Ngai òr (07/05), tàm sơnah ƀòn Buôn Ma Thuột, càr Dăk Lăk, Mpồl mblàng yal Bơto bơtê bal mờ Hòi jà làng bol Dà lơgar pơgồp bal mờ Ƀộ Kwang àng, Ƀộ Jơi bơtiàn mờ Jăt yàng bal mờ Tỉñ ủy càr Dăk Lăk bơyai lơh pơrjum lơh jăt, lơh ală sră nggal bơh Mpồl đơng lam Đảng Dà lơgar dê bè broă jơi bơtiàn, jăt yàng tàm tơngai pa.

Pơrjum tơrgùm tơnguh uă jơnau git wă, kơnòl broă bơh kấp ủy, mpồl đảng dê tàm broă đơng lam, lơh jăt broă jơi bơtiàn, jăt yàng pơgồp bal mờ bơtàu tơnguh lơh sa mpồl bơtiàn, gàr niam dà lơgar, lơngăp lơngai mờ gàr kơl jăp cíñ trị. Đơs tàm dơ̆ sồr lơh, ồng Phạm Tất Thắng, Kwang geh jơng tàm Đảng Dà lơgar, Phó Kwang lam bồ Mpồl Duh broă Mblàng yal bơto bơtê mờ Hòi jà làng bol Dà lơgar đơs nền, broă jơi bơtiàn, jăt yàng là broă lơh kwơ màng, jŏ jòng, pơgồp bal tàm broă tơnguh mpồl tam klăc gùt jơi bơtiàn. Ală kấp, gah lơh broă gờñ lơh mùl màl jơh broă lơh mùl màl, tơnguh gơnoar bơh cau geh bơngă pin dờn, cau kơ đơng yàng, cau dong broă gah jăt yàng tàm broă lam làng bol.