VOV.Bahnar – Tơ̆ xah Đam Rông 4, dêh char Lâm Đồng, trong jang Khul tơgoăt tơgoăl drŏ kăn pơtăm ‘long pơmur rong sơdrông pơm brai tŏk bŏk jing hơyak trŏ lăp hloh lơ̆m tơplih ‘long pơtăm, pơjing đei trong jang sa ăn lơ drŏ kăn hơdrung K’ho. Đơ̆ng dôm hơgăt teh chehphe iŏk đei ưh kơ lơ, lơ ŭnh hnam hlôi tơplih pơtăm ‘long pơmur rong sơdrông pơm brai, roi năr roi pơm hơtŏk jang sa iŏk đei kơjăp păng hơmet pơ ‘lơ̆ng tơdrong hơrih sa. Đơ̆ng noh, pơjing đei tơgoăt dih băl kơjăp ƀar păh rim bơngai lơ̆m khul ‘moi kiơ̆ tơbăt dih băl trong jang sa hpơ iă, tơgŭm djru dih băl kih thuơ̆t păng tơmam drăm choh jang sa, adoi tơgop pơm tơplih jơhngơ̆m đon tơchĕng, trong jang sa, roi năr roi sut hŭt trong jang sa pă gan trŏ lăp sơ̆ ki.

VOV.Bahnar - Đắk Lắk jĭ tơring teh đei tởong choh jang xa tŏk pran, hăm lơ tơmam ‘lơ̆ng đei pơ ư pơ ang. Lơ̆m dôm năr pơyan Puih mak, kon pơlei păng tơmoi chă tơmang lăng nhen roi ƀôh hơdăh ƀiơ̆ kơjă kăp gĭt đơ̆ng dôm tơmam OCOP kiơ̆ đơ̆ng dôm kơhôp tơmam đei ming pơrŏ kơpal kơƀang nhă đak hla che, tơmam ƀou phu păr jơ̆p hnam gŏ. Đơ̆ng cheh phe ‘lơ̆ng, đak kơdrot, plei ‘long sơ̆k kro, dôm kơloăi găr chĕch ngôi tôch ‘lơ̆ng, dôm tơmam đei đơ̆ng pơlei pơla dang ei hlôi jing tơmam tôch ‘lơ̆ng, vang tơgop pơjing đei tơmam ƀou phu ‘lơ̆ng ăn pơyan puih mak, tôch juăt hai, tôch ‘lơ̆ng hai lơ̆m rim unh hnam.

VOV.Bahnar - Yak mât lơ̆m sơnăm ‘nao 2026, tơdrong jang sut pơđĭ pơngot, tơjur tơnuh hin, jang tŏk mŭk drăm tơ̆ plei Dơ̆k Rơng, xăh Đak Đoa, dêh char Gia Lai đei lơ tơdrong ‘lơ̆ng hơiă. Hơiă hlŏh jĭ kon pơlei Bahnar tơ̆ âu hlôi đei đon jang tŏk kơdih, klăih đơ̆ng tơnuh hin, pơjei băl jang pơm pơdrŏng, pơjing tơdrong arih xa phĭ tơtŏ dơnŏ ‘lơ̆ng, hiôk chơt. Hăm tơdrong tơgŭm đơ̆ng Đảng, Teh đak, tơdrong mât 1 ƀơ̆r đon păng adrin jang tŏk muk drăm, kon pơlei Dơ̆k Rơng hơđơ̆ng jơhngâm jang tŏk pran hlŏh dơ̆ng.

VOV.Bahnar - Đơ̆ng 1 ‘nu tơdăm pơti ƀă, tôch mơmat tat, mă lei hăm tơdrong pơnam hŏk pơhrăm, băt jang kiơ̆ dôm tơdrong rơgei ‘lơ̆ng đơ̆ng khoa hŏk ki thuơ̆t mưh rei pơtăm, ‘nhŏng Xuĭn, tơ̆ xăh K’Dang, dêh char Gia Lai hlôi pơjing đei tơdrong arih xa phĭ tơtŏ dơnŏ ‘lơ̆ng, 1 sơnăm jang xa đei iok yoa hlŏh 2,5 ti hlak jên đơ̆ng cheh phe. ‘Nhŏng jing bơngai jang xa rơgei, đei kon pơlei pôk pơ ư, hŏk kiơ̆ mư̆h choh jang xa, vă jang tŏk mŭk drăm kơjăp ‘lơ̆ng. Ƀlep ƀât blŭng sơnăm ‘nao, hơpơi kơ mih ma păng bôl boăl vang mơ̆ng ngôi trong jang xa pơm pơdrŏng đơ̆ng 'nhŏng Xuĭn kiơ̆ tơdrong pơma nuh tơ̆ hơla âu:

VOV.Bahnar - Yă Nay H’Wer (bơngai Jarai ) jĭ bơngai jang ‘lơ̆ng kơ jơhngơ̆m đon hơdrin kơdih, yak hloh mơmat tat păng jang mŭk drăm kơjăp tơ̆ tơring kon pơlei kon kông dêh char Gia Lai. Klo lôch hơchăng hrôih, mĭnh drô̆ rong 5 ‘nu kon hŏk jing đei, yă ưh khan lăp yak tŏk jing kon pơlei jang sa hơgei kơ dêh char, mă oei hơdrin vang jang tơdrong jang tơpôl, plang song teh pơm trong, tơgop pơjing tơring tơrang ‘nao. Tơdrong tơroi kơ tơdrong hơrih păng trong jang sa đơ̆ng yă Nay H’Wer păr ang nơ̆r pơma găh jơhngơ̆m đon hơdrin, gơh hơgei păng tơnăp hăm tơpôl, tơgop pơm tơplih um ai pơlei pơla.

VOV.Bahnar - Dôm năr âu ki, dôm anih jang xa, tĕch mơdro tơmam đơ̆ng choh jang đei tơ̆ dêh char Đắk Lắk oei kơrŭn jơhngâm jang xa, pơm hơmet pơ ‘lơ̆ng tơmam, pơtruh măh mai tơmam pơm lăp hăm tơdrong ‘mĕh vă răt yoa roi tŏk đơ̆ng kon pơlei. Mă loi tơ̆ tơring găh Hơlĕch kơ dêh char, mă đơ̆ng pŭ hiong răm lơ đơ̆ng ‘mi tih, đak lơ̆p, lơ anih jang, mă loi jĭ dôm anih jang đei tơmam OCOP, oei pơgĕnh tưk tơiung tơdrong jang xa, pơyoa ăn tơdrong tĕch mơdro tơm ƀât Têt.

VOV.Bahnar - Đơ̆ng rŏng jơnei Hop akŏm Đảng ‘măng mă XIV, jơhngơ̆m đon tơplih ‘nao, hơpơi ‘meh plang pơyơ̆r tŏk bŏk đei hơtŏk pran lơ̆m khŭl druh dăm kon kông tơ̆ Lâm Đồng păng Đắk Lắk. Sơnăm mơlôh M’nông tŏk bŏk hơdrin chĕp vei tơdrong ‘lơ̆ng hơiă joh ayŏ, iung jang lơ̆m rim tơdrong jang pơjei băl tơ̆ tơring hai.

VOV.Bahnar - Bơ̆ jang kiơ̆ trong jang đơ̆ng Anih tơm Chinh trĭ găh man Hnam trưng tơ̆ dôm xăh sơlam đơ̆ng 2025–2026, dêh char Đắk Lắk đei Trung ương tơgŭm 389 ti hlak jên vă man 3 tŏ Hnam trưng teh đak rong tơ̆ dôm xăh sơlam Buôn Đôn, Ia Lốp păng Ia R’vê. Đơ̆ng rŏng vă jê̆ 3 khei tơlĕch jang, dôm anih jang man hlôi man đei 1/3 tơdrong jang. Anih vei lăng kon pơlei dêh char Đắk Lắk oei pơtho ăn anih tơlĕch jên man, anih ming man păng dôm tơring hơtŏk hrĕnh tơdrong jang, adrin jang đang păng pơjao, tơmât yoa hnam trưng adrol kơ khei 8 sơnăm ‘nâu.  

VOV.Bahnar - Đơ̆ng kơbăt dôm chăl 'nâu, 'long gao hlôi đei kơjăp hăm tơring teh chuơh tơ̆ thôn 7, xăh Hàm Thuận, dêh char Lâm Đồng. 'Nâu kŭm jing kơloăi 'long lăng ƀôh tơdrong tơplih 'lơ̆ng hơiă tơ̆ tơring teh âu, jing kơloăi 'long tơƀôh ăn đon adrin yak hlŏh pơmat tat đơ̆ng kon pơlei tơ̆ âu. Trong jang rong iĕr hơla 'long gao đơ̆ng Lê Văn Thuận, tơ̆ xăh Hàm Thuận, dêh char Lâm Đồng oei hơnhăk ba iŏk yoa tôch ‘lơ̆ng.

VOV.Bahnar - Đơ̆ng dôm pơgar chŭn ‘nhot jang hăm kơmăy kơmŏk ‘nao truh dôm trong jang jang doi, pơm tơlĕch tĕch mơdro, tơdrong jang pơjing tơring tơrang ‘nao hlôi păng tŏk bŏk pơm tơplih um ai tơring pơtăm ‘nhot Đơn Dương (apŭng Đơn Dương so), dêh char Lâm Đồng. Kon pơlei tơ̆ âu hlôi jing tơ ‘ngla choh jang tơm lơ̆m tơdrong atok tơiung, dar dĕh hơnhăk tơdrong choh jang xa mât lơ̆m trong jang pơm hơtŏk kơjă tơmam, hơtŏk iŏk yoa păng pơm ‘lơ̆ng ăn tơdrong arih xa.