Ƀơi Anom bruă ngă hră pơ-ar ha bah amăng phường Ea Kao, pơmut hrŏm mơng să Ea Kao hăng phường Ea Tam, tơring čar Dak Lak, amăng hơdôm hrơi ngă bruă lông lăng, mơnuih ƀôn sang nao ngă hră pơ-ar hơmâo arăng djru brơi tañ, klă hloh. Yă H’Đinh Bkrông (Aduôn Y Sam), mơnuih ƀôn sang ƀuôn Alê B lăi pơthâo hơdôm anŏ klă tơdơi kơ ngă hră pơ-ar brơi anih brơi arăng dŏ apah.

“Bruă ngă hră pơ-ar tơdơi kơ pơmut hrŏm, tui kâo ƀuh ƀing apăn bruă ƀơi anai ăt čơkă mơnuih ƀôn sang hăng pran jua hur har, djru brơi neh met wa abih pran jua amăng bruă ngă hră pơ-ar. Bruă ngă hră pơ-ar ăt tañ, kâo ƀuh hơmâo lu anŏ pơplih”.

Tơlơi sit nik pok pơhai ngă lông lăng ƀơi hơdôm boh tơring čar Dak Lak, Lâm Đồng, Gia Lai, anom bruă ngă hră pơ-ar hơmâo djru brơi mơnuih ƀôn sang klă hloh. Nao pel ĕp tơl anih, ơi Nguyễn Đình Trung, Khua git gai Ping gah tơring čar Dak Lak git gai.

“Ƀing gơmơi hơmâo ngă lông lăng hơdôm boh tơhnal kiăng pok pơhai tui tơlơi sit nik. Anai lĕ tơlơi yak nao kiăng lơ 1/7 ƀing gơmơi amra ngă sit mơtăm kiăng huăi sư̆ rơbư̆. Yua anun, ƀing khua mua rĭm anom bruă, ƀing gih kiăng gơgrong amăng bruă git gai wai lăng, kiăng truh hrơi jơnum lăng glăi, hơmâo djop tơlơi găn rơgao kiăng pơlăi nao rai”.

Ƀơi Gia Lai, bruă dưm dăp, ngă hơbot anih anom, pok pơhai hơbô̆ bruă gong gai ƀon lan 2 gưl, hơmâo ngă tui khut khăt. Ơi Hồ Văn Niên, Khua git gai Ping gah tơring čar Gia Lai lăi rơđah:

“Djop anih anom kơđi čar amăng tơring čar glăk đing nao pok pơhai hơbô̆ bruă gong gai dua gưl hơmâo pơphun ha amăng plĕ dong mơng lơ 1/7. Hrŏm hăng anun tơring čar glăk pơtrut kơtang lu tơlơi črâo trun prong anun lĕ kơtưn pơtrut pơplih mrô, mă yua boh thaoa phrâo, pơsir hĭ gun găn amăng pơhrui glăi lŏn mơnai, pơtrut tañ bruă jao prăk tuh pơ alin man pơdong hăng pok pơhai hơdôm akŏ bruă kjăp phik brơi rơwang bruă phrâo”.

Ƀơi Dak Nông, lơm bruă ngă lông lăng gong gai gưl să phrâo pơphun truh kih, mơnuih ƀôn sang đăo gơnang nao biă mă mơng bruă dưm dăp, pơmut anih anom mă bruă phun. Yă H’Thương, ƀơi să Nâm Nung brơi thâo:

“Pơmut hrŏm tơring čar Bình Thuận, Dak Nông hăng Lâm Đồng tui kâo lăng ăt lăp djơ̆ mơn. Tơlơi anai amra ngă pơđĭ kyar bơwih ƀong djop mơta, hơmâo glai rưng, hơmâo kual ia rơsĭ; anun lĕ Dak Nông hơmâo ñôm Bôxit; Lâm Đồng bơwih brơi tuai čuă ngui ƀơi Đà Lạt anih hmư̆ hing kiăng pơđĭ kyar. Bình Thuận pơđĭ kyar amăng kual ia rơsĭ, hơmâo tơlơi dưi kual ter hang ia rơsĭ hơmâo hơdang, areng, akan, mực…Yua anun, 3 boh tơring čar pơmut hrŏm ngă tơlơi bơwih ƀong huă-mơnuih mơnam jai hrơi pơđĭ kyar.

Ƀơi tơring čar Lâm Đồng phrâo, djop mơta bruă ngă lông lăng hơmâo krăo lăng kjăp. Ơi Y Thanh Hà Niê Kdăm, Khua git gai Ping gah tơring čar Lâm Đồng pơsit tong, hơdôm tơlơi gun găn, tơlơi sư̆ rơbư̆ hơmâo pơsir hĭ ječ ameč hlâo kơ abih bang 124 boh să, phường, kual yôm phara sit nik mă bruă.

“Pơgiong bruă dưm dăp mơnuih apăn bruă, mơnuih mă bruă, ƀing mơnuih ngă bruă ƀu djơ̆ sit nik glăk pơ anih mă bruă kiăng git gai anih anom mă bruă phrâo. Ping gah Jơnum min mơnuih ƀôn sang tơring čar, Khua Jơnum min mơnuih ƀôn sang tơring čar git gai pơgiong klă bruă mă prap lui anih mă bruă, măi mok, glông hrĕ internet, măi yua amăng bruă mă, anih anom mă bruă pơhlôm ngă tui bruă jao mơng tơring čar truh pơ să, phường, kual yôm phara dong mơng lơ 1/7/2025./.