Ngak tui hatai Wa brei ka gah dhar phol, mboh bruk pambak tame hatai bhap bini tui Zalo, Facebook, Tik tok,... Meng thun 2018, Kapul Pambuak Dam dara huyen Thạnh Trị, tinh Soc Trang klak, ini tame ban Can Tho padang bruk “Ngak dhar phol tapa mang xa hoi”, dalam nan jao ka Kalup kapul ngak dhar phol Pambuak hatai tame bruk.

Sa-ai Khưu Nhật Khánh, xa Phú Lộ brei thau, tapa bruk bhian rah tabiak di dom jabat, urang jak ba gauk daong jien mbaok ka 62 janih urang kan daman, dom urang ruak hakik, pandik harao di dalam huyen taong yaom abih di nyu labaih 700 trieu dong. Dalau di jit Covid -19, Kapul dakvah jak ba pataom hu labaih 200 trieu dong piah padang ging mbang huak daong 10.000 urang mbang huak tal urang jakar, urang ngak bruk di tukvak caga jit. Langiu di nan, yaok bilan daong ka 8 urang uranaih matui hu jien jaik 150 trieu dong.

Sa-ai Khưu Nhật Khánh khan lac, dom urang ngak gah dhar phol hu padang dom video clip panak dalam bruk ngak dhar phol piah khan tame Tik Tok yaih khan pambak dom ngak di drei. Sa-ai Khưu Nhật Khánh brei thau lac: “Gam saong bruk ngak di kapul pambuak baoh hatai njauk hatai bhap bini, kayua lac khol dahlak hulin ngak njauk tui ilamo glo akaok di Wa Ho Chi Minh saong mek 4 baoh huruh “tari taring, patak pataom, tapak tapaiy, siam mekre” di Wa Ho ngak akaok mbram tacei brei ka bruk ngak. Kayua khol dahlak ja yakin lac, jalan nao jalan ngak tui ilamo glo akaok di Wa Ho yau ye akaok bram patacei jalan drei ngak, jalan yam nao”.

Yau ye sa-ai Bùi Thị Bé Hai daok di xa Mỹ Thuận, tapa dom harei nyaom biai, sa-ai kham marat dakvah ka urang kamei pakacah gauk ngak. Dalam nan bruk bac magru ngak tui jalan ilamo Wa Ho tui sarak yaok thun, saai jak ba abih 100% urang jakar, dan saong 80% urang kamei tut tangin tame bac magru ngak tui Wa Ho meng dom bruk ngak cambaic laic. Sa-ai Bé Hai khan lac: “Tuk halei jeng mboh iek praong bruk bac magru saong ngak tui Wa Ho njauk tui bruk ngak di drei, di yaok janih kadha ye drei njauk kham marat. Dalam nan dahlak akau tuk halei jeng ngak siam dalam bruk “tari taring, patak pataom, tapak tapaiy, siam mekre”. Dalam bruk ngak dahlak ngak njauk ngak blaoh ngak siam, ngak njauk tanut kadha”.

Mỹ Thuận sa baoh xa hu ralo urang bangsa takik daok, kayua yau nan ye dalam bruk patagok kinh te, patrun kathaot njauk caik hatai. Yau ye sang sa-ai Danh Thị Tú Em, hu jien nyim masraiy meng Gilang bank sarak xa hoi, sa-ai dak tuk dak pasiam raidiuk di drei gam saong bruk ngak mbang blei salih gah mbang huak. Sa-ai Tú Em brei thau lac: “Dahlak hu thau tal phun jien masraiy di Gilang bank sarak xa hoi, masraiy jien peih kuan ia pablei ia menyum saong kaya mbang huak. Dahlau diah oh hu phun jien yau nan ye kurang nak kurang lakuk ini hu jien masraiy meng hu bruk ngak karo tani tanat”.

Gam tui kham marat oh padeih, sa-ai Bùi Thị Bé Hai tuk halei jeng ngak siam abih dom bruk jao, ngak siam hu mayaom, hu harak mayaom di pakat nagar Trung uong saong pakat palei kayua ngak siam bruk kamei, bruk ngak di jakar joi…. Sa-ai mek hu harak mayaom di Thu tuong Rajaei thun 2023./.