Leh giăm 10 thŭn hlue ngă, hdră mtrŭn mrô 42/2012 lehanăn hdră mtrŭn mrô 64/2015 mâo đu leh kơ giăm 570.000 gưl čô mnuih mă bruă jing mnuih djuê ƀiă, hŏng ênoh prăk jih jang êbeh 1.270 êklai prăk. Jih jang hdră êlan anei mâo đru bi hơĭt leh bruă knuă mă, mđĭ klei hdĭp mnuih mă bruă, lehanăn đru mđĭ kyar klei duh mkra ala ƀuôn hlăm alŭ wăl dôk găn klei dleh dlan.

Khădah êjai mă bruă dôk tuôm hŏng lu klei ka djŏ, đơ knua dưn yua adôk điêt knŏng mrâo mil 13/25 alŭ wăl mâo klei đru, ênoh đru ƀiă dhiă, lehanăn bhiâo mơh, klei ngă hră mơar dôk mtŭk mtŭl, ngă kơ phung duh mkra dleh dlan hlăm bruă knuă, hdră êlan ka dưi kluôm ôh hlăm djăp mta bruă msĕ si bruă mkra mjing boh mnga. Êjai klei duh mkra mnia mblei hlăk hlê dôk bi mlih prŏng, snăn bruă bi mlih dua hdră mtrŭn lač anăn jing năng ngă mtam yơh.

Ti anôk trông čhai, phung bi ala mâo leh klei blŭ lač kơ bruă bi leh hdră êlan hlue djŏ hŏng klei klă mngač, lehanăn ênưih mă bruă hĭn. Lương Thị Oanh, Khua êpul hgŭm bruă lŏ hma Ea Wy (kdriêk Ea H’leo,čar Daklak) lač, Êpul hgŭm bruă dôk mâo klei hrŏng ruah mnuih mă bruă, lehanăn mjuăt bi hriăm lu mnuih mă bruă jing mnuih djuê ƀiă. Siăm dah, hnơ̆ng đru anei dôk ƀiă đei, bruă mkŏ mjing dŭm adŭ mjuăt bi hriăm ka djŏ guôp ôh, dôk dleh dưi iêo jak mnuih mă bruă. Hdră êlan bi mlih brei mđing hĭn kơ klei mnuih djuê ƀiă jing mnuih mă bruă. Oanh akâo:

 “Sa gưl mjuăt bi hriăm dưi đru mơ̆ng 5 - 7 êklăk prăk, ƀiădah dah lui sui truh 3 mlan srăng hmăi amâo mâo jăk kơ hnơ̆ng hrui wĭt, kơ klei hdĭp mnuih mă bruă  – jing leh pô knơ̆ng hlăm gŏ sang. Kâo akâo mkŏ mjing klei mtô bi hriăm bruă ti alŭ wăl, giăm anôk hdĭp mda lehanăn mă bruă, čiăng kơ mnuih mă bruă hriăm êjai lehanăn mă bruă êjai”.

Huỳnh Thị Liên Hoa, klam ngă bruă hlăm klei mbha anôk – Anôk bruă čuăl mkă kơ bruă lŏ hma (Hlăm phŭn bruă lŏ hma lehanăn wăl hdĭp mda) brei thâo, hdră êlan ară anei adôk lu hră mơar, ngă kơ phung duh mkra tuôm hŏng lu klei dleh dlan:

 “Brei bi klă hlei jing mnuih djuê ƀiă mơh snăn bŏ hŏng klei dleh dlan. Klei anei amâo mâo ƀuh čih ôh hlăm kak, snăn phung duh mkra lŏ bi mklă lehanăn lŏ mbŏ hlăm hră mơar mnuih mă bruă. Êjai hlăm bruă bi mlih hdră êlan mă bruă, čiăng bi pral hĭn hlăm djăp mta, lehanăn rơ̆ng ăt dưi kiă kriê kjăp. Hŏng klei bi mlih mrô ară anei, tơdah anôk bruă kiă kriê mđrăm mbĭt bi mă bruă sa hnơ̆ng čhĭn dah dưi đru kơ phung duh mkra hŏng klei tŭ dưn”.

 Lu phung bi ala ăt akâo pŏk mlar phung dưi dưn păn kjăp alŭ wăl dưi đru truh hlăm să, čiăng bi djŏ hĭn, lehanăn hdră êlan anăn brei ngă bi mđrăm hŏng djăp klei bhiăn, hdră êlan mđĭ kyar krĭng ƀuôn sang mkăn. Mbĭt hŏng anăn, lŏ bi mbŏ dŭm êoh čuăn čiăng ba yua mnuih mă bruă tŭ dưn hĭn leh mâo klei đru, mtrŭt bruă bi mguôp plah wah phung duh mkra hŏng êpul hgŭm bruă lehanăn bruă sang čư̆ êa alŭ wăl, rơ̆ng kơ jih jang bruă dưi kjăp hlăm klei duh bi liê mđĭ kyar krĭng mnuih djuê ƀiă.

Klei trông čhai dưi yap jing bruă yuôm bhăn, kñăm čiăng bi leh jih jang bruă dôk čih mkra mlih mrâo hdră mtrŭn mrô 42/2012 lehanăn hdră mtrŭn mrô 64/2015 pioh lŏ ba mdah kơ khua knŭk kna ksiêm dlăng hlăm wưng tinăp. Mta kñăm truh kơ bruă mkŏ mjing hdră êlan djŏ jăk nao hlăm klei thâo bi khăp, klă mngač, mđrăm hlăm jih jang, lehanăn kjăp nanao đru kơ phung duh mkra êngao knŭk kna kơ klei ba yua mnuih mă bruă jing mnuih djuê ƀiă lehanăn krĭng čư̆ čhiăng hlăm ênuk mlih mrâo. Lê Đức Thịnh – Khua anôk bruă duh mkra êpul hgŭm bruă lehanăn mđĭ kyar krĭng ƀuôn sang lač:

 “Hmei dôk ksiêm duah, lehanăn kăp kčĕ čiăng dưi mâo sa hdră êlan đru kluôm, dưi hlue ngă djŏ hŏng klei bhiăn mă bruă sa ƀăng bhă, kñăm bi sĭt hdră êlan đru kơ mnuih djuê ƀiă, đru kơ phung duh mkra êpul bruă duh mkra, dưi mâo ênoh đru hŏng klei djŏ hĭn”./.