Nao êbeh 30 km êlan gudrŏng găn đang ksu kphê mơ̆ng êlan dơ̆ng prŏng mrô 19 truh kơ ƀuôn hgŭm Đak Sơ Mei, klei hmei bi kngăr êdi jing klei jăk siam mơ̆ng ƀuôn sang. Weh nao čuă ƀuôn dhar kreh Đe Gôh, tlă ti anăp pô anăn jing êlan bê-tông doh siam. Dua nah êlan dŭn boh sang mrâo mdơ̆ng jăk siam. Jih jang dŭm gŏ sang tloh blei leh sơăi tivi, êdeh p’phŭt, êdeh kai... Pioh mă bruă knuă, klei hdĭp ai tiê, lehanăn mnơ̆ng dhơ̆ng mđĭ hĭn. Khua mduôn A Điêu, hŏng klei mơak hưn ƀuôn sang ară anei mâo êbeh 100ha kphê leh mboh, mâo lu gŏ sang dưi mâo ênoh ba wĭt grăp thŭn êbeh êklai prăk, msĕ si gŏ sang Châp,  A,  Hơ...

“Kyua mâo knŭk kna đru, ktrâo atăt hdră pla kphê, ngă lŏ, čhĭ mnia boh mnga pô pla mjing mâo ênoh. Ƀuôn sang pô mâo leh klei bi mlih lu, pưk sang jăk siam hĭn, mâo êdeh kai pioh nao kơ hma, duh ƀơ̆ng ƀrư̆ hrue ƀrư̆ hơĭt hĭn. Mnuih ƀuôn sang bŏ hŏng klei mơak, thâo hdơr knga kơ Đảng lehanăn knŭk kna ba hriê klei hdĭp trei mđao msĕ si ară anei.”

Ti ƀuôn Tŭl Doa (ƀuôn pô jhŏng ktang Wừu), Jit, Khua ƀuôn Tŭl Doa, lač:

 “Hlăm klei mă bruă knuă, mnuih ƀuôn sang bi hriăm êmuh hdră pla mjing kphê snăn mâo ba wĭt lu hĭn. Thŭn dih, ƀuôn mâo êbeh 80 gŏ sang ƀun, truh kơ ară anei adôk hlăm brô 40 gŏ êsei ƀun. Klei hdĭp mda mnuih đĭ hĭn, boh nik kphê čhĭ mâo ênoh. Anak čô mâo knŭkkna rŭ mdơ̆ng brei sang hră., nai mtô truh hlăm pưk sang mtrŭt phung hđeh nao sang hră djăp ênŭm.”

Pưk sang êlan klông jăk siam, klei hdĭp mnuih ƀuôn sang knư̆ hrue knư̆ đĭ kyar, jing klei bi klă kơ klei Đảng lehanăn knŭk kna đru hŏng mnuih ƀuôn sang hlăm krĭng phŭn krŭ kdơ̆ng mphŭn dô. Wăt ti ƀuôn dôk hlăm klei dleh dlan Kon Jôt (ƀuôn hgŭm Hà Đông hđăp) kbưi hŏng krah ƀuôn hgŭm êbeh 30 km, khădah ka mdrŏng ôh, ƀiădah amâo lŏ mâo ôh gŏ sang dôk hlăm klei ư êpa hlăm hrue giăm wiă. Tơh, mnuih ƀuôn Kon Jôt, brei thâo, mnuih ƀuôn sang jih ai tiê bi hriăm êmuh, ba yua klei kreh knhâo hlăm bruă rông mnơ̆ng, pla mjing... Klei hdĭp mâo leh klei bi mlih:

“Êlâo dih mnuih ƀuôn sang hlăm ƀuôn knŏng mưng ngă hma hang, pla hbei ƀlang, snăn klei hdĭp lĕ nanao hlăm klei dleh dlan, kƀah djăp mta mnơ̆ng. Ară anei, mâo knŭk kna đru êmô mjeh, bê lehanăn pla ana acasi... Mnuih ƀuôn sang lŏ mâo klei găl hĭn mđĭ kyar klei hdĭp mda.”

Ƀuôn hgŭm Đak Sơ Mei mâo 10 boh ƀuôn, giăm 15.000 čô mnuih, hlăm anăn mâo êbeh  87% mnuih ƀuôn sang jing mnuih djuê ƀiă. Mbĭt hŏng klei duh bi liê bruă nah gŭ, bruă sang čư̆ êa alŭ wăl mguôp hŏng dŭm bruă mơ̆ng knŭk kna pioh đru kơ mnuih ƀuôn sang mđĭ kyar klei duah ƀơ̆ng, klei hdĭp mda đĭ kyar amâo mâo mdei. Truh ară anei mâo leh êbeh 2000 ha kphê, ksu, tiu... Dŭm gưl dhar bruă kreh mkŏ mjing nanao adŭ mjuăt bi hriăm klei kreh knhâo hlăm bruă rông mnơ̆ng, pla mjing, đru hbâo prue, đru mjeh mnơ̆ng pla kơ mnuih ƀuôn sang.  Đinh Ơng, Khua knơ̆ng bruă sang čư̆ êa ƀuôn hgŭm Đak SơMei, brei thâo:

 “Ƀuôn hgŭm Đắk Sơ Mei lu jing mnuih ƀuôn sang djuê ana  Bahnar, Jarai… Truh êbeh 87% ênoh mnuih. Mbĭt hŏng klei knŭk kna mđing duh bi liê, wưng tinăp ƀuôn hgŭm srăng lŏ dơ̆ng mtrŭt mjhar mnuih ƀuôn sang duh ƀơ̆ng, mđĭ kyar klei duh mkra čiăng kơ mnuih ƀuôn sang knư̆ hrue knư̆ trei mđao, bi mlih hĭn.”

Klei bi mlih anăn ti ƀuôn pô jhŏng ktang Wừu knư̆ hrue knư̆ klă mngač hĭn, jing leh boh tŭ dưn mơ̆ng klei thâo gĭr hgao klei dleh dlan, jing leh klei đăo knang kjă mơ̆ng mnuih ƀuôn sang hŏng Đảng lehanăn knŭk kna. Anei jing klei bi knăl klă mngač kơ klei mđing uêñ, klei duh bi liê djŏ hdră êlan mơ̆ng Đảng, knŭk kna hlăm krĭng lăn dap kngư mđiă hŏng angĭn. Mnuih ƀuôn sang djăp djuê ana lŏ hyuă kjăp hĭn klei bi mguôp, mđrăm mbĭt rŭ mdơ̆ng krĭng phŭn krŭ kdơ̆ng mdrŏng sah đĭ kyar./.