Sa-ai kamei Pi Năng Thị R En, daok di xa Khánh Trung, huyen Khánh Vĩnh brei mboh cambaih laih ka bruk patruh kathaot di bhum mikva urang bangsa takik di tinh Khanh Hoa. Baoh sang sa-ai kamei meng dahlau daok dalam baoh sang taik tahak, yaok mbang hajan praong brei nao pandaok di labik karei. Meng sarak daong padang sang daok kajap, sa-ai R En urak ini hu labik daok karo kajap.

“Hu Karja daong sang kajap, oh daok bruk sang tanje hajan tarah. Baoh sang oh daok tapa sang amaik pandaok hajan hangin veik tra. Baoh sang dahlak hulin jeng mesraiy jien piah ngak sang hanjol drei. Hu mbang tui danak dak Karja brei bruk ngak, khol dahlak hulin kham merat raong glang saong pala rilo, hadei ini hu raidiuk tani tanat jang. Raong dua drei jeng 5 drei, jeng 10 drei.”

Tinh Khanh Hoa hu labaih 82.000 urang bangsa takik , rilo dalam nan hu bangsa Raglai, daok pataom gauk di 2 huyen Khánh Sơn saong Khánh Vĩnh. 4 thun tapa, tinh hu ba tabiak dom sarak karei brei ka dom bhum palei pandar kadung jien saong dom gah njauk hukum karei piah daong tapak ka 2 huyen Khánh Sơn saong Khánh Vĩnh.

Bahrau blaoh, 2 huyen bhum ceik Khánh Sơn saong Khánh Vĩnh hu akaok rajaei mbaoh tangin sarak brei patruh kathaot. Meng bruk caong maong, oh caga, rilo baoh sang rahra hu uak drei tagok, khang hatai salih phun pala, patagok bruk ngak mbang. Rilo bruk ngak nong huu co, ndap nda OCOP, bhum pala VietGap, bruk ngak var rõ, hop tac xa bahrau… daok dak harei dak hu padang saong peih praong. Ong Bùi Hoài Nam, Bi thu huyen Khánh Sơn brei thau: Tal ini, dom bhum palei bhum mikva urang bangsa takik dalam tinh hu jeng dom bhum pala drak yau ye: Bhum pala durian di tinh Khánh Sơn 2.900 ha.

 “Huyen Khánh Sơn patruh kathaot min dom bruk daong pala, patagok bruk ngak mbang tuk halei jeng hu sangka iek praong tui jalan ngak mbang karo kajap. Huyen Khánh Sơn daok salih meng phun ba mai takik jien tapa pajaih phun pala ba mai hu rilo jien, asar siam. Khol dahlak daok pamaong tal bruk hu baoh sang urang bangsa takik ginup meda dak harei dak rilo”.

Caik rilo gah lagaih buh jien tame patagok kinh te – xa hoi bhum mikva saong bhum ceik tukvak 2021 - 2025, tinh Khanh Hoa daok padang bhum ceik patagok siam mekre, karo kajap, ndung bak ilamo. Dom sarak, danak dak oh daong dua huyen bhum ceik patruh kathaot blaoh daok brei kein lagaih ka patagok suai atah, ngak jeng dom bhum daong prein bahrau, daong palagaih jalan ngak patagok taong abih dalam tinh Khanh Hoa tal thun 2030, meta maong tal thun 2045.

Ong Nghiêm Xuân Thành, Bi thu Tinh uy Khanh Hoa pandar dom huyen bhum ceik dalam tinh rabha dom gah buh jien tame hu makna, daong prein patagok kinh te – xa hoi bhum palei; pandar rilo abih dom kein lagaih piah bhum palei patagok./.