Tơ̆ hop akŏm, bơngai tăh hla Gia Lai pơma truh lơ tơdrong găh tơlĕch jên pơm trong, vei sơđơ̆ng tơdrong arih xa tơpôl, trong pơm hla ar, tơdrong tơgŭm ăn kăn ƀô̆ tơ̆ tơring, tơgŭm ăn đe ngê̆ nhân păng dôm khul joh hơri hơxoang, tôn chĭng chêng. Bơngai tăh hla oei tơƀôh đon tơtăm truh tơdrong chĕp kơ̆l pơgơ̆r đơ̆ng khul kơdră tơ̆ xăh mưh đei pơjao dơ̆ng lơ hơnăp jang.

Pơma tơ̆ hop akŏm, Phŏ Kơdră Quốc hội Nguyễn Hồng Diên chih răk dôm nơ̆r pơma tơpăt ‘lơ̆ng, lăp hăm yăn âu đơ̆ng bơngai tăh hla; atŭm hăm ‘nŏh ăn tơbăt Khul kơdră teh đak hơnơ̆ng tơchĕng hơlen vă kăt tơjur ƀiơ̆ lơ hla ar athei pơm tơ̆ Trung ương vă pơjao ăn tơring pơm. Ƀok pơma hơdăh, xăh, phường jĭ khul jang jê̆ kon pơlei hlŏh kơna athei kơchăng bơ̆ jang mă ‘lơ̆ng, đei yoa hăm dôm tơdrong ƀơm truh kon pơlei.