Kờp jơh khà nac lòt nhơl tàm lơgar geh mờr 80 tơlak dơ̆, gơguh rlau 8%. Kờp jơh priă lơh geh bơh lòt nhơl kờp dŭ geh mờr 520 rbô tơmàn đong. Tàm pơrjum pờ tơlik tơn tàm internet lam lơh kơnòl broă tờm bơh gah Lòt nhơl dê, ồng Nguyễn Văn Hùng, Ƀộ trưởng Ƀộ Niam chài, Tàp pràn să jan mờ Lòt nhơl tơlik ală kơnòl broă mùl màl tàm tŭ tơngai gùt lơgar neh lơh gơs broă rơndap sap sèng wơl nhàr ù tiah mờ lam lơh gơnoar atbồ ƀòn lơgar 2 kâp. Ƀộ trưởng sồr ală càr mhar kờp sền, geh broă rơndap lơh bơcri priă  lơh anih tus lòt nhơl. Ờ mìng kơnờm tàm Rơndap ù tiah lòt nhơl Việt Nam neh yal, ală càr pal yal, bơ tơl rơndap ù tiah jat bơta pa, mờ kung đal git loh bơta pràn he dê, geh broă rơndap lơh lơh broă bal, tơrbŏ bal ù tiah nàng lơh gơlik ală phan lòt nhơl geh bơta niam.