But pajaih daok di palei Baoh Dana, baoh Bini saong hamu Craok di huyen Ninh Phuoc, tinh Ninh Thuan. Adat ngak kabao di angaok bimong ieu lac sa adat praong hu mbaok di dom ong Po adhia, ong Kadhar, amuk Pajau saong ong Camanei. Tukvak nagk adat rah tabiak tui danak yau dom adat Yuer Yang, Katé saong Cambur, dalam nan hu peih pambang bimong, menei rup patau yang, angui cuk khan ao ka Po, pok pandap alin saong adaoh ieu da-a po yang. Hadei adat peih angaok bimong, but pajaih padang adat payak di takai ceik mbuan hala.

Peih bruk ngak yang, dom urang halau daneng urang dalam gauk gar halan kan pok tagok po yang lakau chraong daong. Ong Camanei pandar ia dahlau thaik tagok patau yang Siva lakau peih bimong, ong Kadhar adaoh pling yang ba jalan Po Adhia ngak yang pok lak hala, patei baoh, tamang ndaih, baoh karaoh, lasei rik. Yang asal di nyu hu kabau am dak angaok papan di bimong.

Ong Kadhar kamaon ieu da-a saong adaoh paling pok meyaom dom phol dhar di dom Po yau ye Po Ina Nagar, Po Pan, Po Girai Bhaok, Po Bia Binân, Po Rame… Tuk adaoh tal po halei ye Po Adhia tuh alak da-a po yang mai tok adat. Ieu da-a tal Po Cei Tathun, amuk Pajau pok cambah alak pak baoh menuk piah ieu yang, sap kanyi uak tagok gam haong sap adaoh ngak ginreih dalam adat, ngak ka urang iek pah tangin tui ragam ragu.

Hadei banah adat angaok bimong, adat Payak patui veik hu ngak dalam sang drap di ala takai mbuan ceik hala hu rilo pandap ngak yang jang: tapei nung, patei, alak pak baoh menuk, lisei, ia bai saong ralaow kabao am caik anak sang ngak adat. Tuk ieu da-a po yang mai adat, thei thei jeng pok tangin kakuh langkar, brei mboh bruk praong glaong.

Amuk Đàng Thị Dụ, urang dalam but pajaih Cuah daok di palei Hamu Craok khan lac meng umo 15 thun amuk hu tui amaik ame nao iek yang sik sammalaih kabao saong tal ini amuk umo labaih 60 thun min yaok mbang peih adat amuk jeng hu mbaok. Tui amuk, ini lac adat meng kal biak ginreih, anek taco brei khik ramik saong pato rai hadei. Thun ini, ong Hán Đen (umo 71 thun) hu ruah ngak urang dang pok pandap duh Po – urang dang tabiak thik kabao. Piah ngak bruk ini, langiu di hu angan je, urang hu ruah ngak brei ngak adat thawbah piah pahacih sa-at than drei dahlau tuk duh Po.

Bruk padang peih adat ngak kabao sik kabao oh lac brei mboh hatai thau dhar phol bo daok daong ikak kajap hatai gul pataom dlaam but pajaih saong khik ramik dom adat bhap bini meng kal di urang bangsa Cam. Urak ini, tinh Ninh Thuan daok peih ngak Danak dak 6 ka bruk khik ramik dom yaom kaom ilamo siam gheih di bangsa pagam haong patagok jirah rivang, daok dalam Danak dak pakat negar patagok kinh te – xa hoi bhum mikva urang bangsa takik saong bhum ceik tukvak 2021–2030. Bruk ini khik tani tanat saong ngak dom adat yau ye sam malaih kabao lac brei mboh ka bruk siam gheih ka bruk pagam khik ramik ilamo saong patagok, daong pok meyaom ilamo bangsa, jhul tagok jirah rivang ilamo di bhum palei./.