Chờ hờp pơlam tàp sơnđoh bal mờ ală bơyô tàm Hìu Niam chài Ơruh pơnu kơnòm pa tàu mờ kơnòm dềt càr Dăk Lăk, oh Nguyễn Thục Quyên, 13 sơnam, ơm tàm sơnah ƀòn Ea Tam, ƀòn dờng Buôn Ma Thuột pà gĭt, tŭ tơn jơh nam bơsram, oh neh rcang geh broă rơndăp lơh nàng geh ală ngai rlô bơkang chờ hờp mờ geh kwơ. Tŭ do, Quyên neh cih mat tus bal bơsram tai 2 ơdŭ bơsram bơta chài tai tàm Hìu niam chài: “Tàm nhai do kòn rơ̆p tàp nhơl plai tơrnò mờ broă lơh tàm do, ai 2 nhai tơnơ̆ den kòn rơ̆p bơsram tai tàm kàl rlô bơkàng, bơsram Toán mờ dà Mỹ. Tus nhai 8 kòn rơ̆p lòt nhơl tàm Gia Lai. Nam do kòn geh mè cih mat tus bal lòt sền gĭt 5 ngai 4 mang tàm Hìu Yàng Phờk Liên Trì tàm Gia Lai, dong kờl tơrmù ƀà bơta ờ niam tàm bồ tơngoh tơnơ̆ dùl nam bơsram jŏ”.

Nàng oh kòn in geh dùl kàl rơlô bơkang kwơ ngan, uă mè bèp kung jơh nùs jòi gĭt mờ dong cih mat tus bal ală broă lơh. Broă lơh kàl rơlô bơkang tàm càr Dăk Lăk ờ mìng lơh geh bơta chờ hờp, bơsram tàp bơta chài lơm mờ gam wèt tus dong kơnòm dềt tơrmù ƀà sền ală phan điện tử mờ pleh bơta pơhìn rềs àr sồt să. Bi H’ Duyệt Niê, ơm tàm sơnah ƀòn Tân Lập, ƀòn dờng Buôn Ma Thuột, càr Dăk Lăk, pà gĭt:“Kàl rơlô bơkang kung kờñ lơh geh ală bơta ai kòn in lòt nhơl, chờ hờp, pràn kơl dang mờ khin cha rlau, geh uă bơyô mờ lùp bơsram uă bơta. Kòn añ dê tŭ do gam bơsram ơdŭ Dance-kids, bơsram tam ya bơh nam lài tus tŭ do, kòn kung kờñ tam ya sơl den tàng añ kung gam ai kòn in lòt bơsram tam ya”.

Tàm Hìu Niam chài Ơruh pơnu kơnòm pa tàu mờ kơnòm dềt càr Dăk Lăk, geh rlau 2 rơbô nă ơruh pơnu kơnòm pa tàu mờ kơnòm dềt gam tus bal ală ơdŭ bơsram bơta chài, bè: tam ya, đơs crih, wăc sềr rùp, tề lăm, tàp pràn să jan, tàp võ... Is ồn, broă lơh “Bơsram tàm mpồl ling klàng” dong gĭt nđờ rơhiang nă kơnòm dềt bơh 8 tus 15 sơnam geh tŭ tơngai niam sền gĭt tiah bơsram tàp duh rơngòt kơrnoat boh lam, ờ geh tivi, ờ geh điện thoại. Bi Nguyễn Thị Thúy Hiền, Phó Lam bồ Drơng Hìu niam chài Ơruh pơnu Kơnòm pa tàu mờ kơnòm dềt càr Dăk Lăk pà gĭt: “Kàl rlô bơkang là kàl mờ hìu  kơnòm dềt duh hồl ngan. Rlau 30 bơta ơdŭ bơsram geh bơyai lơh bơh 5 jiơ nggùl drim tus 9 jiơ mang, di pal mờ uă cau kơnòm bơsram bơh 2 sơnam rlau hơđang. Nam do, bơdìh mờ gàr sùm ală môn ờs mờng bè lài do bè gah niam chài, đơs crih tam ya, tàp pràn să jan, bơta chài kis den bol añ gam sền gròi tus broă lơh ờ sa priă, ală tiah nhơl bơceh lơh, sền gĭt gơwèt geh bồ tơngoh, sền gròi rcang lài kơryan bŭ dà mờ rềs àr sồt să ai ală kơnòm dềt in”.

Tàm ală ƀòn lơgar, kơnòm dềt càr Dăk Lăk kung gam mut tàm kàl rơlô bơkang duh hồl. Oh H’Juliê Byă, 9 sơnam, ơm tàm sàh Ea Tul, kơnhoàl Cư Mgar đơs: kàl rlô bơkang là dơ̆ nàng ting jat ală bơta mờ he kờñ. Ờ mìng lòt bơsram tàm hìu bơsram lơm den tàng oh geh uă tơngai nàng bơsram tai ală gah bơta chài mờ nhơl ñiŏ ngan: “Tàm tơngai ơm rlô bơkang, kòn bơsram dà Mỹ, bơsram MC, bơsram cih akhar, bơsram pĕ kơñi. Hơ̆ là ală bơta kòn kờñ. Bơdìh mờ hơ̆ là ală tŭ ru, kòn sền jơnau yal yau mờ nhơl mờ oh mờ ală bơyô tàm tiah kòn ơm”.

Tàm kàl rơlô bơkang kung là tŭ geh bơyai lơh Nhai lơh broă tài kơnòm dềt, den tàng, ală broă lơh sền gàr, sền gròi mờ bơto bơtê kơnòm dềt sơlơ geh sền gròi uă ngan. Nam do mờ tơngume “Ai lài bơta priă jền lơh sir ală jơnau kờñ tài kơnòm dềt” bơh nggùl nhai 5, Anih duh broă Làng bol càr Dăk Lăk neh ai lơh jat broă rơndăp lơh lam lơh Nhai lơh broă tài kơnòm dềt. Tàm nhai 6, Dăk Lăk lam lơh “kàl rơlô bơkang tài kơnòm dềt” mờ ală broă lơh mblàng yal bơto bơtê mờ bơto re dà, rcang lài kơryan bŭ dà ai kơnòm dềt jơh gùt càr dê in. Tàm ală tiah làng bol ơm kis, Đoàn Ơruh pơnu kung bơyai lơh pơrjum kàl rơlô bơkang ai kơnòm dềt tàm tiah ơm kis in mờ uă broă lơh li la uă ngan. Bi Phan Thị Trinh, Phó Ƀí thư Tỉñ đoàn càr Dăk Lăk pà gĭt:“Sơlơ tơnguh tai pơgồp bal mờ ală gah broă nàng lam lơh gĭt mờ bơsong ală broă geh gơrềng tus kơnòm dềt. Sơlơ tơnguh tai lơh broă rcang lài kơryan tàm ƀòn lơgar nàng ală kơnòm dềt in geh ală broă lơh nhơl ñiŏ tàm kàl rơlô bơkang ai gơ in niam mờ lơngăp lơngai. Pơn jat tai lam lơh dơ̆ hòi jà Tài mpồl kơnòm dềt kờñ gơboh, tơrgùm tàm ală tơngume bè jàu priă bơsram halà bơt bơtàu mờ lơh niam wơl ală broă lơh bơt bơtàu nhơl ñiŏ ai ală kơnòm dềt in, is ồn là ală tiah sar lơgar ngài mờ ală tiah kal ke”.

Mờ bơta tàm sơm bat tê bal bơh ală kấp, ală gah broă, mờ ngan là bơh bơta rcang lài bơh ală mè bèp dê, kơnòm dềt càr Dăk Lăk gam geh dùl kàl rơlô bơkang ngan ngồn chờ hờp, lơngăp lơngai mờ geh kwơ. Tơl broă lơh, pah tiah nhơl ờ mìng là bơta chờ hờp lơm, mờ gam là phan rcang lài nàng kơnòm dềt in geh tai bơta pin dờn, tào dờng rlau tơnơ̆ pah ngai rlô bơkang dê.