Điện Biên Phủ, nùs nhơm pràn kơl dang rài lài do kung gam sùm lơh geh uă, gơs anih kơl dìng nùs nhơm nàng càr Điện Biên tŭ do lơh pràn gơguh lơh sa. Tŭ ală bơta kwơ niam chài ờs mờng geh pơrlai guh, prăp gàr mờ tam gơl gơs phan lòt nhơl krơi is, bă ù neh geh tŭ là tiah tam lơh cui rơcai lài do gam rơhời ai tơngŏ bơngă là tiah tus geh uă bơta niam chài krơi is.