Tàm dơ̆ pơrjum, ồng Trương Văn Đạt, Phó Củ tịc Mpồl duh broă làng bol càr Gia Lai neh yal ală tơngume gơ rềng tus broă sồr cau lơh broă. Jat jơnau lơh nền tàm pơrjum bơh Anih duh broă Lơh kơnòl broă sùm Quôk hội dê, càr Gia Lai tơngai lơh broă bơh nam 2021 tus nam 2026 geh kờp jơh 119 nă cau ala mat. Bal mờ hơ̆, ală gơnoar broă tờm ngan bơh Mpồl duh broă làng bol càr dê kung geh yal sơl. Mùl màl: ồng Rah Lan Chung, Phó Ƀí thư Duh broă sùm Tỉñ ủy càr geh sồr at gơnoar broă Củ tịc Mpồl duh broă làng bol càr Gia Lai.

Ală Phó Củ tịc Mpồl duh broă làng bol mờ Cau lam bồ ală mpồl lơh kơnòl mìng dùl lơm kung geh pồ tơl tàm mpồl kwang đơng lam bồ pa. Pơn jat hơ̆, Mpồl duh broă làng bol neh yal jơnau lơh nền bơh Thủ tướng Cíñ phủ dê bè cau lơh broă kwang đơng lam bồ Anih duh broă làng bol càr Gia Lai tơngai lơh broă bơh nam 2021 tus nam 2026. Tàm hơ̆: ồng Phạm Anh Tuấn, Phó Ƀí thư Tỉñ ủy càr geh pồ at gơnoar broă Củ tịc Anih duh broă làng bol càr Gia Lai; 6 Phó Củ tịc Anih duh broă làng bol drơng ală gah broă geh sồr. Đơs tềng đap Mpồl duh broă làng bol, ồng Phạm Anh Tuấn, Củ tịc Anih duh broă làng bol càr Gia Lai hơ pơrgon: “Dan hơ pơrgon lơh broă mờ nùs nhơm kơ̆ dơn, dòn song, lơh broă geh kơnòl mờ geh cồng nha, tàm hơ̆ ai jơnau đơs lơh krơh lài, lơh jat kơrnuat pal jat, tơngume tờm tam gơl pràn lơh gùng dà lam lơh sùm tàm jơh gùt tŭ tơngai atbồ mờ đơng lam. Bal mờ gơp pơgồp bơta pràn, dùl nùs bal, lơh broă jơh nùs, ring bal geh cồng nha tài dùl tơnơ̆ do bơtàu tơnguh dipal ai càr Gia Lai pa in wèt tus jơnau kờñ bơtàu càr Gia Lai gơs là càr bơtàu tơnguh kơ̆ kơljap, bơnĕ bơnài, tam gơl pa, pas sơm, niam bơnĕ, niam chài, cèng nùs nhơm niam, ù tiah mờ tơl mpồl lơh sa kă bro, làng bol ndrờm geh bơta kơp kơnờm nàng tă pơgồp ai bơta bơtàu tơnguh bơh ƀòn lơgar he dê in”.

Tàm dơ̆ pơrjum, ală cau ala mat neh tơrgùm cribơyai, ai jơnau đơs bè dùl ròt ală jơnau rơcang cih jơnau lơh nền tàm pơrjum kuơmàng, geh: crơng gơs ală anih lơh broă gơ wèt Mpồl duh broă làng bol càr Gia Lai. Broă rơndap lơh bơyai lơh ală dơ̆ pơrjum ờs mờng bơh Mpồl duh broă làng bol càr dê. Crơng gơs ală anih lơh broă mờng chài mờ mpồl lơh broă sră pơ àr gơnoar atbồ gơ wèt Anih duh broă làng bol càr Gia Lai. Yal mat ală cau tàm mpồl cah rơña bơh anih cah rơña làng bol càr Gia Lai pa dê… Ală tơngume do geh sền là broă lơh sơn rờp tàm broă pồ tơl mpồl lơh broă sră pơ àr gơnoar atbồ càr dê, gàr lơh broă geh cồng nha mờ ring bal tàm tơngai lơh broă pa.

Đơs tàm pơrjum, ồng Hồ Quốc Dũng, Ƀí thư Tỉñ ủy càr Gia Lai đơs sùm: “Añ sồr ală oh mi đơng lam bồ mpồl lơh broă, ală tiah pa geh pồ tơl sơn đờm lơh mơ tơn broă bơt bơtàu broă rơndap lơh ngan ngồn, mùl màl nàng lam lơh gơ in jak chài, geh cồng nha tơl kơnòl broă geh jàu tàm tơngai tus. Càr pin dờn là mờ bơhiàn ờs mờng, bồ tơngoh khin cha, nùs nhơm tam klac bal mờ bơta kơp kờñ brồ guh bơh càr Gia Lai pa dê, mờ dùl bơta pơnđơl pràn cíñ trị pa lơh ngan wèt tus là dùl càr lam lài tiah Tây Nguyên mờ tiah kềng gah dà lềng đah jum tàm gùl lơgar bal mờ gùt lơgar mut tàm rài pa”.

Pơrjum dơ̆ dùl Mpồl duh broă làng bol càr Gia Lai khoă XII là broă sơn đờm kuơmàng nàng Gia Lai wèt tus jơnau kờñ bơtàu tơnguh kơ̆ kơljap, gơ gơs là dùl càr lam lài tàm tiah do mờ gùt lơgar.