Ti 5 să knông lăn mâo: Bờ Y, Ia Tơi, Ia Đal, Đăk Long leh anăn Đăk Plô, čar Quảng Ngãi, dŭm hdră bruă sang hră knŭk kna rông ba mlir gưl sa – gưl dua dưi rŭ mdơ̆ng mơ̆ng mlan 3/2026.  Anei amâo djŏ knŏng jing knhuang đĭ kyar hlăm klei bi liê kơ anôk bruă sang hră nah gŭ ôh, ƀiădah lŏ đru mjing tur knơ̆ng đĭ kyar sui kơ krĭng knông lăn, krĭng mnuih djuê ƀiă nah Yŭ Quảng Ngãi.

Ti să Bờ Y, sa boh sang hră prŏng siam, djăp ênŭm mnơ̆ng dhơ̆ng jing klei čang hmăng phung nai mtô leh anăn hđeh sang hră lu thŭn êgao. Nai mtô Võ Thị Tuyên,  nai Sang hră gưl sa leh anăn gưl dua Đắk Xú, să  Bờ Y čang hmăng hdră bruă dưi pŏk ngă djŏ hnơ̆ng.

 “Ară anei mâo đảng leh anăn knŭk kna mđing uêñ rŭ mdơ̆ng sang hră mlir gưl, klă sĭt srăng mâo sa boh sang hră prŏng leh anăn siam. Mơ̆ng anăn srăng mjing klei găl kơ nai leh anăn hđeh sang hră ngă jăk bruă mtô leh anăn hriăm. Phung hđeh sang hră ăt srăng mâo klei găl hriăm hlăm sang hră mrâo mrang.”

Ară anei čar Quảng Ngãi dôk rŭ mdơ̆ng 9 boh sang hră knŭk kna rông ba mlir gưl ti dŭm să knông lăn. Dŭm hdră bruă dưi ngă hrăm mbĭt, mâo klei bi hgŭm kjăp plah wah bruă sang čư̆ êa alŭ wăl leh anăn mnuih ƀuôn sang.

Ti să knông lăn Dục Nông, bruă ruah anôk rŭ mdơ̆ng sang hră dưi hlue ngă klă mngac, mâo klei hgŭm mơ̆ng mnuih ƀuôn sang. Wăl lăn ti alŭ Ngọc Hiệp hŏng ênhă hlăm brô 4,2 ha mâo ruah jing anôk mdơ̆ng sang hră. Trần Cao Bảo Việt,  Khua bruă sang čư̆ êa să  Dục Nông, čar Quảng Ngãi, brei thâo, alŭ ăl pral mkŏ mjing hdră msir mkŏ dăp, yua adŭ hriăm, sang hră:

 “ Hlăm hdră rŭ mdơ̆ng sang hră mlir gư snăk hmei mâo klei bi tŭ ư mơ̆ng mnuih ƀuôn sang, boh nik mnuih ƀuôn sang riêng gah alŭ Ngọc Hiệp, Dục Nhầy 3, snăn bruă pŏk ngă truh ară anei rơ̆ng djŏ hnơ̆ng”.

Ti anôk dôk rŭ mdơ̆ng Sang hră knŭk kna rông ba mlir gưl sa - gưl dua Dục Nông,dŭm  êtuh čô mnuih mă bruă hŏng lu kdrăp mnơ̆ng ngă bruă nanao. Thượng tá Vũ Thanh Khương, (Knơ̆ng bruă 319 Phŭn bruă lĭng kahan), Khua Anôk bruă gĭt gai hdră bruă bi mklă, anôk bruă rơ̆ng hnơ̆ng bi leh rŭ mdơ̆ng hlăm mlan 7 kơ anăp:

 “Bi mklă anei jing sa bruă klam kđi čar yuôm bhăn snăk, hmei kƀĭn leh jih hnơ̆ng mnuih mă bruă, kdrăp mnơ̆ng leh anăn čiăng rơ̆ng hnơ̆ng rŭ mdơ̆ng. Yap truh mmông anei, anôk bruă pŏk ngă leh 13/13 anôk bruă leh anăn hlăm anôk rŭ mdơ̆ng ară anei snăn giăm 200 čô mă bruă ăt msĕ mơh mâo 10 boh êdeh, kdrăp mnơ̆ng dôk pŏk ngă hrăm mbĭt mđĭ mmông mă bruă, mđĭ êpul čiăng hnêč êjai yan adiê găl jăk hĭn, mđĭ hnơ̆ng, rơ̆ng ba hdră bruă djŏ anôk kñăm”.

 Hlue si Anôk bruă kriê dlăng hdră bruă bi liê rŭ mdơ̆ng hdră bruă êlan klông, sơ wil leh anăn tuh tia mkra mjing čar Quảng Ngãi, dŭm hdră bruă rŭ mdơ̆ng sang hră mlir gưl ti Dục Nông, Sa Loong, Rờ Kơi leh anăn Mô Rai dôk dưi pŏk ngă hrăm mbĭt. Hlăm anăn, hdră bruă ti să Rờ Kơi mâo hlăm brô 43%, Dục Nông leh anăn Sa Loong mâo hlăm brô 40%, bi Mô Rai mâo hlăm brô 22%.

Mbĭt hŏng 4 hdră bruă dôk rŭ mdơ̆ng, 5 hdră bruă ti dŭm să Bờ Y, Ia Đal, Ia Tơi, Đăk Long  leh anăn Đăk Plô ăt dưi rŭ mdơ̆ng, dôk bi leh hră mơar čiăng pŏk ngă hrăm mbĭt. Y Ngọc, K’iăng Khua Knơ̆ng bruă sang čư̆ êa čar Quảng Ngãi mtă kơ dŭm dhar bruă, alŭ wăl mprăp klei găl čiăng mđĭ lar tŭ dưn dŭm sang hră knŭk kna rông ba mlir gưl leh bi leh:

 “Truh thŭn hriăm 2026 - 2027, mjưh ruĕ wưng 1, 4 sang hră ngă bruă snăn êpul knuă druh kriê dlăng, nai mtô brei rơ̆ng čiăng drei mkŏ mjing pŏk ngă mtô bi hriăm mơ̆ng mphŭn. Pô bi liê lŏ dơ̆ng pŏk ngă, mprăp êpul knuă druh kriê dlăng leh anăn nai mtô kơ wưng thŭn hriăm 2027 – 2028 leh 5 sang hră adôk mŭt ngă bruă. Kâo ăt akâo kơ Knơ̆ng bruă sang hră mtô bi hriăm čar Quảng Ngãi mđing uêñ pŏk ngă mơ̆ng ară anei mtam čiăng kơ drei rơ̆ng ngă djŏ bruă klam hlăm wưng kơ anăp”.

Dŭm boh sang hră knŭk kna rông ba mlir gưl dôk ƀrư̆ mkŏ mjing ti knông lăn čar Quảng Ngãi amâo djŏ knŏng jing hdră bruă mtô bi hriăm ôh, ƀiădah lŏ jing hdră bruă klei đăo knang. Mnuih ƀuôn sang krĭng knông lăn čar Quảng Ngãi dôk guôn hruê hdră bruă bi leh, čiăng kơ anak čô pô dưi hriăm hră hlăm anôk jăk hĭn./.