Knhal jih hruê kăm ti Sang bi kƀĭn ƀuôn O Ngol, să ia Vê, kdriêk Čư̆ Prŏng (čar Gia Lai) bŏ hŏng klei blŭ tlao mbĭt hŏng ênai čing kwang. Anăn jing mông mtô klei tông čĭng leh anăn ênhiang mmuñ Jarai, hŏng klei nao hgŭm mơ̆ng lu mnuih ƀuôn sang leh anăn phung thâo mbruă, khua mduôn hlăm să. Jing pô mkŏ mjing êpul phung mniê hlăm ƀuôn O Ngol nao hgŭm mbĭt kriê pioh dhar kreh djuê ana, amai Siu H’Biao yăl dliê:

 “Ênhiang mmuñ Jarai ăt mâo đa đa klei mmuñ bi mni kơ phung jhŏng ktang hlăm ênuk bi blah. Msĕ si klei mmuñ Ơ amiêt, Awa, klei mmuñ Hơ̆k kdơ̆k – hơ̆k mơak hruê mtlaih êngiê” dŭm klei mmuñ bi mni kơ ai tiê krŭ kdơ̆ng mơ̆ng aê ama êlâo dih. Boh nik, dŭm klei mmuñ hŏng ênhiang mâo phung khua mduôn mmuñ bi mni kơ Awa Hồ gĭt gai cách mạng. Bruă anei ară anei amâo lŏ dleh msĕ hŏng êlâo ôh, mơ̆ng hruê mâo đĭng blŭ thâo mĭn, pô thâo yua ñu jing tŭ dưn êdi hlăm bruă knuă. Sitôhmô mkŏ mjing êpul hgŭm, êjai mâo klei hưn leh anăn bi trông bruă knuă jing găl êdi”.

Mduôn Siu Jo ktưn hưn: O Ngol jing ƀuôn krŭ kdơ̆ng, mnuih ƀuôn sang bi mguôp, đăo knang kơ klei gĭt gai mơ̆ng Đảng. Êbeh 10 thŭn êgao, O Ngol mâo nanao jing ƀuôn dhar kreh gưl čar. Hlăm anăn êdah êdi jing bruă kriê pioh leh anăn mđĭ kyar dhar kreh knhuah gru. Mduôn Siu Jo brei thâo:

 “Kâo ƀuh hơ̆k mơak êdi kyua mâo phung mda asei lŏ hriăm tông čĭng leh anăn djă pioh knhuah gru dhar kreh djuê ana pô. Bi ƀuôn O Ngol mâo 3 êpul tông čing hlăm dŭm ênuk thŭn: Êpul êdam êran, êpul hđeh êdam ngiêk leh anăn êpul phung khua thŭn… Mâo wăt pô thâo mbruă Ama Nga leh anăn khua ƀuôn ăt tông čing mbĭt hŏng ayŏng adei. Kâo pô amâo lŏ rŭng răng ôh, kyua mâo leh êpul tông čing mda asei, êdei dih dah mduôn khua, kyua čing jing yuôm bhăn sơnăk hlăm klei hdĭp msĕ si klei djiê ƀrŭ, lui msat leh anăn dŭm knăm mơak hlăm ƀuôn čiăng kơ čing sơăi”.

Ƀuôn O Ngol mâo giăm 120 gŏ sang, hŏng giăm 500 čô, lu jing mnuih Jarai. Ƀuôn djăp hnơ̆ng čuăn krĭng ƀuôn sang mrâo mơ̆ng 7 thŭn êlâo. Mnuih ƀuôn sang mâo nanao klei bi mguôp mkŏ mjing klei hdĭp trei mđao, yâo mơak. Boh nik, bruă rơ̆ng kơ dŭm dŭm mta bruă dhar kreh msĕ si čĭng čhar, rang mdang kdrăp pĕ tông djuê ana, kdŏ čhuang, klei mmuñ ênhiang jing klei čiăng amâo dưi kƀah hlăm klei hdĭp mơ̆ng mnuih Jarai. Hŏng Siu Huỳnh – khua ƀuôn O Ngol, klei mmuñ ênhiang leh anăn tông čing jiă kma leh hlăm kđeh êrah.

 “Yang ƀuôn ƀrư̆ hruê ƀrư̆ đĭ kyar mrâo mrang, srăng tui tiŏ ênuk gưl, ƀiădah kâo pô ăt gĭr hriăm mmuñ, dŭm klei mmuñ knhuah gru cách mạng hŏng klei Jarai. Hŏng bruă klam jing khua ƀuôn, kâo mâo nanao klei mĭn si srăng ngă čiăng bi djăp bruă knuă, bruă klam dưi jao. Kâo nao êlâo bi hmô, hdĭp năng djŏ čiăng kơ mnuih ƀuôn sang ƀuh leh anăn bi gĭr, pô srăng ngă bruă jăk, djŏ hdră bhiăn kơh lač mnuih ƀuôn sang hmư̆ leh anăn hluê ngă. Boh tŭ dưn dưi mâo mơ̆ng akŏ wưng păn bruă truh kơ ară anei, ƀuôn hmei ya dŏ mă nao êlâo sơăi, boh nik hlăm bruă mkŏ mkra krĭng ƀuôn sang mrâo”.

Siu Khlo, khua dlăng bruă đảng să Ia Vê, kdriêk Čư̆ Prông brei thâo: hluê ngă asăp mtrŭn mrô 12 mơ̆ng Êpul khua bruă đảng čar Gia Lai kơ bruă mkŏ mkra krĭng ƀuôn sang mrâo hlăm krĭng mnuih djiê ƀiă, mơ̆ng knhal jih thŭn 2018, ƀuôn O Ngol dưi djăp hnơ̆ng čuăn, leh anăn jing sa hlăm dŭm ƀuôn krĭng ƀuôn sang mrâo êdah êdi mơ̆ng čar.

Ƀuôn O Ngol hdră êlan êlan knŭk kna leh anăn mnuih ƀuôn sang ngă hrăm mbĭt, mnuih ƀuôn sang bi pŏk êlan doh siam. Dua nah êlan mâo pui mtrang kyua anăn amâo mâo klei tlĕ dăp, klei amâo mâo jăk. Sang pưk doh khuăt, war sang mâo mnư̆ mnang, mâo pruê̆ kyâo mtah, hlăm lam jing đang kphê, tiu… Ară anei lu gŏ sang mâo sang dôk kjăp, blei mnơ̆ng yua mă bruă knuă msĕ si êdah kai, êdeh đĭ mrâo. Boh nik ƀuôn mâo sang bi kƀĭn ƀuôn, mâo êpul tông čing leh anăn dŭm kdrăp pĕ tông djuê ana msĕ si đĭng gông, brô̆ Tơrưng. Phung thâo mbruă mlih ênai čing leh anăn mnuih ƀuôn sang thâo mpŭ leh anăn kriê pioh dhar kreh djuê ana pô”.

Ƀuôn O Ngol, să Ia Vê, kdriêk Čư̆ Prŏng, čar Gia Lai hruê anei jing gru hmô kơ ƀuôn krĭng ƀuôn sang mrâo hlăm krĭng mnuih djuê ƀiă. Gru mngač hlăm bruă kriê pioh dhar kreh djuê ana hlăm ênuk mrâo mrang. Hŏng klei nao hgŭm mơ̆ng bruă kđi čar, bruă klam bi hmô mơ̆ng phung khua mduôn, phung mâo kơhưm leh anăn klei lŏ čuê mơ̆ng phung mda asei đru djă pioh knhuah gru dhar kreh djuê ana, mbĭt anăn mtrŭt mđĭ bruă mkŏ mkra krĭng ƀuôn sang mrâo hŏng êlan hơĭt kjăp, mrâo mrang leh anăn knhuah gru.