Mơ̆ng mlan 6/2023, Anôk bruă răng mgang ana pla mjing – Phŭn bruă lŏ hma leh anăn mđĭ kyar krĭng ƀuôn sang, ară anei jing Phŭn bruă lŏ hma leh anăn wăl hdĭp mda bi mguôp hŏng Klei kƀĭn kphê tar rŏng lăn ngă klei bi klă klei hmăi mơ̆ng plă pluă hlăm đang kphê truh kơ mnơ̆ng ngă leh anăn mtrŭt mjhar klei ba yua êa drao răng mgang ana pla mjing mâo bruă đua klam čiăng mđĭ kyar bruă pla mjing kphê hơĭt kjăp ti dŭm čar Lăn Dap Kngư. Hlăm anăn, ksiêm duah, ktuê dlăng, mđĭ ai dưi kriê dlăng leh anăn gang mkhư̆ mnơ̆ng ngă kơ phung knuă druh leh anăn phung pla mjing kphê, mđĭ hĭn klei ksiêm dlăng kơ phung knuă druh bruă răng mgang ana pla mjing, mđĭ hĭn klei thâo săng leh anăn bruă klam răng mgang wăl hdĭp mda kơ dŭm anôk mkra mjing leh anăn čhĭ êa drao răng mgang ana pla mjing ti Lăn Dap Kngư.

Hluê si anôk bruă pla mjing leh anăn răng mgang ana pla mjing, klei bi hmô pla pluă kphê hŏng tiu, durian dôk mâo ƀĭng ngă lŏ hma dŭm čar Lăn Dap Kngư ba yua čiăng yua jih hnơ̆ng lăn leh anăn mđĭ hnư hrui wĭt. Klei bi hmô anei ba wĭt boh tŭ dưn klă klơ̆ng, bi hrŏ klei mnơ̆ng ngă leh anăn mđĭ hĭn klei lu jơr mnơ̆ng hdĭp. Ƀiădah ti lu alŭ wăl, ƀĭng ngă lŏ hma ăt dôk pla hjăn kphê ngă kơ ana pla mjing awăt ti anăp mnơ̆ng ngă. Bi hŏng klei pla pluă, lu ƀĭng ngă lŏ hma ka thâo yua êa drao răng mgang bi găl guôp. Nguyễn Quý Dương, k’iăng khua anôk bruă pla mjing leh anăn răng mgang ana pla mjing lač, boh klei anei čiăng hnưm mgaih msir čiăng mđĭ hnơ̆ng tŭ jăk mnơ̆ng dhơ̆ng:

“Ăt adôk mâo lu ƀĭng ngă lŏ hma ka thâo săng klă kơ bruă krih êa drao, boh nik êjai pla pluă sơnăn si srăng yua êa drao čiăng mâo boh tŭ dưn kriê dlăng klei mnơ̆ng ngă ƀiădah ăt rơ̆ng klei doh êbăt kơ ana pla mjing. Anei jing sa klei lông dlăng prŏng anăp anei srăng mgaih msir čiăng rơ̆ng kơ kphê đĭ kyar hơĭt kjăp”.

Klei ksiêm dlăng mơ̆ng anôk bruă răng mgang ana pla mjing ti 3 čar Kon Tum, Dak Lak leh anăn Lâm Đồng brei thâo, êa drao angre ăt mâo hnơ̆ng yua lu hlăm bruă kriê dlăng mnơ̆ng ngă, êjai anăn dŭm hdră êlan sinh học knŏng mrâo ba yua. Klei hŭi hyưt yua lu đei êa drao hlăm kphê, tiu, durian ăt jing klei uêñ mĭn čiăng dưi lŏ ksiêm dlăng kjăp hĭn.

Čiăng mgaih msir boh klei anei, Phạm Quang Trung, khua êpul bi ala Klei kƀĭn kphê tar rŏng lăn ti Việt Nam, ƀuăn lŏ dơ̆ng mbĭt hŏng dŭm anôk bruă djŏ tuôm hlăm lăn čar mkŏ mjing klei mtô hdră mnêč găl guôp hŏng dŭm hnơ̆ng čuăn tar rŏng lăn. Đru kơ kphê Lăn Dap Kngư ñŭ kma êlam, mđĭ ai dưi bi ktưn leh anăn đĭ myar hơĭt kjăp.

 “Čiăng mtô mjuăt leh anăn mđĭ klei thâo săng kơ mnuih ƀuôn sang drei srăng mâo dŭm klei bi klă, mâo klei ksiêm duah čiăng ba mdah dŭm hdră êlan hrô djŏ guôp hŏng wưng ară anei. Ksiêm dlăng, bi mrâo leh anăn mkra mluih dŭm hră mơar bi djŏ guôp hŏng dŭm klei čuăn mrâo. Hluê anăn, mkŏ mjing dŭm adŭ hriăm kơ ƀĭng ngă lŏ hma mâo dŭm klei hriăm mrâo, klei čuăn mrâo mơ̆ng tar rŏng lăn.