Ong Võ Văn Bảo daok di palei 6, xa Lương Nghĩa, huyen Long Mỹ hu 1ha taneh daok di langiu ar pacang. Meng dahlau taneh ini pala hala hadei di nan klak pala mek hala tapa ngak padai min bilan padai He thu bhian gaok ia mbak njom tame, tal jaik yauk ye tal bilan hajan angin rilo nan bhian brei padai oh tani tanat, gaok mai lahik abih. Dua thun tapa ong salih tapa ngak sa bilan padai, sa bilan hadang, lac ngak bilan padai Dong xuan tuk hu halau ia taba rilo klak ngak padai He thu tuk pandiak bhang, njom ia mbak piah salih tapa raong hadang dom janih. Bruk salih phun pala, anek athur raong tui jalan “pambak tui langik” hu ba mai ka ong jien mek tame rilo jang dut haong meng dahlau biak rilo.

“Drei palao hadang sú ye chraong mek blaoh paje, daok hadang giraong hijao ye piah dalam nan 6 bilan blaoh drei mek tagok. Raong 2 thun blaoh mboh hu siam lagaih. Daok drei pala padai ye duh haatai tal mbang pruh jru, duh hatai ka bruk prai khak ini daih. Daok padai blaoh gaok bala meng langik blaoh nyu jaleih ye jeng lahik abih.”

Xa Lương Nghĩa, huyen Long Mỹ daok taphia kraong Ngan Dừa yaok thun tame bilan thu bhian njauk ia mbak meng ia tasik Pei. Yaom lac hadei ini hu ar pacang ia mbak min dom taneh langiu di ar pacang jeng gaok kan kandah trak. Rilo meng lac taneh ini pala hu janih phun tram, baoh li-u ia saong ngak padai Dong xuan dalam bilan hajan. Kayua yau nan meng thun 2023 bhum palei hu jak ba rahra di ini klak ngak padai He thu, phun karei tapa raong hadang. Ong Nguyễn Văn Ngọc – Phaok Akaok UB Bhap bini xa Lương Nghĩa brei thau:

“Hadei Tet Nguyen dan ye mek ia mbak ba tame pasiam taneh, pahacih ia. Drei brei palao hadang sú dahlau, mbiah labaih 2 bilan hadei di nan drei palao hadang thẻ, gam haong nan hadang giraong hijao brei palao sa mbang haong hadang sú. Ngan haong hadang giraong hijao ye tukvak masa cakrok dui atah labaih 6 bilan, nan dahlak raong pablak hadang sú saong hadang thẻ piah mek katut raong atah. Xa jeng cih jalan ka bhum langiu ar pacang, dalam nan hu ieu lac bhum taphia kraong Ngan Dừa brei pasiam taneh kan pala phun, taneh hala, taneh tràm, patui veik padang bruk raong pala hadang padai”.

Mboh bruk pala raong padai-hadang tukvak tapa brei jien mek tame rilo nan rahra daok di xa Lương Nghĩa hu taneh di langiu ar pacang hu ngak praong danao palao raong. Tapa kuhria iek veik di gah jabat karja di xa Lương Nghĩa, urak ini danao raong hadang langiu ar pacang ia mbak di bhum palei hu labaih 180ha, tagok labaih 40ha dut haong tukvak ini thun dahlau, Taphia bruk palao raong hadang thẻ takai patih, hadang sú saong hadang giraong hijao, mikva daok roh duah palao raong janih aring tasik. Ong Nguyễn Văn Khánh daok di puk palei 6, xa Lương Nghĩa, huyen Long Mỹ hu 5 cong taneh palao raong hadang, aring tasik brei thau:

“Dahlak hulin mboh aring tasik saong hadang giraong ini dahlak hulin mboh biak takre. Dahlak hulin blei 300 ribau jien aring tasik hu 1 ribau drei palao raong likau ka hu patuah blaoh puac mai jeng hu meteh kilo, nam rituh gram sa drei, bo aring tasik urak ini tagok 400 tal 500 ribau sa kilo aring kiak bhong nan. Meyah bruk drei khin buh jien tame pasiam ka nyu tal ye dahlak hulin mboh bruk aring ini hu siam lagaih, laba glaong rilo jang.”

Bruk raong hadang – pala padai hu maong lac jalan nao njauk lagaih, “pambak tame langik” saong ba mai siam lagaih kinh te glaong ka rahra langiu bhum ar pacang ia mbak di xa Lương Nghĩa, rilo meng lac hadang hu ba mai jien mek tame rilo tagok 2-3 mbang dut saong padai He thu. Huyen Long Mỹ daok jak ba mikva langiu ar pacang ngak bruk pala padai – raong hadang, papraong danao raong hadang “pambak tame langik” di huyen tagok labaih 500ha, pataom tame daok di xa Lương Nghĩa, Lương Tâm saong Xà Phiên.