Tơnơ̆ rlau 10 nam lam lơh jat, Jơnau lơh nền sồ 42 nam 2012 mờ Jơnau lơh nền sồ 64 nam 2015 neh dong kờl mờr 570 rbô dơ̆ cau lơh broă jơi bơtiàn dồ êt nă cau, mờ kờp jơh kes priă rlau 1 rbô 270 tơmàn đong. Ală broă lơh dong kờl do neh pơgồp bơnah ai geh broă lơh kơ̆ kơljap sùm, tơnguh bơta niam cau lơh broă mờ chồl tơnguh bơtàu tơnguh lơh sa – mpồl bơtiàn tàm uă tiah gam kal ke.

Bulah bè hơ̆, bơta geh ngan lam lơh jat kung ai gŏ uă bơta ờ niam: broă ai ngui gam dồ êt, tŭ mìng rơp pa geh 13 tàm 25 tiah lam lơh dong kờl; khà dong kờl ờ uă, tŭ tơngai lơyah; sră pơ àr gơnoar atbồ gam kal ke lơh mpồl lơh sa kă bro ờ gơtùi dờp broă dong kờl; broă dong kờl ờ hềt geh tàm ală gah bè lơh gơlik phan bơh suơn sre. Tàm tŭ tơngai drà lơh broă gam tam gơl mhar ngan, broă tam gơl 2 jơnau lơh nền pa yal gơ gơs jal mhar ngan.

Tàm pơrjum, ală cau ala mat neh song dơpă tă pơgồp jơnau đơs nàng kờñ lơh sir broă dong kờl jat gùng dà broă lơh ngan ngồn mờ geh cồng nha rlau. Mò Lương Thị Oanh, Lam bồ Mpồl lơh broă bal Lơh sa suơn sre Ea Wy, kơnhoàl Ea H’leo, càr Dăk Lăk yal, Mpồl lơh broă bal geh jơnau kờñ rơ wah mờ bơto bơtê uă cau lơh broă là cau jơi bơtiàn dồ êt nă cau. Bulah bè hơ̆, khà dong kờl tŭ do gam dồ êt, broă pờ ală ơdŭ bơto bơtê ờ hềt dipal mờ bơta geh ngan den tàng ờ gơ hòi gơ jà cau lơh broă. Broă lơh tam gơl pal sền gròi rlau tai tus bơta is ồn bơh cau lơh broă jơi bơtiàn dồ êt nă cau dê. Mò sồr: “Dùl ơdŭ bơto bơtê geh dong kờl bơh 5 tus 7 tơlak đong, mơya dilah jŏ jòng 3 nhai den rơp lơh gơ rềng tus priă lơh geh, rài kis bơh cau lơh broă dê – mùl là cau lơh gơlik priă jền tờm ngan hìu bơnhă in. Añ sồr lam lơh bơto bơtê tàm ƀòn lơgar, rềp ƀòn ơm kis mờ tiah lơh broă nàng cau lơh broă in bơsram ndang mờ kung gam gơtùi pơn jat tai lơh broă”.

Mò Huỳnh Thị Liên Hoa, drơng broă Cơldŭ sac rơ wah tiah – anih kơlôi sơnơng rơndap ù tiah mờ bơceh lơh broă sa suơn sre (Ƀộ Lơh broă sa suơn sre mờ Tiah ơm kis) pà git, broă lơh dong kờl tŭ do gam uă ir sră nggal, lơh mpồl lơh sa kă bro gơtìp kal ke: “Jơnau sồr lơh cơng cau hơ̆ là cau jơi bơtiàn dồ êt nă cau kung kal ke ngan. Jơnau tơnggit do tŭ do ờ geh tàm kăn kươk làng bol, den tàng mpồl lơh sa kă bro pal lùp sền tai mờ bơ tơl uă sră nggal. Tàm tŭ tơngai tam gơl wơl sră pơ àr gơnoar atbồ, broă lơh dong kờl pal tơrmù lơyah ngan rlau jơh, mìng kờñ gam gơtùi gàr bơta atbồ nền nòn. Mờ bơta tam gơl sồ tŭ do, dilah anih atbồ lơh bal den gơtùi dong kờl mpồl lơh sa kă bro geh cồng nha”.

Uă cau ala mat kung sồr rề ơnàng cau geh dong kờl, yal ù tiah dong kờl tus kâp sàh nàng dipal rlau mờ bơta geh ngan; bal mờ hơ̆, broă dong kờl pal bơceh lơh ndrờm bal mờ ală adat boh lam mờ broă lơh bơtàu tơnguh ƀòn lơgar ndai. Bal mờ hơ̆, pal bơ tơl jơnau sồr sền sơ wì cồng nha ngui cau lơh broă tơnơ̆ dong kờl, chồl pràn lơh bal đah mpồl lơh sa kă bro – mpồl lơh broă bal – gơnoar atbồ kâp hơ đơm, gàr bơta kơ̆ kơljap jŏ jòng sùm tàm bơcri priă bơtàu tơnguh tiah jơi bơtiàn dồ êt nă cau.

Pơrjum geh sền là bơta tàm lùp kuơmàng, pơgồp bơnah lơh sir jơnau rơcang cih tam gơl Jơnau lơh nền sồ 42 nam 2012 mờ Jơnau lơh nền sồ 64 nam 2015 nàng yal Thủ tướng Cíñ phủ sền sơ wì tàm tơngai tus. Jơnau kờñ wèt tus là bơt bơtàu dùl broă lơh dong kờl cèng bơta niam chài, ngan ngồn, ring bal, lơh gơlik bơta gơn kơnờm jŏ jòng ai tiah nă să is in tàm broă ngui mờ bơtàu tơnguh cau lơh broă tiah làng bol jơi bơtiàn dồ êt nă cau mờ tiah kơh bơnơm tàm bơta pa. Ồng Lê Đức Thịnh – Lam bồ Kụk lơh sa lơh broă bal mờ Bơtàu tơnguh ƀòn lơgar đơs nền: “Bol hi rơp kơlôi sơnơng tă pơgồp jơnau đơs nàng geh dùl broă lơh dong kờl bơrlŭ bal, lam lơh jat gùng dà dồ mpồng, nàng kờñ lam lơh ngan ngồn broă lơh dong kờl tiah làng bol jơi bơtiàn dồ êt nă cau, lơh gơlik bơta niam nàng ală mpồl lơh sa kă bro, mpồl lơh sa in geh dờp ală broă dong kờl dồ bă bơnĕ bơnài ngan rlau jơh”.