Ti gŭ adiê mđiă ktang ti krăn lŏ alŭ Mỹ Xuân 1, să Hoà Thịnh, ayŏng Nguyễn Hải Triều mbĭt hŏng 3 čô dôk mgăt êdeh wiă mdiê, wiă 5 sao mdiê ksă. Ayŏng Triều lŏ wĭt hdơr, gưl êa lêč ka tuôm mâo hlăk mlan 11/2025 đung jih leh jih jnang ngăn drăp leh anăn mjeh mdiê kơ wưng buh pla yan puih mnga. Leh lŏ mkra lăn, gŏ sang ñu mâo klei đru 30kg mjeh mdiê, 50 kg hbâo pruê čiăng lŏ wĭt mă bruă. Leh êbeh 3 mlan rah pla, kriê dlăng, 5 sào lŏ ară anei truh leh hruê wiă.

“Sang kâo mâo 5 sào lŏ, rah mjeh BĐR999 leh anăn Đài Thơm. Mdiê thŭn anei đĭ hlăm brô 20% mkă hŏng wưng êlâo. Jing mâo hlăm brô 400kg hlăm sa sao. Wiă mdiê đa đa pô pioh huă, bi adôk čhĭ tla prăk hbâo pruê, êa drao leh anăn mưn phung mă bruă.”

Ti kdrăn lŏ Hòa Tân Đông, ƀuôn hgŭm Đông Hoà, Trần Văn Hữu mbĭt hŏng dua čô anak dôk mjêč wiă giăm 1ha mdiê ksă. Yan puih mnga thŭn anei, kyua yan adiê mâo klei găl leh anăn kriê dlăng jăk, mdiê mâo lu hĭn êdi. Hữu brei thâo:

“Yan adiê thŭn anei găl, boh mnga mâo, đăo tĭng mâo hlăm brô 300 - 350 kg hlăm sa sào, đĭ hlăm brô 20% mkă hŏng wưng êlâo. Sang kâo sa ha ăt mâo mơ̆ng 3,3 - 3,5 tôn mdiê. Gŏ sang hŏwk mơak êdi”.

 Nguyễn Thanh Minh – Khua êpul hgŭm bruă lŏ hma  Hòa Đồng (să Hòa Thịnh) brei thâo, leh gưl êa lêč mlan 1/2025, lu gŏ sang tŭ klei hmăi kjham leh mdiê mjeh leh anăn hbâo pruê êa đung jih, hmăi kjham kơ wưng buh pla yan puih mnga. Hluê ngă klei gĭt gai mơ̆ng Bruă sang čư̆ êa čar Dak Lak leh anăn klei đru mơ̆ng phung mâo ai tiê kmah, Êpul hgum bruă hmao mkăp bêi 126 tôn mjeh mdiê hnơ̆ng jăk, mbĭt anăn ngă klei bi hriăm hdră mnêč kơ mnuih ƀuôn sang. Kyuanăn, yan buh pla thŭn anei mâo mdiê lu ƀiă, Êpul hgŭm bruă ăt čŏng mkŏ klei ba čhĭ, đru bi hơĭt anôk ba čhĭ kơ mnuih ƀuôn sang.

          Akŏ wưng buh pla, Êpul hgŭm bruă bi mguôp hŏng anôk bruă pla mjing leh anăn răng mgang ana pla mjing čar Dak Lak mkŏ mjing adŭ mtô kơ mnuih ƀuôn sang kơ hdră mnêč gang mkhư̆ klei mnơ̆ng ngă, mtô kriê dlăng brei mâo boh tŭ dưn hĭn. Ară anei, Êpul hgum bruă lŏ dơ̆ng bi mguôp hŏng êpul mtrŭt mđĭ bruă lŏ hma să, adŭ bruă duh mkra să leh anăn bi mguôp hŏng 7 knơ̆ng bruă čiăng hrui blei mdiê. Bi hŏng wưng kơ anăp, Êpul hgŭm bruă srăng bi mguôp hŏng Bruă sang čư̆ êa să Hòa Thịnh  mkŏ mjing hdră êlan lŏ dơ̆ng đru kơ ƀĭng ngă lŏ hma hluê si hdră mtrŭn mrô 112/2024/NĐ-CP.”

Yan puih mnga 2025 - 2026, să Hoà Thịnh leh anăn ƀuôn hgŭm Đông Hòa buh pla giăm 4 êbâo ha mdiê. Kyua mâo mjeh mdỉê đru leh anăn sa kdrêč hbâo pruê, mnuih ƀuôn sang pral dưi krŭ wĭt bruă mkra mjing. Mdiê čăt đĭ siam, đăo tĭng mâo 300 - 400 kg/sao. Ti anăp klei yan adiê dleh ksiêm dlăng, dŭm alŭ wăl ăt čŏng hluê ngă dŭm hdră êlan wiă mdiê ưm. Huỳnh Mỹ Phong, khua Bruă sang čư̆ êa ƀuôn hgŭm Đông Hòa, čar Dak lak brei thâo:

“Čiăng rơ̆ng klei tŭ dưn kơ yan puih mnga thŭn anei, hluê ngă hdră êlan mta sang hĭn kơ djŏk hlăm hma, Bruă sang čư̆ êa ƀuôn hgŭm gĭt gai dŭm êpul hgŭm bruă ngă hdră hrui wiă mdiê kơ mnuih ƀuôn sang êjai mdiê ksă mâo 85 - 90%, bi hrŏ jih hnơ̆ng mdiê luh, êbuh, čăt hlăm lŏ”.

Mơ̆ng dŭm kdrăn lŏ êa lêč, boh mdiê kñĭ lŏ wĭt mâo ti dŭm să nah Ngŏ Dak Lak, amâo djŏ knŏng ba mbĭt klei mâo boh mnga ƀiădah lŏ bi klă ai bi kdơ̆ng leh anăn klei krŭ wĭt mơ̆ng ƀĭng ngă lŏ hma. Klei nao hgŭm mơ̆ng Bruă sang čư̆ êa, Êpul hgŭm bruă leh anăn dŭm đru bruă mkŏ mjing leh klei găl kjăp čiăng kơ mnuih ƀuôn sang găn klei dleh dlan mâo sa yan buh pla hơuh mđao.