Jos Har Tâux zos pêz hêir nênhs Hmôngz qơư ndis uô si nhoz Sơn La

            Nhoz đêz tsênhv qơư thị xã Mộc Châu 20 cêik cêr, Har Tâux zos pêz hêir nênhs Hmôngz jos Tà Số, xã Chiềng Hắc, thị xã Mộc Châu, tỉnh Sơn La thax tsav qơư tsêz chos kôngz lôngk, taz sik nhiv no tưz yênhx qơư nto bê jông jav, cxơuz cxiz tâu chôngz lênhx kruô tuôx sêiz shuôk. Zơưv Nguyễn Văn Viết, iz lênhx kruô nhoz Nam Định tuôx ndis shuôk têz qơưs shir phaz lul hêik pâuz: “Cur tưz muk ndis uô si, sêiz shuôk têz qơưs trâu ntâu thax tsav qơư; taz sik tuôx sêiz shuôk thax tsav qơư no jông jav, lax chuô nziês huv đros tsôngv kruô siêz nhiêv thiêz qơư co tênhv tênhz cux tsik tâu muôx. Zos huôv tsar-cxiv uô pêz hêir nênhs Hmôngz cxuô qơư ndis uô si, zuôr cxơưz cxiz tâu chôngz lênhx kruô tuôx sêiz shuôk”

             Har Tâux zos pêz hêir nênhs Hmôngz 20 chuôz zis qơư tsêz chos kôngz lôngk. Hâur ntu đrav ntêx, thâuv tsik tâu huôv tsar uô qơư ndis uô si, tsôngv px nhoz no tsuôk khưr uô liêx têz tsêz chos lôngk, luz nênhx njiz ntâu cêr txov nhêv. Iz thênhv jux juk hlôngr yiêz tsưr ziv, siêz xar chiê cxiv uô cxuô qơư jông jav txuôk đros huôv tsar truôx têx txux chi, vênhx huôv jông cxôngx nzor, cxơưz cxiz tsôngv kruô tuôx sêiz shuôk, hli 8/2023, xã Chiềng Hắc tưz cxiv tsa hợp tác xã ndis uô si Har Tâux, muôx 20 chuôz zis đros uô. Cxuô lênhx đros uô co, zos tok kruô muk lok ndis uô si hâur thax tsav txuôk đros chor chuôz zis muôx tsêr tsês trâu tsôngv kruô tuôx nox nhoz, so muk lok hâur jos Tà Số. Zơưv Châu x Muôk, sêiz car HTX ndis uô si Har Tâux, xã Chiềng Hắc, thị xã Mộc Châu, tỉnh Sơn La hêik pâuz nzir: “Uô ntêx thâuv zuôr cxiv uô cxuô qơư ndis uô si, px ntơưv no tsuôk zos khưr uô têz tsêz chos poz cưk, chos txir khơưz; taz sik tov kaz no thiêx kriz cxiv uô cxuô qơư ndis uô si, cxơưz cxiz tsôngv kruô tuôx sêiz shuôk têz qơưs. Thiêz tsôngv kruô cux hêik, nhoz no zos muôx tênhv tênhz, muôx cêr yêz muk lok tâu đhâu, thiêx zuôr cxơưz cxiz tâu chôngz lênhx kruô tuôx ndis uô si, sêiz shuôk têz qơưs, tsôngv px thiêx muôx phênhv sâu tâu nhiêx txiêx chox lok cxiv kho chuôz zis, muôx luz nênhx tsâu sor jux juk”

           Trơưk li pos Nguyễn Thị Hoa, Phưv Chủ tịch UB thị xã Mộc Châu, tỉnh Sơn La, txix hâu nov huyện, tỉnh tso tơưv luôs hâux lưv cxiv tsa jos ndis uô si côngv thôngx Tà Số, thax tsav Har Tâux tưz tâu chôngz lênhx pâuz txos thiêz ziv hnuz ziv muôx chôngz lênhx kruô nhoz cxuô thax tsav qơư tuôx ndis uô si, sêiz shuôk têz qơưs thiêz pâuz txos tsôngv px Hmôngz no no têx txux chi, vênhx huôv jông cxôngx nzor. Xav txos trâu nhiv no, hâur iz luz hli, Har Tâux muôx txos 3 cxênhz lênhx kruô tuôx ndis shuôk, muôx phênhv sâu nhiêx txiêx tax tâu 100 triệu đêiv. “Tà Số zos iz hâur chor jos tâu cxuô lênhx nênhs nhênhz chơưv thiêz hâu nov tỉnh moz siêz paz max cxiv uô cxuô qơư ndis uô si côngv thôngx. Tsôngv px Hmôngz nhoz jos no, tsênhv tuôr tâu tsês têx txux chi, vênhx huôv jông cxôngx nzor. Chênhr zos li hêik ntơư, pêz tưz cxơưz cxiz cxuô tsưr tsix, têx lênhx nênhs siêz jông muôz pênhr nhiêx tuôx cxiv uô cxuô qơư ndis uô si, qơư tsês chiê pêz hêir nênhs Hmôngz têx txux chi, vênhx huôv jông cxôngx nzor, cxơưz cxiz tsôngv kruô tuôx ndis uô si txos thax tsav qơưk”

            Tâu hâu nov ntơưv qơư paz max, tsôngv px nhoz no sik côngv đas jos tsưr ziv huôv tsar uô, txơưv li chas Har Tâux cux yênhx qơư ndis uô si côngv thôngx jông jav hâur thax tsav thị xã Mộc Châu, paz phênhv trâu tsôngv px txo grêik yêiz pluôs, jux juk muôx luz nênhx bluô nux, tsâu sor./.

                                Trấn Long-Tsu Vưx cxeik, nhênhv