Mơ̆ng akŏ thŭn truh ară anei, Dak Lak mâo 9 čô mâo klei ruă Covid-19, ti 5 kdriêk leh anăn ƀuôn prŏng Ƀuôn Ama Thuôt. Jih jang phung mâo klei ruă ti hnơ̆ng hdjul sơăi. Ƀiădah hŏng lu klei hâo hưn kơ klei lŏ mâo klei ruă tưp Covid-19 ti đa đa alŭ wăl, bruă mdrao mgŭn Dak Lak pral gĭt gai dŭm anôk bruă mđĭ klei ksiêm dlăng kjăp boh klei ruă tưp.

Lê Phúc, K’iăng Khua Anôk bruă ksiêm dlăng klei ruă (CDC) Dak Lak brei thâo, anôk bruă bi hgŭm leh hŏng Anôk bruă ksiêm dlăng klei ruă tưp Lăn Dap Kngư čiăng mblang kơ klei huĭ, boh klei leh anăn pŏk ngă hdră msir gang mkhư̆ klei ruă bi djŏ guôp. Mbĭt anăn, Anôk bruă ăt mkŏ mjing klei hriăm mjuăt klei thâo kơ êpul mdrao mgŭn kơ bruă ktuê dlăng thâo ƀuh hnưm phung djŏ Covid-19, ksiêm dlăng leh anăn msir mgaih anôk mâo klei ruă tưp hlue si hdră.

 “Hmei kčĕ hră mơar mtô bi hriăm kơ klei thâo ăt msĕ mơh kčĕ kjơ Knơ̆ng bruă čiăng gĭt gai dŭm anôk bruă gang mkhư̆, sang êa drao, boh nik kơ sang êa drao snăn mđĭ hdră kčah hrui mă leh anăn mprăp kơ bruă ngă djŏ kơ boh klei Covid-19 tơdah klei ruă đĭ. Đa đa anôk mdrao mgŭn ăt pŏk ngă dŭm anôk bi ktlah hjăn, mđĭ kriê dlăng bi kdơ̆ng tưp lar hlăm sang êa drao. Dŭm anôk bruă gang mkhư̆ snăn mđĭ klei ksiêm dlăng phung ruă, msir mgaih dŭm anôk mâo klei ruă”.

 Pral mdrơ̆ng hŏng boh klei ruă tưp Covid-19, Knơ̆ng bruă mdrao mgŭn čar Kon Tum bi hgŭm hŏng dŭm anôk bruă djŏ tuôm mđĭ bruă hâo hưn mtô mblang, mtrŭt mjhar mnuih ƀuôn sang ngă jăk hdră msir grăp čô đru gang mkhư̆ klei ruă  Covid-19. Ksiêm dlăng, rơ̆ng bruă nah tluôn, kdrăp mnơ̆ng, êa drao, kdrăp mnơ̆ng, mnuih mă bruă ngă djŏ klei čiăng gang mkhư̆ klei ruă tưp. Mbĭt anăn, bruă mdrao mgŭn čar Kon Tum ăt pral ksiêm dlăng kjăp boh klei ruă tưp, mđĭ klei pŏk ngă dŭm hdră msir, mkhư̆ klei ruă tưp ti dŭm anôk bruă mdrao mgŭn, êpul êya leh anăn ƀăng jang knông lăn Bờ Y. Bi hgŭm kjăp hŏng Anôk bruă ksiêm dlăng klei ruă tưp Lăn dap Kngư mblang kơ boh klei leh anăn ksiêm dlăng kơ klei kčĕ, pŏk ngă dŭm hdră msỉ, gang mkhŭ djŏ guôp. Aê mdrao Đỗ Ngọc Hòa,  K’iăng Khua Knŏng bruă mdrao mgŭn čar Kon Tum, brei thâo:

 “Hmei ăt mtă kơ dŭm knơ̆ng bruă, anôk bruă hlăm čar, Knơ̆ng bruă sang čư̆ êa dŭm kdriêk, ƀuôn prŏng mđĭ kleigang mkhư̆ klei ruă tưp Covid-19 ti dŭm anôk hiu čhưn ênguê, hlăp mbŭl. Mbĭt anăn mđĭ bruă mtô kơ mnuih ƀuôn sang ngă dŭm hdră gang mkhư̆ klei ruă tưp. Tơdah drei ƀuh klei bi knăl êngoh, mtŭk, dleh bi êa snăn nao mtam ti anôk mdrao mgŭn giăm hĭn čiăng ksiêm mkă, hmao ktuê dlăng leh anăn msir mgaih.”

 Hŏng bruă tlŏ vaccine COVID-19, hlue si K’iăng Khua Knơ̆ng bruă mdrao mgŭn čar Kon Tum, ară anei ênoh tlŏ aruăt vaccin klă klơ̆ng hlăm ênoh mnuih ƀuôn sang ti čar mâo hlăm brô 83%. Aê mdrao Đỗ Ngọc Hòa hưn brei răng, tơdah mnuih ƀuôn sang čiăng tlŏ vaccine COVID-19, nao ti anôk mdrao mgŭn giăm hĭn čih anăn. Mơ̆ng anăn, bruă mdrao mmgŭn srăng ksiêm dlăng, akâo kơ Anôk bruă ksiêm dlăng klei ruă tưp Lăn Dap Kngư mkăp vaccin tlŏ kơ mnuih ƀuôn sang. Mơ̆ng akŏ thŭn 2025 truh ară anei, ti čar Kon Tum ka mâo ôh mnuih djŏ COVID-19.

Knơ̆ng bruă mdrao mgŭn Lâm Đồng gĭt gai dŭm anôk bruă ksiêm mkă, mdrao klei ruă ti alŭ wăl mđĭ bruă ksiêm mkă, hmao ƀuh, mdrao phung djŏ Covid-19. Ksiêm dlăng leh anăn hưn hdră kčah jum, mdrao kơ phung djŏ Covid-19 ti anôk bruă hlue si klei đăo knăl kơ boh klei ruă tưp, amâo brei mâo boh klei mdrơ̆ng kƀah klei mprăp ôh. Mprăp kdrăp mnơ̆ng, wăl bi ktlah hjăn, kdrăp mdrao mgŭn čiăng mkŏ mjing klei bi kƀĭn, bi ktlah hjăn, ksiêm mkă, mdrao kơ mnuih ruă, rơ̆ng êđăp ênang kơ phung hlăm êpul huĭ srăng ênưih mâo klei ruă anei (msĕ si mniê ba tian, phung mâo klei ruă êlâo, ruă kjham, phung khua thŭn…), wăl kơrŭ wĭt klei suaih pral, phung mâo klei ruă kboh, ruă boh ƀleh,  bliah… Ngă jăk dŭm hdră msir gang mkhư̆ klei ruă tưp, rơ̆ng bruă ksiêm dlăng kơ kman klei ruă, boh nik klei tưp klei ruă hlăm êlan bi êwa, mkhư̆ jih hnơ̆ng klei tưp klei ruă hlăm anôk ksiêm mkă, mdrao mgŭn. Mđĭ bruă bi doh hlăm anôk mdrao, dăp anôk mdrao găl ênưih, djŏ guôp hŏng boh klei ruă tưp leh anăn rơ̆ng wăl hdĭp mfa mta, doh, siam.

 Knơ̆ng bruă mdrao mgŭn Lâm Đồng gĭt gai Anôk ksiêm dlăng klei ruă čar ngă anôk phŭn mđĭ klei ksiêm dlăng, ktuê dlăng bruă hlue ngă hdră msir gang mkhư̆ klei ruă tưp ti dŭm anôk mdrao mgŭn ti čar. Ktuê dlăng, hưn hdră kčah, mprăp bi jăk, djăp mnuih mă bruă, rơ̆ng kdrăp mnơ̆ng mdrao mgŭn, êa drao duuh kơ bruă gang mkhư̆ klei ruă tưp, kñăm pral ngă djŏ klei čiăng kơ djăp boh klei ruă tưp, amâo dưi ngă ngơi mang ôh hlăm klei thâo săng leh anăn bruă ngă, brei pŏk ngă bi jăk bruă klam thơ̆ng.