Padang palei ngak nong bahrau paglaong dalam tuk palei daok oh kein lagaih, jalan mbak gom truac daok kurang, langik tasik oh lagaih, ngak nong oh hu tani tanat, xa Vĩnh Bình gaok biak rilo kan kandah. Langiu di nan, kayua labik atah di pasak huyen, bruk dui pachreih urang buh jien tame daok kan, ngak kan kandah tal bruk patagok kinh te – xa hoi bhum palei.

Min, meng hu bruk sangka, daong di dom pakat karja, dom gah, hatai kham merat di majam politit saong bruk sa hatai di rahra, xa dak harei dak yam tapa kan kandah, mek hu rilo jak jeng. Urang jakar hu makna ye chreih chrai, abih tung tian pato tacei; rahra ngak tui tani tanat dom danak dak pakacah, ba gauk padang palei pala.

Ong Nguyễn Việt Trung, Akaok UB Bhap bini xa Vĩnh Bình brei thau: Meng thun 2012 tal 2024, xa jak ba labaih jaik 138 ti dong duh ka bruk padang palei ngak nong bahrau. Danak dak pakat Negar ka bruk padang palei ngak nong bahrau oh lac sa janih brei hu daong salih mbaok meta palei pala blaoh nyu daok ngak brei salih siam hadah dalam jalan akaok sahneng, bruk ngak mbang di rahra. Meng di nan, urang chreih chrai sambai hu mbaok tame dom danak dak, mbang jak ba kayua bhum palei peih ngak. Ngan haong asal kadha “Karja saong rahra ba gauk ngak” xa jak ba siam lagaih dom gah piah duh ka bruk padang palei ngak nong bahrau yaom glaong.

Pagam saong bruk pasiam dalam bruk Ngak nong, xa peih ngak siam lagaih brei ka bruk ngak padai pandar ilamo jamraik ngak kong glaong; tui di nan, pasiam bruk ngak di HTX Ngak nong Vĩnh Bình, daong 3 kapul ngak bruk siam lagaih. Langiu di phun padai, rahra daok peih praong taneh pala njam patam gam saong labaih 410ha taneh, dalam nan hu tamekai saong njam patam karei, daong parilo jien mek tame dalam sang.

Langiu di bruk ngak nong, xa daok sangka iek praong bruk patagok gah ngak kong, bruk ngak di bhum palei gam saong 70 baoh sang pablei salih tani tanat; pambuak bruk peih 5 tal bac magru bruk ngak, bac pasram ilamo jamraik ky thuat pala drak ngak nong saong peih danak dak pakacah gauk ngak mbang, pablei salih naih joi dalam dom kapul. Tapa di nan, rilo baoh sang tut angan saong mek hu angan je mbaok mata yaok thun.

UB Bhap bini xa pataom peih ngak siam lagaih danak dak patrun kathaot karo kajap, sangka iek praong daong brei bruk ngak, pato pakai bruk ngak saong brei bruk ngak. Dom baoh sang kathaot, jaik kathaot hu mesraiy jien laba lap piah patagok bruk ngak mbang. Thun 2024, jien mek tame kuhria tui yaok urang hu jaik 73 trieu dong, baoh sang kathaot rilo gah trun daok 1,86%.

Tukvak tapa blaoh, UB Mat tran Negar Viet Nam xa Vĩnh Bình saong dom kapul chreih chrai pathau khan, jak ba rahra hu mbaok tame padang palei ngak nong bahrau meng rilo bruk cambaih laih, lagaih. Naih gheih abih dalam nan ieu lac Mbang jak ba “Grauk rahra gul pataom padang palei ngak nong bahrau, ndo thi ilamo” pagam saong dom asal kadha gah alam langik tasik, y te, patrun kathaot, daong ngak salah blaoh jalan mbak, gom truac, sang bac saong balai di palei pala ngak nong.

MT Negar Viet Nam saong dom kapul pambuak jhul khang danak dak “Grauk rahra gul pataom padang raidiuk hu ilamo”, jak ba rahra tut angan ka baoh sang hu ilamo, ngak siam adat hukum salamat jalan mbak, tuel hala dok Negar dalam dom harei raya, harei tet saong chreih chrai hu mbaok tame dom bruk ngak pahla, rahra xa hoi di bhum palei.

Rahra chreih chrai rik daong padang jalan mbak gom truac sang bac balai di palei pala. Langiu di nan, Mbang Jak ba Kadung jien “Ka urang kathaot” xa jak ba hu 14 trieu dong, hu taong abih 100% jalan ngak, taong abih kadung jien tagok 31 trieu dong, samu dil brei daong tapak ka 14 baoh sang jaik kathaot, baoh sang kan kandah.

Thun 2024, xa Vĩnh Bình tut angan daong ong Mai Văn Nỡ daok di palei 3 truh kathaot. Ong Nỡ khan brei thau: “Baoh sang dahlak hulin diuk meng bruk ngak pah, jien mek tame oh karo. Dom thun tapa, hu karja, kapul bhum palei sangka, daong alin ndap nda kaya, jien padai dalam harei raya, harei tet. Thun ini, hu xa daong tut angan patruh kathaot, dahlak hulin mboh biak bui sambai saong hu prein piah uak drei tagok dalam raidiuk”.

Ong Nguyễn Thành Trung, Akaok UB Mat tran Negar Viet Nam xa Vĩnh Bình – brei thau tuk raidiuk hu paglaong tagok ye mikva hu mbaok tame ginup dalam dom danak dak di bhum palei. Njauk ndom mayai ralo abih di nyu hu lac, rahra hu mbaok tame daong bao hiem y te, bao hiem xa hoi hu jaik 96%, tanut ba tabiak. Patui di nan, daong padang labik daok salamat, hacih sa-at, daong rahra hu pandar siam jang dom jitvu sangka rup pabhap prein yava”./.