Tui si hdră dăp buă sang čư̆ êa gưl čar thŭn 2025, kluôm ala srăng mâo 34 boh čar, 6 ƀuôn prŏng dôk hlăm gưl dlông, lehanăn 28 boh čar. Ênoh jih jang mnuih mă bruă mâo dăp jing êbeh 447 êbâo čô mnuih, ênoh jih jang anôk mă bruă jing êbeh 38 êbâo anôk, lŏ dơ̆ng djă yua 34 êbâo anôk, êbeh truh 4 êbâo anôk mă bruă. 

Trông čhai hlăm êpul kơ bruă anei, phung bi ala bi tŭ ư hŏng hdră dăp dŭm boh čar, ƀuôn prŏng hlăm gưl dlông thŭn 2025 lehanăn dưi ƀuh, jih bruă dăp anôk mă bruă anei mâo knŭk kna mtrŭn djŏ hŏng klei kiă kriê, tă êlan mơ̆ng dŭm gưl mâo klei dưi. Pô bi ala Dương Khắc Mai, êpul mơ̆ng Dak Nông lač, klei bi mŭt čar jing leh bruă kơ hƀuê ênuk. Jing leh klei bi mŭt mbĭt, si hdră dŭm alŭ wăl srăng tiŏ nao mnuih mă bruă, lehanăn mghaih msir anôk mă bruă jing êbeh anăn:

“Klei yuôm bhăn hĭn jing leh klei bi mŭt mbĭt drei dưi krơ̆ng ênoh mnuih mă bruă mâo klei thâo hĭn. Tal dua, kơ anôk mă bruă brei kiă kriê kjăp, lehanăn amâo mâo lui lĕ hlăm klei jhat rai ôh, bi mâo hĕ hdră êlan ba yua bi djŏ dŭm anôk bruă anăn”.

 Tui si pô bi ala Trần Hoàng Ngân, êpul ƀuôn prŏng HCM, klei bi mŭt čar, srăng đru dŭm alŭ wăl mkŏ wĭt anôk mă bruă. Tui si ñu, čiăng kơ dŭm boh čar, ƀuôn prŏng dưn yua jăk tŭ jing bruă knuă leh bi mŭt, snăn:

“Si srăng ngă čiăng kơ djăp alŭ wăl hlăm čar bi sa hnơ̆ng klei mă bruă, rơ̆ng kơ jih jang bruă nah gŭ amâo mâo djŏ knŏng kơ sang pưk êlan klông ƀiădah hlăm djăp mta. Jing čiăng bi mâo mnuih lehanăn klei thâo mă bruă, lehanăn wăt ngăn prăk . Kyuanăn kâo hmăng hmưi ksiêm dlăng bi nik kơ klei bhiăn, lehanăn ngăn prăk mơ̆ng knŭk kna, lehanăn klei kơ lăn ala wưng 5 thŭn 2016-2030 si srăng mjing klei găl kơ čar, ƀuôn prŏng mâo klei găl duh bi liê kơ bruă anăn”.

 K’iăng khua knŭk kna Nguyễn Hòa Bình lač, bruă dăp wĭt bruă sang čư̆ êa gưl čar tal anei jing sa klei bi mlih prŏng kơ bruă mkŏ mjing êpul mă bruă lehanăn dăp mnuih mă bruă. Mta kñăm jing mkŏ mkra bruă nah gŭ, mjing anôk kơ klei mđĭ kyar djăp klei ktang, bi mguôp krĭng kwar, wăt čư̆ čhiăng lehanăn êa ksĭ. Tui si tĭng hrue 30/6, jih jang djăp alŭ wăl srăng bi êdah, lehanăn hrue mơ̆ng hrue 1/7, êpul mă bruă mrâo mơ̆ng bruă sang čư̆ êa alŭ wăl dua gưl klă klơ̆ng dơ̆ng mă bruă.

Bi tui si Khua phŭn bruă kiă kriê bruă knuă Phạm Thị Thanh Trà, bruă dăp wĭt brei mâo klei bi mkă tĭng hŏng klei kjăp, mơ̆ng lu tĭng dơ̆ng mơ̆ng ênhă čŏng mâo, kơ ênoh mnuih lehanăn kơ hƀuê ênuk, dhar kreh, djuê ana, klei đăo, hnơ̆ng kơ klei mđĭ kyar lehanăn klei mĭn ai tiê hlăm yang ƀuôn:

“Dăp wĭt bruă sang čư̆ êa gưl čar tui si klei jing mơ̆ng alŭ wăl anăp đuĕ nao phă êa ksĭ, dưn yua jih klei găl mơ̆ng êa ksĭ lehanăn klei găl kơ bruă ñŭ kma. Phŭn bruă kđi čar, êpul khua kiă kriê gưl dlông, boh nik jing knŭk kna mprăp bi jăk djăp klei găl  pioh kơ dŭm alŭ wăl ngă klei dăp wĭt, bi mŭt mbĭt, hlue ngă jih jang bruă djŏ hŏng hdră mkŏ mjing alŭ wăl kơ dua gưl”.

 Snăn bruă dăp wĭt bruă sang čư̆ êa gưl čar tal anei jing leh knhuang yuôm bhăn bi khuăt êpul mă bruă, ba yua mnuih mă bruă hŏng klei tŭ dưn, pŏk phai kơ anôk mđĭ kyar, mjing klei găl kơ alŭ wăl mđĭ kyar. Hŏng klei prăp êmiêt kjăp mơ̆ng gưl dlông hlŏng kơ nah gŭ, klei bi sa ai mơ̆ng djăp gưl dŭm knơ̆ng dhar bruă, lehanăn jih jang mnuih ƀuôn sang, klei bi mŭt mbĭt anôk bruă sang čư̆ êa gưl čar thŭn 2025 srăng mjing klei jăk găl mrâo kơ lăn čar, djŏ guôp hŏng klei mđĭ kyar kjăp, lehanăn ñu kma lar ƀar hlăm ênuk gưl mrâo./.