Ti să Ia Băng, čar Gia Lai, anôk mkŏ êlan êran pral Quy Nhơn – Pleiku, khădah dôk hlăm wưng mdei knăm mơak, ênai êdeh čuk, êdeh hli dôk kwang jih hruê mlam. Grăp êpul êdeh mdiăng mnơ̆ng bi pruê̆ ngă bruă čiăng msir mghaih anôk ala, mjing ai êwa ngă bruă hŏng klei mjêč. Trương Anh Đài, pô kiă kriê sa anôk bruă duh mkra dôk ngă kdrêč bruă tal 3, nao găn să Ia Băng brei thâo:

“Čiăng mtrŭt mđĭ hdră lehanăn hnêč ngă bruă hlăm yan bhang, anôk bruă hmei bi mklă ti anôk mâo lăn čiăng mkra, nao ngă tinăn, 3 ,4 êpul ngă bruă jih hruê mlam čiăng mtrŭt mđĭ klei hluê ngă; mđĭ klei ba nao maĭ mŏk, mđĭ ênoh mnuih mă bruă, čiăng pral dưi ngă êlâo kơ yan hjan.

Ktuê êlan êran pral Quy Nhơn – Pleiku hlăm brô 125 km, dưi kah mbha 3 kdrêč bruă. Hlăm anăn, kdrêč bruă tal 1 lehanăn tal 3 dưi ngă leh bruă msir mghaih anôk ala hlăm brô 65 – 67%. Anei ăt jing sa hlăm dŭm hdră bruă mâo wưng pŏk ngă pral êdi ti čar Gia Lai, kyua mâo klei sa ai mơ̆ng mnuih ƀuôn sang ti krĭng ngă bruă. Lu gŏ sang čŏng bi hgŭm, hnưm ba jao anôk ala mkăp kơ klei ngă bruă. Ayŏng Yôh, djuê ana Bahnar ti ƀuôn A Lao, să Lơ Pang, mâo lăn dôk hlăm klei ngă bruă brei thâo:

 “Gŏ sang kâo hluê ngă Hdră mtrŭn mơ̆ng Knŭk kna mkra êlan êran pral, mơ̆ng leh pŏk ngă mâo leh klei sa ai. Ênoh čiu hnô gŏ sang ăt tŭ ư mơh”.

Ti tluôn ai êwa ngă bruă mjêč hruê anei jing ktuê êlan lu thŭn mlan nao akâo mơ̆ng mnuih ƀuôn sang lehanăn phung bi ala čar Gia Lai. Dăl hlăm wưng sui, ktuê êlan mrô 19 jing sa ktuê êlan anei mkŏ Gia Lai hŏng Bình Định hđăp. Bruă găn êrô nao găn dŭm kčŭn čư̆ An Khê, Mang Yang ngă kơ mmông lehanăn ênoh bi liê bruă dŭ mdiăng, boh nik hŏng hdră lŏ hma, ti hnơ̆ng yuôm nanao. Nguyễn Hữu Thọ, ti să Đăk Đoa, čar Gia Lai brei thâo, mnuih ƀuôn sang alŭ wăl akâo lu blư̆ mkra êlan êran pral Ngŏ – Yŭ mkŏ Lăn da kngư hŏng krĭng hang ksĭ kwar krah, boh nik jing ktuê êlan  Pleiku – Quy Nhơn. Dŭm klei akâo anei mâo Êpul bi ala čar Gia Lai čih yap, ba mơĭt kơ Klei bi kƀĭn trông anôk bruă kƀĭn ala, knŭk kna lehanăn dŭm phŭn, dhar bruă.

  “Hdră êlan êran pral Quy Nhơn - Pleiku jing klei čiăng êdi mơ̆ng mnuih ƀuôn sang ti alŭ wăl mơ̆ng êlâo adih truh kơ ară anei. Mnuih buôn sang ăt ba mdah hŏng Êpul bi ala anôk bruă kƀĭn ala, wăt phung bi ala ti čar lehanăn gưl dlông, lač nanao kơ klei anei. Mơ̆ng 2 gưl bruă kƀĭn ala, 14 lehanăn 15, hưn mdah nanao klei anei hŏng bruă kƀĭn ala, knŭk kna, čiăng dưi hluê ngă klei ciăng mơ̆ng mnuih ƀuôn sang.

Mnuih ƀuôn sang lehanăn phung bi ala čar Gia Lai bi êdah klei mơak hlăk ktuê êlan êran pral Quy Nhơn – Pleiku dôk ƀrư̆ ƀrư̆ dưi hluê ngă leh lu thŭn mlan dôk čang guôn. Hdră anei dưi čang hmăng srăng đru ruh mtlaih klei dleh dlan hlăm klei găn êrô, mnia mblei sui hŏng anei jưh knang hlăm ktuê êlan mrô 19 hŏng lu êlan kčŭn čư̆, mơ̆ng anăn mjing klei găl kơ mnuih ƀuôn sang lehanăn anôk bruă duh mkra hlăm hdră mđĭ kyar bruă duh mkra. Amai Phạm Thị Thu, ti ƀuôn hgŭm Pleiku, kreh nao mă bruă ti Quy Nhơn, brei thâo:

 “Gŏ sang kâo kreh nao mă bruă ti Quy Nhơn, bruă găn êrô ktuê êlan ară anei suaĭ mơh, 4 -5mmông đĭ êdeh. Tơdah mâo êlan êran pral, kâo mơak êdi. Kâo dưi thâo, êlan êran pral anei srăng bi hrŏ mmông knŏng adôk mă 2 mmông đĭ êdeh nao đuič. Snăn, hŏng mnuih mă bruă msĕ hmei gơ̆ dul ƀiă mơh hruê ai, prăk kăk grăp blư̆ nao mă bruă.

Hdră êlan êran pral Quy Nhơn – Pleiku amâo djŏ knŏng jing sa hdră êlan klông phŭn mơ̆ng čar Gia Lai, ƀiădah lŏ brei ƀuh klă klei čang hmăng djŏ klă mơ̆ng mnuih ƀuôn sang mâo nanao klei mđing hmư̆, tŭ mă. Dŭm boh tŭ anei amâo djŏ knŏng đru msir mghaih dŭm bruă mâo ti alŭ wăl ƀiădah lŏ mjing tur knơ̆ng čiăng kơ Êpul bi ala bruă kƀĭn ala čar Gia Lai lŏ dơ̆ng mđĭ lar bruă klam hlăm wưng ti anăp. Châu Ngọc Tuấn, Kơiăng khua bruă Đảng čar, Khua êpul bi ala bruă kƀĭn ala čar Gia Lai, brei thâo

“Hmei thâo săng klă bruă đua klam mơ̆ng Êpul bi ala bruă kƀĭn ala čar, bruă anei hĭn mơh dưi mđĭ lar. Êpul bi ala bruă kƀĭn ala čar Gia Lai dŭm gưl kơ anăp srăng lŏ čuê, bi leh jăk bruă klam mơ̆ng sa čô bi ala kơ mnuih ƀuôn sang, đru mguôp mkŏ mkra Việt Nam, hlăm anăn mâo Gia Lai mđĭ kyar pral, hơĭt kjăp lehanăn jiă knhuah gru dhar kreh”.

Hdră êlan êran pral Quy Nhơn – Pleiku dưi pŏk ngă mjêč ti čar Gia Lai jing sa klei bi êdah klă kơ dŭm klei čang hmăng mơ̆ng mnuih ƀuôn sang dưi mđing hmư̆ lehanăn ƀrư̆ ƀrư̆ hluê ngă bi sĭt dŭm hdră mtrŭn, jing leh bruă ngă klă klơ̆ng. Mơ̆ng anăn, đru mguôp mjing boh kdrŭt đĭ kyar mrâo kơ kluôm krĭng Lăn dap kngư lehanăn ktuê hang kdĭ kwar Krah./.