Dahlau diah ong Nguyễn Thành Nhân raong pabui, pabaiy, pala baoh gara thanh long. Yaom pablei dom kaya ngui ini trun tagok oh karo yau nan ye ong ba hatai salih tapa jalan bahrau piah duah jien tame sang jeng ye oh pambak tame sa janih phun pala, anek athur raong meng kal dahlau. Labaih 8 thun dahlau, hadei di bac magru di ralo labik, ong pilih raong anek maja kayua mboh nyu hu yaom glaong, daok di ralo darak pasar takre blei nyu. Ong trun tinh Tra Vinh, Ca Mau blei 3 yau anek athur pajaih jeng ye jeng urang akaok meti di xa An Lục Long raong anek maja.

Kayua thau tari taring, kham marat bac magru, roh duah ralo labik ralo dhua blaoh maja di baoh sang ong manek maboh siam, hadei 8-10 raong nyu pablei hu. Tal ini anek maja di sang ong tagok jaik 150 drei pablei hu jeng ye daok hu maja piah raong.

Ong Nhân brei thau lac: “Dom thun dahlau, yaom maja biak glaong, raong oh ganap pablei, pablei 1 drei anek yaom 6 trieu dong, pabak 1 trieu tra blei hu anek lamo. Hadei di jit Covid-19, darak pasar blei nyu mboh takik, urak ini yaom daok meng 1,3-1,5 triệu đồng/kg anek maja pablei”.

Maja takre halui yau nan ye njauk caik hatai ngak var ka nyu lagaih. Ong ngak var laneing lanoi, hu mblang ka nyu nduac nao mai, lagaih brei pahacih. Lagaih hu bein di sang, ong Nhân pala patei ngak ndap mbang brei ka maja. Khak di anek maja brei ka ikan kan mbang, hadei di nan mek ikan kan brei ka maja mbang piah paralo ikan ka maja.

Kayua thau ngak yau nan ye ong oh abih ralo jien blei kaya mbang ka maja, khi hu haci hacih ka raong glang, mblang var laneing lanoi. Mada hu tuk ralo patei, maja mbang oh bih, ong pablei, jien duah hu yaok dom pluh trieu dong.

Ong Nhân khan lac: “Maja mbuan si raong, takik abih prein bih jien min njauk caik hatai iek glang brei ka tani tanat caga mada hu gein rein tatuak drei di nyu. Kayua phun jien akaok meti biak ralo siam di nyu blei takik yau maja mai raong blaoh pamanek nyu. Urang raong nyu njauk blei anek maja di labik hu angan siam piah caga hu khat lahik hadei di nan”

Bahrau blaoh, ong Nhân blei 5 drei njuah bingu di tinh Ha Tinh piah raong iek. Njuak bingu ini, ong oh kareik dalam ro var blaoh palao nyu di dalam bein, kayua hu yau nan, njuah bingu praong drah, brei tabiak take rasa blaoh. Langiu raong anek athur, ong daok brei papah radaih jirah gait peih eng piah paralo jien tame sang. Bruk ngak mbang di ong Nhân hu karja palei saong urang palei caik hatai. Thei khin bac magru piah ngak mbang, ong tuk halei jeng ba abih hatai pato kakei tacei jalan.

Meng sa urang “kakai bak gluh, tangin pan jaliang”, luac harei “pablei mbaok ka taneh, papah raong ka langik” ye urang ini, ong Nhân hu ralo tukvak laneing lanoi saong hu jien ralo kayua hu tahu ngak mbang jalan barau. Nan jeng ieu lac akaok “khin saneng khin ngak” saong glao akaok samar drah di ong./.