Đảng viên H’Đàn Niê (45 sơnam, kòn cau Rơđê) ơm tàm ƀòn Sút Hluốt, sàh Cư Suê, kơnhoàl Cư M’gar, pa geh pồ lơh Ƀí thư Ci ƀộ ƀòn tơngai lơh broă bơh nam 2025- 2027. Bi H’Đàn yal, do là bơta chờ hờp, bơta pin dờn pồ ăt gơnoar broă bơh đảng viên tàm ƀòn dê, mơya kung bềng kơnòl tàm tŭ tơngai tam gơl pa tŭ do. Bơdìh mờ tŭ jiơ sền gàr 1 lồ 2 sàu mìr kơphê, tiêu, ală ngai do, bi bal mờ ală kwang bàng sàh, thôn lòt tơl hìu lùp jơnau đơs tă pơgồp bè broă tam gơl Sơnoa boh lam, mblàng yal loh gùng dà bơh Đảng, Dà lơgar dê nàng làng bol in wă wờng mờ ring bal bè broă tơmŭt bal sàh, tơmŭt bal càr, ờ gam kâp kơnhoàl. Bi H’Đàn pà gĭt: “Añ neh lòt tus tơl hìu tàm ƀòn bơto pơlam, mblàng đơs loh bè broă tơmŭt bal sàh, tơnggơs sàh mờ sơnah ƀòn pa. Tŭ do den pơn jăt tai mblàng yal làng bol in bè broă tam gơl wơl Sơnoa boh lam, nàng tơl nă cau in gĭt wă loh gùng dà là di, dipal mờ bơta bơtàu tơngguh bơh dà lơgar dê tơngai tŭ do”.

Đảng viên pa H’Wêm Aliô ơm tàm ƀòn Sút Hluốt, sàh Cư Suê, pà gĭt, bi H’Đàn Niê ngan là cau lơh gơlik bơta gơdan mờ krơh àng nàng ală bơyô kơnòm să in đòm jăt: “Bi H’Đàn yal tơngĭt añ tàm Đảng mờ geh tơmŭt đảng, tŭ do là đảng viên rơcăng. Jơh ală kơnờm bơta dong kờl, bơto pơlam jơh nùs jơh tồr bơh bi H’Đàn Niê dê. Añ rơ̆p lơh ngan lơh broă bơtàu tơngguh lơh sa nàng geh priă jền uă đau rlau, lơh niam broă lơh tàm sàh, tàm  ƀòn”.

Tàm ƀòn Sút M’Đrưng, sàh Cư Suê, kơnhoàl Cư M’gar, đảng viên H’Đao Êban (38 sơnam, kòn cau Rơđê) kung pa geh pồ lơh Ƀí thư Ci ƀộ. Neh geh tŭ dờp lơh ală gơnoar broă bè Ƀí thư Ci đoàn, Lam bồ ƀòn, bi wă wờng ală kal ke, mờ jòi gùng dong làng bol brồ guh. Nam 2018, bi neh tơnggơs Mpồl tàñ ồi kòn cau ƀòn Sút M’Đrưng, gơhòi gơ jà 35 nă cau ùr mŭt ba;. Kơnờm gàr sùm lơh gơlik phan kơ̆ kơl jăp, ală cau tàm mpồl tàñ ồi kòn cau lơh geh priă jền sùm bơh 3 tus 6 tơlak đong pah nhai. Bal mờ hơ̆, bi gam pơgồp bal mờ kwang bàng niam chài sàh tơnggơs mpồl cing mờ rlau 15 nă cau tàm mpồl, sùm lòt lơh ai làng bol in sền. Ùr Ƀí thư Ci ƀộ H’Đao yal: “Añ hòi jà oh mi cau ùr, ală bơyô là cau klau mờ ală mơi ală wa tàm ƀòn khin cha lơh mpồl tàñ ồi kòn cau mờ lơh mpồl dròng cing. Tơl nă cau tus bal jơh nùs ngan. Añ kơ̆p kờñ là bơh ală broă lwoh do, niam chài kòn cau Rơđê bơh bol he dê rơ̆p pơn jăt tai geh prăp gàr mờ lơh gơrề uă tus rơnàng kơnòm să”.

Sàh Cư Suê, kơnhoàl Cư M’gar geh rlau 220 nă đảng viên, tàm hơ̆ geh 71 nă đảng viên là cau jơi bơtiàn dồ êt nă cau, pơrjum tàm 2 Ci ƀộ thôn kòn cau Dao mờ 4 Ci ƀộ ƀòn kòn cau Rơđê. Tàm hơ̆ geh 2 nă ùr Ƀí thư Ci ƀộ kòn cau Rơđê là bi H’Đàn Niê mờ H’Đao Êban. Ồng Phan Xuân Lực, Ƀí thư Đảng ủy sàh Cư Suê đơs bè bàr nă ùr Ƀí thư sùm lơh jăt niam gơnoar broă “Đảng viên lòt lài, làng bol ƀòn lơgar jăt tơnơ̆”, bè jơnau bơto Wa Hồ dê.

“H’Đàn Niê den oh mi do geh bơta sền sơnơng jŏ jòng, sùm mblàng yal hòi jà làng bol tàm ƀòn đòm jăt gơguh jak jak chài măy mŏk tàm ròng phan, tam kơphê, tiêu mờ ală bơta chi sa plai gơ ai priă jền phan bơna uă. Ai gơ wèt mờ bi H’Đao Êban, do là cau kờñ ngan prăp gàr niam chài. Să tờm bi neh hòi jà làng bol prăp gàr broă lơh tàñ ồi kòn cau, bơ̆t bơtàu mpồl cing gam lơh broă niam ngan, bơh hơ̆ prăp gàr niam chài- đơs crih tam ya bơh làng bol Rơđê dê tàm ƀòn lơgar. Khi ndrờm là ală Ƀí thư Ci ƀộ jak chài ngan bơh ƀòn lơgar dê mờ là cau lơh kòn gùng đah Đảng mờ làng bol”.

Tàm ƀòn lơgar kòn cau Rơđê dê, cau ùr ờ mìng là cau gàr ồs hìu bơnhă lơm mờ gam là gàr ồs lơh gơlik bơta pràn lơh gơrề uă tàm ƀòn lơgar. Ală ùr Ƀí thư Ci ƀộ bè H’Đàn Niê, H’Đao Êban là ồs lơh gơlik bơta gơndan ai bơta bơtàu tơngguh lơh sa- mpồl bơtiàn in, sền gàr ngui niam bơhiàn niam chài ờs mờng bơh yau jơi bơtiàn dê, ai ƀòn lơgar in ngai sơlơ pas sơm niam bơnĕ.