Tuk pagam 3 bhum taneh: Ban raya Ho Chi Minh, tinh Binh Duong saong tinh Baria Vung Tau jeng Ban raya Ho Chi Minh bahrau” gam saong bruk pasiam jalan mbak saong cakrok patagok khang kajap. Dalam nan, jalan mbak nao mai dalam ban ray aini oh lac hu sa janih bruk peih praong, blaoh nyu daok lac bruk pataom tame saong parabha ka nyu laik haong gauk, ngak brei siam mekre bruk pajeng ba di taong abih labik dalam Ban raya pambuak pagam bahrau. Kayua yau nan ye, bruk taong yaom gilac taong abih dom bruk ngak urak ini saong brei panuac rik daong ngak brei pasiam ka nyu lagaih saong “Ban raya Ho Chi Minh bahrau” nan lac sa bruk njauk ngak samar drah.

Ban raya Ho Chi Minh ieu lac sa baoh Ban raya praong abih dalam taneh ia, gam saong rilo janih jalan mbak nao mai min daok ganik katil; Binh Duong ieu lac pasak ngak kong cakrok patagok samar; Ba Ria- Vung Tau hu prein khang gah mblang tasik saong bruk ngak kong gah pabah lamnge, rivang ma-in jirah.

TS.KTS. Lê Quốc Hùng - Phaok akaok Jabat Quy hoach Ban raya praong saong Puk palei Negar brei thau, piah cakrok patagok khang kajap saong meriak gauk dunya, Ban raya Ho Chi Minh bahrau njauk ngak siam bruk quy hoach taong abih oh njauk tok mbuan mbiah pambuak pagam gilac 3 quy hoach hu blaoh. Bruk kal di abih nan ieu lac ngak habar dak padang hu jalan maong iek yasa ka sa ban raya dalam harei hadei: 

“3 bhum taneh palei pala praong saong hu dom kadha biak karrei di gauk. Ban raya Ho Chi Minh biak rilo manuac urang daok, cakrok patagok rilo gah, trauk gah jien padai, pablei salih. Daok tinh Binh Duong ye mblein gah ngak kong. Ba Ria- Vung Tau ye sa labik di pabah lamnge, menyek saong lac sa labik praong brei ka gah jirah rivang ma-in. Di ini daok tamuh tabiak bruk dak quy hoach, bruk adat hukum jeng yau di gah politik. 3 bhum taneh palei pala ini hu dak rai sajarah suai lavik di abih, hu asal kadha jeng biak karei oh sa janih brei ka gah ngak mbang rahra, blaoh daok gah manuac urang, gah the che, gah jalan peih ngak dom kadha dom bruk daok rah tabiak dalam labik”.

Ban raya Ho Chi Minh bahrau hu mblang taneh 6.722 km2, manuac urang bon bhap di Ban raya praong ini jaik 14 trieu urang gam saong 168 jabat karja pakat xa; jien mek tame ka kadung jien Karja kuhria rah tapa labaih 25% taong abih yaom jien mek tame dalam negar, taong abih ndap nda dalam labik jaik 2,4 trieu ti dong. Tuk pambuak pagam, Ban raya Ho Chi Minh bahrau hu labik dang gah ngak mbang rahra blaoh kan si puk palei halei hu yau nan. Urak ini, 3 quy hoach dak di 3 bhum taneh palei pala ini hu jalan mong iek atah saong hu brei mboh baoh jeng siam mekre di yaok labik. Yau nan min, bruk njauk ngak dahlau di abih njauk ngak yau habar piah ba tabiak hu sa jalan maong iek quy hoach dak ka nyu laik haong gauk.

Tui TS. Trần Du Lịch, urang dang akaok Kapul Pato tacei daong peih ngak Sarak 98, tuk pasang iek gilac 3 quy hoach di 3 bhum taneh palei pala ye njauk kuhri kuhria veik ka gah quy hoach binah ngak kong. Ban raya Ho Chi Minh bahrau hu prein khang dang akaok gah ngak kong, jitvu gah tasik saong lac pasak ngak mbang gah tasik praong. TS.Trần Du Lịch brei thau: 

“Ban raya Ho Chi Minh bahrau meda hu pasak jien padai. Saong meyah tabiak rai hu ye hu Ban raya pablei salih bebat hu di Cái Mép - Thị Vải. Yau nan, pren khang ngak brei cak rok patagok nan lac bruk ngak kong, pablei salih dunya, gah tasik, logistics, jien ndo saong abih di nyu lac ilamo glaong. Hu labik halei pataom hu abih prein cakrok patagok khang yau nan. Oh ka ndom tal labik ini biak siam gheih piah cakrok patagok sa ban jak, bahrau, pachreih oh lac 14 trieu akaok bol bala min, blaoh bhap bani daok dak harei dak cakrok patagok samar.).

          Dom lek taka brei thau ka bruk cakrok patagok ekonomi, bruk ngak mbang kinh te, prein khang ngak bruk, bruk pablei tabiak negar langiu, cak rok patagok bruk ngak kong, jitvu saong jien padai di Ban raya Ho Chi Minh jeng dang akaok dalam taneh ia. Bruk nan, brei mboh cambaih laih jalan maong iek atah dhua ka bruk dak padang sa baoh Ban raya Ho Chi Minh ginup praong. Meng nan bruk hu jeng sa ban dunya, sa ban hu prein meriak gauk angaok dunya saong patui lac "ba akaok nao dahlau" jhul cakrok patagok bruk ngak mbang oh lac tok ka bhum ka labik ini bo daok ka taneh ia./.