Êpul hgŭm bruă ƀuôn Phung mâo mkŏ mjing hlăm klei čŏng čiăng, mơ̆ng lu phung amai adei mnuih Jarai tinăn. Êpul hgŭm mâo anôk bruă, lehanăn anôk rang mdah mnơ̆ng pô mâo ti sang pô mbruă Rơ Lan Pel, Khua êpul hgŭm, phung mŭt hlăm êpul hgŭm dưi mñam ti sang pô, amâodah ti anôk mkŏ mjing êpul hgŭm.   Đưk, khua ƀuôn Phung, brei thâo:

"Bruă pơ̆k mñam mơ̆ng aê aduôn pô đưm, lŏ mtô kơ čô anak pô ară anei. Phung amai adei mniê mkŏ mjing êpul hgŭm ti ƀuôn Phung pioh hưn mdah kơ bruă knuă mâo leh mơ̆ng aê aduôn pô đưm. Hlăm êpul hgŭm mâo truh 23 čô amai adei bi mguôp. Digơ̆ lŏ mtô bi hriăm kơ hđeh gưl mrâo, mâo truh 10 čô hđeh dôk tui hriăm. Phung amai adei mñam mơiêng ao, abăn… đêč giêng jing bruă ngă hŏng kngan brei mâo klei kreh kruiñ mdjĕ, bi thâo dêč grua grua bi siam. Grăp hrue kăm, phung amai adei bi êmuh hriăm hdơ̆ng găp ti sang khua êpul, mnơ̆ng leh mâo mñam hŏng gru grua siam mâo čhĭ hŏng ênoh 500.000 prăk, dah siam hĭn čhĭ truh 2.000.000 prăk."

Tui hlue hŏng ya mta mnơ̆ng mñam snăn hrue mlan dôk mñam čiăng bi leh ăt mdê mdê mơh. Tăp năng 1 hrue kăm, dua hrue kăm… mâo đa đa truh 1 mlan kơh dưi leh sa mta mnơ̆ng. Mnơ̆ng mñăm điêt amâo mâo dah prŏng, hŏng lu gru grua mdê mdê. Amai Ngân, mnuih hlăm êpul pơ̆k mñam ƀuôn Phung, brei thâo:

"Êpul hgŭm bruă pơ̆k mñam ƀuôn Phung truăn bruă mñam msĕ si mơiêng ao abăn, kpin, kdô čhiăm… hŏng gru grua djăp djuê ana mdê mdê. Djuê ana Ê Đê, Bahnar, Jarai gru grua đuĕ nao giăm čiăng msĕ. Djuê ana Jarai mdê hŏng djuê ana Bahnar ƀiă đuič, mnuih djuê ana Jrai mnâo lu kdruêh gru hĭn. Kyua ka mâo hưn mdah lu ôh snăn mnơ̆ng mơ̆ng êpul hgŭm mñam lu jing knŏng čhĭ hlăm ƀuô, hlăm čar Gia Lai đuič. Tue mơ̆ng ala tač êngao msĕ si Mi, Canada, India mâo mơh hriê blei mnơ̆ng hlăm ƀuôn. Lehanăn tue mơ̆ng ƀuôn prŏng Hồ Chí Minh ăty hriê blei truh tinei mơh”.

Hlăm klei dôk mñam, kdrêč đêč mnga yơh jing dleh hĭn. Đêč mnga hlăm mnơ̆ng dôk mñam mâo lu gru đêč, rup lat, mta dhar, … jih jang grăp mta rup čiăng lač kơ klei jing mdê mdê , dôk đêč bi djŏ bi siam, čiăng lač kơ klei hdĭp mơ̆ng dŭm djuê ana. Sa čô mnuih hlăm êpul hgŭm ƀuôn Phung, lač:

"Dêč mnga jing bruă dleh. Mkra kơ kdrăp mniê ƀar hơô jing dleh hĭn, đêč mnga kơ êkei."

Amâo mâo djŏ knŏng thâo mñam, ƀiădah bi kriê pioh, snăn êpul hgŭm bruă ti ƀuôn Phung lŏ bi mguôp hŏng hiu čhưn ênguê alŭ wăl. Hlăm adŭ rang mdah mnơ̆ng pơ̆k mñam ƀuôn Phung mâo kdrăp pioh kơ bruă mnăm giêng. Tơdah truh kơ anei hiu dlăng, phung tue mâo phung mbruă hlăm klei pơ̆k mñam hưn mdah kơ knhuah bhiăn, kơ dhar kreh djuê ana Jarai, hưn mthâo kơ bruă pơ̆k mñam hlăm ƀuôn, lehanăn mâo klei ktrâo atăt lông ngă, lông mñam hŏng phung tue nao dlăng.

Amai Rơ Lan Han, anak mniê pô mbruă Rơ Lan Pel, Khua êpul hgŭm bruă pơ̆k mñam ƀuôn Phung, jing mnuih hưn mdah hŏng klei Yuăn, klei Angle lehanăn klei Jarai grăp blư̆ mâo tue truh hŏng ƀuôn Phung. Khădah bruă pơ̆k mñam ti ƀuôn anei ăt knŏng jing bruă ti mmông hnêč, ƀiădah mâo đru mđĭ leh ênoh ba wĭt kơ mnuih mŭt hlăm êpul hgŭm bruă pơ̆k mñam ƀuôn Phung. Amai Rơ Lan Han brei thâo:

"Phung mniê Jarai bi thâo bruă đêč giêng, kyuadah anăn jing bruă mơ̆ng aê aduôn pô đưm. Bruă phŭn mơ̆ng amai adei ăt jing bruă pưk hma, bi bruă pơ̆k mñam knŏng mă ti mmông wăn. Êjai hrue amai adei nao kơ hma, truh mmăt pioh mmông dôk mñam, lŏ gĭr mă bruă čiăng mâo mnơ̆ng čhĭ duah prăk kăk. Ară anei, bruă pơ̆k mñam mjing leh lu klei găl kơ amai adei dưi mâo prăk rông anah aneh mđĭ kyar klei hdĭp. Êpul hgŭm čhĭ jih jang mnơ̆ng amai adei mñam hŏng êlan hla pŏk yang ƀuôn, facebook, tiktok… Mnuih blei dah khăp kơ mnơ̆ng, snăn akâo blei hlăm hla pŏk. Kah knar 1 mta mnơ̆ng hlăm sa hrue kăm, bi hŏng mnơ̆ng mâo lu gru grua dleh hĭn snăn dôk đêč mnga sui hĭn tăp năng dua hrue kăm, amâodah 1 mlan”.

Phung amai adei hlăm êpul hgŭm bruă pơ̆k mñam ƀuôn Phung jih ai tiê ksiêm hriăm, lŏ bi mlih gru grua mnga đêč. Mơ̆ng anăn mơh mnơ̆ng leh mñam mâo lu mta, ƀrư̆ hrue ƀrư̆ djŏ hŏng klei phung blei yua čiăng. Êpul hgŭm bruă ƀrư̆ ƀrư̆ jing leh anôk mngač hlăm bruă mđĭ kyar klei duh mkra ala ƀuôn krĭng ƀuôn sang ti ƀuôn prŏng Pleiku, čar Gia Lai.