‘Măng pơlong ‘măng mă ou pơgơ̆r đơ̆ng năr 11 truh năr 15/5 tơ̆ cham đă ƀŏng lŏng Pleiku Arena păng Hơnih tơm Pơtho pơhrăm Hàm Rồng, akŏm đei 12 khul. Lơ̆m ou đei 7 khul teh đak đe đơ̆ng rim teh đak Hàn Quốc, Nhật Bản, Trung Quốc, Lào, Malaysia atŭm hăm 5 khul đă ƀŏng lŏng lơ̆m teh đak đei PVF, Hà Nội T&T, Sông Lam Nghệ An, Trường Tươi Bình Phước păng LPBank Hoàng Anh Gia Lai. Iung pơma tơ̆ pơgơ̆r blŭng a, ƀok Phạm Anh Tuấn, Kơdră chĕp pơgơ̆r Hơnih vei lăng kon pơlei dêh char Gia Lai tơbăt, Festival Đă ƀŏng lŏng Apŭng plĕnh teh U14 Gia Lai 2026 hăm vang năm đơ̆ng rim khul đă ƀŏng lŏng hơgei lơ̆m teh đak păng teh đak đe kơ đe hơ ioh 14 sơnăm hlôi tơƀôh hơdăh găh tơdrong lŭ lăp kơ ‘măng pơgơ̆r; adoi sơkơ̆t hơdăh tơdrong hơdrin đơ̆ng dêh char Gai Lai tŏk bŏk roi năr roi pơjing đei minh hơnih truh hơ iă ăn rim tơdrong pơgơ̆r đă ƀŏng lŏng tơplŏng kơdou păng tơmang pơhiơ̆ ‘lơ̆ng ƀlep lơ̆m teh đak păng apŭng plĕnh teh.