Kuhria tal kreh bilan 6/2025, phuong Phan Rang 3 hu labaih 250 baoh sang pala labaih 76 ha phun nya ndam. Dalam dom thun jaik ini, phun nya ndam hu dom gah ngak mbang pablei salih pataom blei mai ngak jeng rilo janih ndap nda hu tuai damuai dalam saong langiu negar takre. Abih di nyu nan lac ngan haong bruk “amuk mbuaic” di Kongti Co phan Pandap mbang Cánh Đồng Việt ngan haong ilamo ngak kong ngak tabiak pandap kaya bahrau, ndap nda nya ndam ngan haong yaom  kaom tani tanat, hu mikva urang ngak nong sahnang hatai buh jien tame peih praong taneh pala janih phun “phik kanduh bangi ralo” ini.

Mai rivang baoh sang sa-ai Lê Nguyễn Công Tuân – urang ngak nong sit thun umo naih gheih rairah 8X, hu 3 sao pala phun nya ndam srap gap kaoh paik. Sa-ai Tuân brei thau: ba hatai atme kuac bingun mek ia dalam taneh meng thun 2012. Hadei rilo mbang kuac bingun duah iek, sa-ai Tuân duah hu ia dalam taneh dalam labaih 7,5m. Sa-ai padang kadai njuk ia dalam nan hu nam nding pambuak pagam haong gauk, pandar mô tơ jamraik gom ndien cong suat 2 ma luc, ba ia tapa he thong ribaong ia tuh ka yaok ro pala nya ndam. Yaok kadai njuk ia khik kajap bruk pabak ia ginup ka 1 sao (1.000m²) hu pala meng 7.000 - 8.000 phun.

Sa-ai buh jien tame 60 trieu ndong piah blei khak war ro  , phun pajaih saong pah urang ngak taneh, pala nya ndam tui bruk hu 7.000 phun/sao. Hadei sa thun sakrok di bhum taneh cuah tapen tasik, nya ndam brei paik yaok bilan sa rai phun pala. Kuhria rah tapa yaok hala atah 60 - 80cm, trak 400 -800g, yaok phun brei pataom mek 2 hala/sa mbang. Pablei ka urang ikak kaiy mai blei tui yaom meng 1.300 - 1.500 dong/kg. Langiu brei kaoh jien buh tabiak, sa-ai hu jien laba labaih 15 trieu dong/bilan.

Daok baoh sang sa-ai Trần Châu Hào dahlau daih hu pala nyo bhong min hu rilo thun khut khat, sraiy jangaiy rilo. Meng akaok thun 2017, sa-ai salih tapa pala nya ndam saong hu raidiuk tani tanat jang. Jien mek tame meng pala phun nya ndam daong ka sang sa-ai raong anek bik mbang bac, saong hu bruk ngak tani tanat di Nha Trang. Sa-ai Hào brei thau: “Akaok thun 2023, hu tuk yaom nya ndam tagok tal 3.000 dong/kg, urak ini trun daok 2.000 dong/kg piah urang ngak nong sahnang hatai pala suai atah ka janih phun pala ini.”

Phuong Phan Rang 3 urrak ini hu 5.635 baoh sang. Meng di tuk brei patagok phun nya ndam, dom baoh sang kathaot hu trun khang, urak ini takik daok tok 43 baoh sang. Jien mek tame tani tanat meng pala phun nya ndam daong hu makna hu angan tame jalan patrun kathaot karo kajap di bhum palei.

Kapul Urang ngak nong phuong chreih chrai jak ba urang dalam kapul salih meng dom phun pala oh siam lagaih tapa pala phun nya ndam, gam saong di nan pambuak gah ngak mbang pablei salih mbaoh tangin pataom blei ndap nda haong yaom kaom tani tanat. Bhum palei jeng pambuak haong dom labik padang ngak salih tapa ky thuat saong pandar ilamo kong nghe glaong tame bruk ngak mbang piah pala hu rilo phun, praong siam, pabak hu hatai caong darak pasar ka pandap kaya nong hacih sa-at, siam karo.

Meng bruk ngak siam lagaih di bruk pala nya ndam di dom baoh sang dalam phuong, dom gah karja saong bhum palei brei roh duah peih praong di dom bhum hu kein lagaih pala drak, abih di nyu nan lac, di dom labik mikva urang bangsa takik di Khanh Hoa. Tapa di nan, brei bruk ngak karo kajap, daong salih phun pala, parilo jien mek tame, pasiam raidiuk saong patrun patakik urang baoh sang kathaot siam lagaih ka rahra.