Sa blah pataih khan bai lanh cih bingu hala meng raling caong khin hu tapa 2 tukvak: Cih bingu hala saong njaom jam. Pandap panda piah ngak nyu hu lac: glak pasei sit, talam cih, pataih khan bai lanh, raling, ia jam. Khan bai bhian hu jhik pet meng talei phun lanh, hadei di tuk bhoh cih blaoh ngak ka nyu tapak tui jalan ngak lang nyu tagok mbaok kapal saong vuot meng greng pabui glai.

Mbut talam cih kalin angak pataih khan bai hu ngak meng mbaik gai krem, akaok nan lac dom mbaik ban sit hu kieng vin saong janar. Kalin hu cuh ghang ka nyu nduac saong patui khik jeng aia luac vaktu drei cih vak. Hadei di tuk cih blaoh, khan bai hu ba tame tuk brei ka tal kalin hu tapok tabiak abih, hadei di nan brei njaom jam blaoh ba pambu dom mbang pandiak piah hu blah khan bai pataih lanh siam gheih.

Kalin jalko hu dua janih: Sambo ban kanjik nan ieu lac kayua meng raling meda, sambo juk nan lac kalin taha; Ia jalko tuk mek abih aia, kalin nyu brei cuh pandiak tabiak aia blaoh ba 2 janih ini srau pamaluk saong gauk. Tuk cih vak in tagok khan bai, kalin jalko tuk nan njauk cuh di apui pandiak meng 70 - 80 độ C piah raling oh thu. Mbut talam brei cih nyu meng gai krem atau gai atah meng 7 - 10cm, akaok mbut talam hu nẹp tame mbaik gai krem ngak meng 3 hala ban thaik binguk klau mata, akaok mbut talam lapih jang halei ye bingu hala siam gheih jang nan saong mbuan mbuan si cih.

Tuk cih, urang cih caik blah pataih khan bai tagok sa mbaik kapal tapak njuoh, sa akaok caik binah hu cih blaoh, sa akaok taluak pataih khan bai piah cih tui, cih tal halei taluak tal nan. Tuk cih ye tuk halei jeng daok tapen ghing apui, tut akaok mbut talam tame glaih kalin caik angaok ghing apui blaoh radeic radeic cih bingula tui hatai caong khin di drei di angak blah pataih khan bai gam saong dom janih bingu hala, brei mboh ka hatai caong khin hu trei sil, haniem phol selamat.

Cih bingu hala blaoh, blah khan bai hu brei ba tame glah aia pandiak daok ju, bleik nao bleik mai piah ka raling jalko nyu tapok tabiak abih, nyu ndong dom janih bingu hala siam gheih angaok blah pataih khan bai. Hadei di nan, khan bai hu njaom jam saong ba pabu thu piah patui ngak veik dom kadha ngak karei piah jeng pandap panda.

Dom janih bingu la angaok blah pataih khan bai jeng hu makna brei mboh ka hatai caong khin saong hatai takre siam gheih di bhap bani urang bangsa Mong. “Ilamo pandar kalin piah cih bingula angaok pataih khan bai” di bhap bani bangsa Mong ieu lac dom inem krung ndung bak asal ilamo; brei mboh ka bruk saneng duah, ilamu seni jeng yau halau gha, ilamo daok dang ndom mayai di urang bangsa Mong dalam talei pambuak bruk di anek manuac saong anek manuac, di anek manuac saong langik tasik taneh riya dunya./.