Daok di puk palei 2, xa Bình Hòa Hưng, huyen Đức Huệ, Labik inem mek Katmang tinh Long An atah di labik tapen negar Mỏ vẹt – nagar Campuchia 3,5km di gah Pei. Ini lac labik meng kal hu rah tabiak mbang mesuh metiak saong lac pasak pato tacei ka bruk katmang di tinh Long An; labik inem mek di bruk ngak di dom kapul bol lin di labik Mớp Xanh dalam mbang mesuh metiak haong kol Prang saong labik Tinh uy Long An dalam mbang mesuh metiak haong kol Mỹ. Labik Mớp Xanh hu labik ngak bruk biak praong dalam nan hu 3 palei: Bình Thành, Bình Hòa, Thạnh Lợi, praong labaih 35km, atah 70km dui atah meng labik tapen negar Campuchia tal kraong Vàm Cỏ Đông.

Gam tui sajarah praong prang nan, di ini hu Mentri Ilamo, Pahat padhih saong Jirah rivang mbaoh tangin lac labik Inem mek sajarah pakat negar meng di thun 1998. Piah pato padar hatai anit ranam taneh ia nagar ka dom rairah sit thun umo, bilan 10/2004 labik Inem mek hu peih padang saong taong abih taneh jaik 105 ha, dalam nan hu taneh padang labaih 20 ha. Di bhum palei, dom danak dak pato hu bhian ngak, rilo meng lac di dom harei raya praong.

Ndang bo xa Bình Hòa Hưng hu padang meng di thun 1993 (neh tabiak meng xa Bình Thành), tapa dom tukvak, kein lagaih patagok di rahra dak harei dak hu paglaong tagok. Dalam nan lac, mikva urang ngak nong diuk rai meng bruk ngak padai saong dom janih phun kayau njam patam.

Ong Đoàn Văn Nước, daok di palei 4, xa Bình Hòa Hưng brei thau: Tabeh di ini lac taneh dhaong biar, pala padai oh hu kein laba, yaok thun tok brei ngak sa mbang, yuak hu rilo meng lac bilan Dong Xuan. Yaok ha taneh ngak bilan Dong Xuan bahrau mek tame hu yaok pluh trieu dong nan rahra salih tapa pala phun kruac aik. Urak ini baoh sang ong hu 4 ha phun kruac aik; yaok thun, ngan haong 1 ha, ong mek hu 100 trieu dong. Meng thun 2000 tal urak ini, hu ia taba, jalan mbak, radaih nao mai saong raidiuk di rahra dak harei dak patagok, pajeng ba ndap nda biak mbuan.

Yaok thun, raidiuk di mikva ngak nong hu tagok cambaih laih. Puac thun 2024, dom baoh sang rahra kathaot di xa trun biak rilo. Dalam bhum urak ini daok hu jaik 4% baoh sang rahra, dalam nan hu 13 baoh sang kathaot soang baoh sang jaik kathaot. Mikva rahra biak chreih, abih di nyu nan lac, jalan ngak di pakat angaok urak ini hu buh jien tame padang jalan kraong ribaong biak rilo; jalan mbak, kraong, ribaong jeng laneing lanoi. Dom jalan bhum atah bayah, karja palei jeng buh jien tame padang jalan đá xanh saong oto hu nduac tal labik tal dhua; kraong ribaong hu laneing lanoi piah duh ka rahra bhap bini ngak mbang.

Ong Nguyễn Tấn Đạt, Akaok UB Bhap bini xa Bình Hòa Hưng chreih chrai khan brei thau: “Raidiuk rahra patagok biak cambaih laih dut saong dom thun dahlau. Ini lac bruk biak uan tabuan. Dalam nan lac, hu hatai sangka di karja palei, mikva urang ngak nong patagok ngak mbang dalam baoh sang, daong patagok kinh te ka bhum palei. Kadung jien yaok thun mek hu njauk tui tanut pakat angaok jao".

Di angaok jalan meteh abap hadei harei yasa taneh ia lac sa beuk biak hadah mbaok meta di ndang bo, karja saong rahra xa Bình Hòa Hưng. Labik meng kal ieu lac bhum taneh mesuh metak biak rambah rambup, ini jeng sa bhum palei sron mbon, meda saong hu rilo caong takre uak drei tagok./.