Klei mlih mrâo hdră êlan kiă kriê, ksiêm kjăp mnơ̆ng kơ bruă dlăng kriê wiê ênăk mnơ̆ng pla mjing, lehanăn hyuă kjăp bruă bi hgŭm, dưi yap jing hdră êlan jăk hĭn ruh mgaih jih klei dleh dlan, anăp truh kơ klei mđĭ kyar kjăp bruă pla mjing boh durian, sa mta mnơ̆ng pla mâo ênoh. Anei jing klei phung bi ala mâo bi êdah ti anôk bi kƀĭn online mkŏ mjing hrue mbruê ti Hà Nội, mâo klei hgŭm mơ̆ng phung bi ala dŭm knơ̆ng dhar bruă, êpul hgŭm bruă djam mtam boh kroh Việt Nam, phung thơ̆ng kơ bruă lŏ hma, phung duh mkra mnia mblei hŏng ala tač êngao, lehanăn phung pla mjing boh durian ti dŭm anôk mkŏ jing Cần Thơ, Daklak lehanăn Tiền Giang. Phung bi ala lač, boh durian jing leh sa hlăm dŭm mta mnơ̆ng, đru prŏng êdi hlăm klei bi mnia mblei hŏng ala tač êngao mơ̆ng Việt Nam. Ƀiădah mbĭt hŏng dŭm klei găl prŏng, snăn kăn ƀiă rei klei lông dlăng tinăp.

Brei hlue ngă kjăp hĭn klei bhiăn bi mnia mblei djŏ tuôm hŏng hnơ̆ng jăk boh mnga, thâo bĭt klă phŭn agha, mrô knăl krĭng pla mjing, kƀah klei bi hgŭm mơ̆ng phŭn hlŏng kơ êdŭk, kƀah klei kăp ksiêm, ênưih lĕ hlăm klei hluăt ƀơ̆ng mnơ̆ng ngă, klei bi mlih yan adiê, knŏng djŏ tuôm hjăn sa anôk kăp hrui blei, anei yơh jing bruă čiăng mghaih msir. Tui si phung thơ̆ng kơ bruă, bi mâo hĕ hdră mghaih msir hŏng klei kjăp lehanăn pral, mâo klei kiă kriê kjăp. mơ̆ng bruă pla mjing, truh mkra mjing lehanăn čhĭ mnia, mjing klei găl kơ phung pla mjing mâo anôk čhĭ mnia kjăp./.