Tàm drim sơn rờp tơnơ̆ tŭ tơmut bal càr, đơng lam bồ ală mpồl lơh broă gơwèt Sờh Broă lơh sa suơn sre mờ Tiah ơm kis càr Dăk Lăk (pa) neh đơng lam dơ̆ pơrjum nàng tam jàu, tam pà kơnòl broă, ring bal broă lơh pơgồp bal lơh broă. Ală tơngume tờm bè kờp sền mpồl broă lơh gam gơ kòl, lơh lài bơsong ală kơnòl broă jal mhar, pơn jat tai dong kờl lơh sa, atbồ phan kwơ ù tiah mờ tiah ơm kis neh geh lơh nền, gàr niam broă lơh mut lơh broă geh bơyai lơh niam, ờ gơtìp lời ing.

Ồng Mai Vũ Quốc Bảo, kwang bàng Ci kụk Atbồ bơta niam Broă lơh sa suơn sre, phan brê, phan tàm dà- lài do lơh broă tàm càr Phú Yên (yau) đơs:“Mờ nùs nhơm crăp rcang ai broă lơh. Ngai sơn rờp lòt lơh broă tàm dùl tiah pa, geh bơta rcang lài bơh mpồl lơh broă dê dong kờl tiah ơm, sa sào, lòt rê kung bè tiah lơh broă, tus tŭ do añ gơtùi sơnđờm lơh broă mơ nàng lơh geh jơnau sồr bơh đơng lam bồ kấp hơđang kung bè broă lơh ờs mờng dê”.

Ồng Đỗ Tuấn Hưng, Kwang lam bồ Ci kụk Atbồ Bơta niam broă lơh sa suơn sre, phan brê, phan tàm dà càr Dăk Lăk, pà gĭt, tơnơ̆ tŭ tơmŭt bal mpồl lơh broă dờp tai 8 nă kwang bàng bơh Phú Yên guh Dăk Lăk lơh broă. Tus tŭ do, ală cau dồ nă să is neh bè ờs bè tiah ơm tiah sa sào, rcang lài tơl làm nùs nhơm, crăp rcang lơh broă tàm bơta pa:“Bol añ neh pơrjum nàng lam lơh, tàm jàu broă lơh ngan ngồn tơl nă oh mi rê tàm ală cơldŭ ơm pa bơh Ci kụk dê mhar ngan gĭt broă lơh gàr niam broă lơh, lơh broă 6 nhai lồi nam ờ gơtìp lơyài”.

Mò Đặng Thị Thuỷ, Phó Kwang lam bồ Sờh Broă lơh sa suơn sre mờ Tiah ơm kis càr Dăk Lăk đơs nền, jơh gùt gah broă rơ̆p pơgồp bal niam, mhar ngan pồ tơl mpồl lơh broă, gàr niam broă lơh kơ̆ kơl jăp mờ tơrgùm lơh jat ală broă lơh, broă rơndăp lơh drơng broă bơtàu tơnguh lơh sa-mpồl bơtiàn bơh càr dê tơnơ̆ tŭ tơmŭt bal. Mò Đặng Thị Thuỷ đơs:“Bol añ neh crăp rcang tă pơgồp tàm broă lơh bơt bơtàu broă lơh bơtàu tơnguh bơh gah broă lơh sa suơn sre, ngui jơh ală bơta ƀuơn  bơta pràn bè li la siñ họk nàng ai gah broă lơh sa suơn sre mờ tiah ơm kis in bơtàu tơnguh tơlir, kơ̆ kơl jăp jŏ jòng ai càr pa in. Mờ do là tŭ tơngai niam ngan nàng rơndăp tăp sèng wơl gah broă lơh sa suơn sre- tiah ơm kis jat gùng dà pa ngan mờ rềp mềr mờ tiah ơm kis.