Hìu sơnơm Kơnòm dềt 1 ƀòn dờng Hồ Chí Minh pa dong klàs kis dùl nă kòn ùr 12 sơnam, bơh càr Trà Vinh gơtìp kòp mprơm gơlik mhàm jroă bal mờ gơlik tàm tàm gùng tơrdih phan sa, gơlơh să. Ƀák sìh Phạm Văn Quang, Kwang lam bồ gah Tơn pràn să, Hìu sơnơm Kơnòm dềt 1 pà git, do là cau gơtìp kòp mprơm gơlik mhàm jroă tài roh mhàm tơrdih phan sa uă, is mờ bơnah uă cau gơtìp jroă tài as sồt klờm soh, leh. Di lah mŭt piam tàm hìu sơnơm jơla, bơta di gơlan kòn dềt gơtìp chơ̆t là uă ngan: “Kòp mprơm gơlik mhàm lơh gơtìp ờ niam tàm broă kơ̆t mhàm den tàng kòn ùr dềt gơtìp gơlơh să uă. Dơ̆ bàr là tài kòn dềt gơtìp gơlik mhàm tàm gùng tơrdih phan sa den tàng bol añ bơyai lơh nội soi sơm mhar. Bơta kòp mprơm gơlik mhàm uă tiah den tàng he mìng kơrian mhàm gơtùi tàm ală tiah gơlik mhàm uă, gam ală tiah ndai kung gam gơlik sơl, lơh ngan ƀồm sơnơm mŭt tàm dong kờl kơrian wơl. Tơnơ̆ mờ hơ̆ bol añ sền bal mờ Hìu sơnơm Mhàm bal mờ tơmŭt mhàm nàng bơyai lơh cit sơnơm rơnàng pa nàng dong kờl lơh kơ̆t mhàm wơl”.

Hìu sơnơm Kơnòm dềt Ƀòn dờng kung pa dong klàs di tŭ dùl nă kòn ùr dềt 5 nhai gơtìp jroă tài bơh kòp mprơm gơlik mhàm jroă, ờ niam tàm bơta kơ̆t mhàm uă. Lài mờ hơ̆, kòn ùr dềt do gơtìp duh să uă tàm 3 ngai, geh sền rơcang mờ kòp jơng tê bơr tàm hìu sơnơm cau dùl nă să lơh is. Tus ngai dơ̆ 4, bŭ lah neh gơmù duh să, kòn dềt kung gam bic sùm, să bồ pàl, gùng mhàm ờ pràn, hă gơlik phan jù, ờ niam tàm bơta kơ̆t mhàm jroă. Kơnờm mờ sơm kòp mhar mờ broă cit srồm sơndră mờ jroă, ală bơta phan mhàm mờ dong kờl tă nhơm, tơnơ̆ 3 ngai sơm, kòn dềt sơrlèt mờ bơta jroă. Ƀák sìh Nguyễn Minh Tiến, Phó Kwang lam bồ Hìu sơnơm Kơnòm dềt Ƀòn dờng Hồ Chí Minh pà git, bơta do pà gŏ là bơta yal lài mhar ngan bè bơta kòp mprơm gơlik mhàm tàm kơnòm dềt: “He sùm pal rơcang lài, ƀák sìh sùm nting bơto cau kòp geh ală bơta tơngŏ bè jê ndul, ờ suk ơm tàm să, gơlik mhàm muh, mhàm sề, tê jơng mrềt, bơta ngăc ngar ờ niam, kơnòm dềt bic sùm ờ nhơl, hă gơlik mhàm, lòt đì ndul gơlik phơng jù. Nàng rơcang lài, geh ală bơta tơngŏ do den pal cèng mơ kòn dềt tus hìu sơnơm, geh bal cau kòp là cau dờng”.

Tàm hìu sơnơm Kơnòm dềt 2, khà cau gơtìp kòp mprơm gơlik mhàm mŭt piam kòp gơguh rơlao 2 dơ̆ pơn drờm mờ poh lài. Lŏ Nguyễn Thị Lan, gam sền gàr kòn dềt tàm Hìu sơnơm Kơnòm dềt 2 pà git, jơh 3 nă kòn tàm hìu ndrờm gơtìp kòp mprơm gơlik mhàm lơm: “Hìu añ kung geh khàp dà mờ ơm rơlô bơkang, kơnòm dềt tàm hìu ờ lik bơdìh. Kòn dờng añ ờ kơlôi là gơtìp kòp mprơm gơlik mhàm. Tus ngai dơ̆ bàr xét nghiệm den geh pin là bơtờp kòp mprơm gơlik mhàm. Ală kòn tơnơ̆ kung gŏ bè hơ̆ sơl kung pin là kòp mprơm gơlik mhàm sơl”.

Jăt Mpồl jăt sền kòp gơtờp tàm ƀòn dờng Hồ Chí Minh yal, bơh bồ nam tus tŭ do, khà cau gơtìp kòp mprơm gơlik mhàm Dengue neh gơguh mờr 3 dơ̆ pơn drờm mờ tŭ do nam 2024 (gơguh mờr 4 rơbô nă). Ală hìu sơnơm neh dờp mờr 300 nă cau gơtìp kòp jroă (tàm hơ̆ rơlao nggùl là bơh ală càr, ƀòn dờng ndai cèng tus sơm mhar). Tŭ do ƀòn dờng Hồ Chí Minh ờ hềt dờp geh cau gơtìp chơ̆t tài kòp mprơm gơlik mhàm. Sờh Lơh sơnơm ƀòn dờng Hồ Chí Minh yal lài, dơ̆ gơtìp uă bơh kòp mprơm gơlik mhàm sơn đờm gơguh tàm nggùl nhai 6 mờ kờp dŭ gơtìp tus jơh nhai 10 pah nam. Nàng rơcang lài pleh mờ kòp gơtờp, tơrmù cau gơtìp chơ̆t, ală mpồl lơh broă bal mờ gùt làng bol lơh jăt ală broă rơcang kơrian mờ kòp mprơm gơlik mhàm Dengue.

Gah Lơh sơnơm hòi jà làng bol rơcang lài lơh jăt ală broă rơcang kơrian mờ kòp sùm. Mùl màl, pal dơ̆p kơ̆ ală phan đơ dà ngui sa, tơrgùm mờ tam cah is ală bơta siồ siă lơh kờn dà nàng sơmăc deh tăp bè gri chi bơka, khàr bơkào, kong rơndeh neh siar… Lơh jăt broă pơs wàs kloh niam tiah kis gùt dar hìu, bồr tiah kờn dà, bic tàm kơmùng, ngui khàr ƀồm sơnơm, ha là jàl gơsơ̆t sơmăc. Tŭ geh tơngŏ duh să, pal tus mơ hìu sơnơm nàng geh kham mờ sơm kòp, bañ sơm is kòp tàm hìu.