Tal pơmut hrŏm anai, Phú Yên hơmâo 971 čô mơnuih apăn bruă nao mă bruă pơ Dak Lak, amăng anun hơmâo 876 čô khua mua hơdôm anih anom; 95 čô mơnuih apăn bruă mơng kơ-iăng khua anom bruă pơ glông, anai lĕ ƀing mơnuih arăng amra djru brơi anih dŏ tui tơlơi pơkă.

Tơdơi kơ mông lăi pơthâo akŏ pơjing tơring čar phrâo lơ 30/6, hơdôm anih anom amra sit nik pơphun ngă bruă. Mah hơmâo lu tơlơi tơnap tap kơ anih dŏ, tơlơi hơdip hăng bruă hrăm hră kơ ană bă, samơ̆ hăng pran gơgrong, ƀing apăn bruă blung a mơng Phú Yên nao pơ Dak Lak lêng pơdah pran jua mut hrŏm tañ hloh, gum tơngan hrŏm yua kơ bruă pơđĭ kyar hơđong kjăp amăng tơring čar phrâo amăng rơwang pok pơphun phrâo.

Ha rơtuh čô mơnuih apăn bruă, mơnuih mă bruă čar tơring čar Gia Lai nao pơ̆ kual phun mă bruă čar phrâo ƀơi plơi prong Quy Nhơn, tơring čar Bình Định hơđăp, pơphun bruă mă, pơplih phrâo bruă čar rơwang pơđĭ kyar phrâo mơ̆ng tơring čar Gia Lai. Mơ̆ng krah blan 6, Grŭp apăn bruă Ping gah tơring čar Gia Lai hăng Bình Định hmâo hră pơ-ar tŭ ư hrŏm; amăng tal 1, ngă gal brơi pioh năng ai ñu 50% amăng mrô 1.800 čô mơnuih apăn bruă, mơnuih mă bruă čar mơ̆ng hơdôm bôh gơnong bruă, anom bruă mă bruă čar phrâo. Mrô mơnuih apăn bruă dô̆ glăi mă bruă ƀơi anom mă bruă mrô ƀơi plơi prong Plei Ku pioh pơhlôm bruă mă hluh gah mơ̆ng jơlan mă bruă čar ƀơi tơring čar Gia Lai hơđăp truh abih thun 2025. Tơdơi kơ 2025, hơdôm gơnong bruă amra gơgrong hlâo ba tơbiă kơčăo bruă pơplih mơnuih mă bruă lăp djơ̆, tui hluai kơ bôh nik hmâo hăng tơlơi kiăng kơ anih anom gơnam mă yua ƀơi Quy Nhơn.

Abih bang mơnuih amăng khul apăn bruă Ping gah tơring čar Kon Tum tal XVI, hơmâo ƀuh ƀô̆ mơta ƀơi tơring čar Quảng Ngãi kiăng kơ mơguah lơ 30/6 ngă lơphet pơphun ngă bruă. Hăng 40 boh să, phường phrâo amăng tơring čar Kon Tum hơđăp ataih mơng anom mă bruă phun ƀơi tơring čar phrâo Quảng Ngãi giăm 200 km, khua mua 2 boh tơring čar Kon Tum hăng Quảng Ngãi hơmâo tŭ ư akŏ pơjing 10 anih pơlăng nao rai ƀơi 10 boh tơring glông, plơi prong amăng tơring čar Kon Tum hơđăp kiăng ƀing apăn bruă 40 să, phường phrâo mut hrŏm jơnum yôm phăn lăng nao rai mơng ataih.