Ti Êa Sup, anôk lăn thu krô, yan adiê hlơr ngă lu lu ana pla mjing dleh pla leh anăn čăt đĭ, ƀiădah đa đa mjeh kram brei ƀuh klei djŏ guôp jăk êdi. Ƀuh klei găl anei, lu gŏ sang jhŏng mlih mơ̆ng ana pla mjing amâo mâo tŭ dưn jing pla ana kram. Aduôn Trần Thị Phượng, ti alŭ 5 jing sa hlăm dŭm gŏ sang nao êlâo. Ti ênhă êbeh 5 sao lăn êlâo dih pla kñŭl ƀiădah mboh ƀiă, giăm 5 thŭn anei hŏ sang ñu mlih jing pla ana kram. Čiăng mđĭ hĭn boh tŭ dưn, gŏ sang ñu lŏ duh bi liê kơ kdrăp krih aruăt êa bi mguôp hŏng pui kmlă pil yang hruê, dưi mkiêt mkriêm leh anăn čŏng krih êa. Ară anei, hŏng êbeh 500 phŭn kram dưi ba wĭt giăm 100 êklăk prăk kơ gŏ sang ñu.

“Mơ̆ng êlâo truh kơ ară anei ăt lông pla lu mta ana, ƀiădah truh kơ pla ana kram ƀuh boh tŭ dưn kyua pô dưi hrui hlăm kluôm thŭn leh anăn lăn tinei sah kba. Pô thâo pla ana kram ăt dưi mơh, čiăng êdi, ăt mâo prăk hrui wĭt grăp hruê kyuanăn pô ăt mâo hnư hrui wĭt hơĭt”.

Hluê si aduôn Đặng Thị Thanh Nhung, k’iăng khua Bruă sang čư̆ êa să Ea Sup, čar Dak Lak, ana kram mphŭn ba wĭt boh tŭ bruă duh mkra kơ đa đa gŏ sang, ƀiădah bruă mđĭ kyar ana pla mjing anei ti alŭ wăl ăt tuôm hŏng đa đa klei dleh kpăk. Ară anei, ênhă pla ana kram lu jing hliê điêt, ka dưi mkŏ mjing krĭng pla mjing prŏng. Klei anei ngă kơ bruă mkŏ klei mkra mjing, ba čhĭ leh anăn iêo jăk knơ̆ng bruă duh bi liê mkra mjing adôk tuôm hŏng lu klei dleh dlan.

Ƀiădah, hluê si ñu, lu mjeh kram mâo ai bi găl guôp hŏng yan adiê thu hlơr mơ̆ng alŭ wăl, ênưih pla, ênoh duh bi liê amâo mâo lu ôh leh anăn hrui mă djal, mâo hnư hrui wĭt jêñ jêñ. Anei jing mta phŭn găl guôp hŏng bruă mkra mjing leh anăn klei hdĭp mnuih ƀuôn sang krĭng lăn thu krô dleh dlan. Mơ̆ng boh sĭt anăn, să Ea Sup dôk tă hdră pŏk mlar ênhă pla kram mkŏ mjing krĭng pla mjing sa anôk, mbĭt anăn iêo mthưr knơ̆ng bruă hriê ksiêm dlăng, duh bui liê leh anăn ba čhĭ mnơ̆ng dhơ̆ng.

“Bruă sang čư̆ êa să mkŏ mjing leh dŭm hdră êlan leh anăn mâo klei hưn hmăng hmưi phung duh bi liê, iêo mthưr dŭm knơ̆ng bruă mơ̆ng anôk mkra hriê ti alŭ wăl să čiăng bi mguôp hŏng dŭm gŏ sang, mđĭ kyar ktang hĭn hŏng bruă pla kram.”

Amâo djŏ knŏng ba wĭt boh tŭ dưn, ana kram lŏ dưi bi klă mâo lu klei găl kơ wăl hdĭp mda, boh nik hlăm wưng klei mlih yan adiê ƀrư̆ hruê ƀrư̆ ktang phĭt. Ana kram čăt đĭ pral, đru krơ̆ng kơ lăn, gang mkhư̆ klei klưh hroh leh anăn ƀơ̆ng lu carbon. Hŏng hlăm brô 3.500ha kram ară anei, Dak Lak ăt dôk mâo lu klei găl čiăng mđĭ kyar bruă pla kram hluê êlan hơĭt kjăp tơdah dưi duh bi liê djŏ êlan, mơ̆ng krĭng pla mjing truh kơ ba yua hnơ̆ng čuăn kriê dlăng mbĭt. Hluê si Nguyễn Hoàng Tiệp, k’iăng khua anôk bruă tŭ yap kiă kriê dliê hơĭt kjăp, bruă ba yua dŭm ênoh čuăn hơĭt kjăp, boh nik jing klei tŭ yap FSC hŏng dliê kram đru mđĭ ênoh mnơ̆ng dhơ̆ng leh anăn pŏk mlar anôk mnia mblei.

“Knŭk kna mrâo leh hdră mtrŭn mrô 06 kơ êwa sang ală kĭng, hlăm anăn mâo klei čuăn kơ hdră pla dliê ăt msĕ mơh hlăm bruă pla kram, djŏ tuôm hŏng klei bi hrŏ êwa čhŏ. Kyuanăn, Dak Lak čiăng mâo klei mtô klă kơ mnuih ƀuôn sang hlăm hdră mnêč pla mjing grăp hruê čiăng bi hrŏ êwa čhŏ”.

Hluê si hdră tă mđĭ kyar bruă lŏ hma hơĭt kjăp, čar Dak Lak dôk pŏk mlar hdră tă hŏng ana kram, mta ana dưi lač mâo lu klei găl ti dŭm krĭng lăn thu krô. Đặng Thị Thuỷ, k’iăng khua knơ̆ng bruă lŏ hma leh anăn wăl hdĭp mda čar Dak Lak brei thâo, čiăng ba yua tŭ dưn klei găl anei, alŭ wăl srăng mâo dŭm hdră êlan kluôm, hrăm mbĭt mơ̆ng čuăl mkă krĭng pla mjing, mkŏ mjing klei mkra mjing êlam leh anăn ba čhĭ mnơ̆ng dhơ̆ng.

Čar srăng kñăm čuăl mkă krĭng pla mjing kram, mtrŭt mjhar knơ̆ng bruă, êpul hgŭm bruă duh bi liê mkra mjing nao mbĭt hŏng mkra mjing êlam, mbĭt anăn mtrŭt mđĭ klei bi mguôp hluê si boh tŭ. Hluê anăn mđĭ ênoh mnơ̆ng dhơ̆ng, mđĭ hnư hrui wĭt kơ mnuih ƀuôn sang.

Mơ̆ng gru hmô phŭn kčưm brei ƀuh boh tŭ dưn leh anăn êlan nao mrâo mơ̆ng Bruă sang čư̆ êa alŭ wăl, ana kram dôk ƀrư̆ ƀrư̆ brei ƀuh, anei amâodjŏ knŏng jing ana pla mjing găl guôp hŏng yan adiê amâo mâo jăk, ƀiădah lŏ jing êlan nao mrâo hlăm mđĭ kyar bruă duh mkra mtah ti Dak Lak. Êjai dưi mkŏ mjing, nao mbĭt hŏng bi mguôp mkra mjing êlam, ana kram amâodjŏ knŏng đru bi hơĭt hdră duh ƀơ̆ng kơ mnuih ƀuôn sang krĭng dleh dlan ƀiădah lo pŏk êlan mrâo mđĭ kyar hơĭt kjăp kơ bruă lŏ hma alŭ wăl hlăm wưng sui./.