Mơng akŏ thun truh ră anai, Dak Lak hơmâo 9 čô mơnuih ƀă klin Covid-19, ƀơi 5 boh tơring glông hăng plơi prong Buôn Ma Thuột. Abih bang mơnuih ƀă klin lêng ruă rơnang. Samơ̆ hăng lu tơlơi pơhing kơ bruă hơđuh glăi klin Covid-19 ƀơi sa, dua boh ƀon lan, gơnong bruă ia jrao tơring čar Dak Lak hơmâo gơgrong git gai hơdôm anom bruă kơtưn krăo lăng kjăp klin kheng.

Ơi Lê Phúc, Kơ-iăng Khua anom bruă pơgang klin kman (CDC) Dak Lak brơi thâo, anom bruă hơmâo gum hrŏm hăng anom bruă pơgang klin kual Dap kơdư kiăng sem lăng tơlơi sit nik hăng pok pơhai hơdôm hơdră pơgang lăp djơ̆. Hrŏm hăng anun, anom bruă ăt pơphun pơtop hrăm hrưn đĭ boh thâo brơi ƀing nai ia jrao kơ bruă krăo lăng, tañ ĕp ƀuh mơnuih ƀă klin Covid-19, pel ĕp hăng pơgang hĭ hơdôm anih hơmâo klin tui tơlơi pơkă.

“Ƀing gơmơi hơmâo hră pơ-ar črâo ba kơ bruă mă kah hăng pơphô bruă brơi gơnong bruă kiăng git gai hơdôm anom bruă pơgang klin, sang ia jrao, sit biă ñu ƀơi sang ia jrao kiăng kơtưn bruă tŭ mă hăng prap lui bruă pơjrao tơdah klin Covid-19 hơđuh đĭ. Sa, dua anom bruă pơjrao ăt hơmâo pok hơdôm anih pơčlah, kơtưn amăng wai lăng, pơgang klin amăng sang ia jrao. Hơdôm anom bruă pơgang klin hơmâo kơtưn kiăo tui lăng ƀing ƀă klin, pơgang hĭ hơdôm anih hơmâo klin”.

Pơhlôm hlâo hăng tơlơi sit nik mơng klin Covid-19, gơnong bruă ia jrao tơring čar Kon Tum gum hrŏm hăng hơdôm anom bruă bơdjơ̆ nao kơtưn amăng hơdôm bruă pơtô pơblang, pơtrut pơsur mơnuih ƀôn sang ngă klă hơdôm hơdră pơgang klin Covid-19. Pel ĕp, pơhlôm tui tlôn, gơnam măi mok, ia jrao, nai ia jrao lăp djơ̆ hăng tơlơi rơkâo pơgang klin. Hrŏm hăng anun, gơnong bruă ia jrao tơring čar Kon Tum ăt gơgrong krăo lăng kjăp tơlơi sit nik mơng klin kman, kơtưn pok pơhai hơdôm hơdră pơgang klin ƀơi sang ia jrao, amăng mơnuih mơnam hăng ƀơi bah amăng jang jar kmar Bờ Y. Gum hrŏm kjăp hăng anom bruă pơgang klin kual Dap kơdư sem lăng tơlơi sit nik hăng lăng glăi anŏ amra ƀuh, pok pơhai hơdôm hơdră pơgang klin lăp djơ̆. Ơi ia jrao Đỗ Ngọc Hòa, Kơ-iăng Khua gơnong bruă ia jrao tơring čar Kon Tum brơi thâo:

“Ƀing gơmơi ăt rơkâo djop gơnong bruă, sang bruă, anom bruă amăng tơring čar, Jơnum min mơnuih ƀôn sang hơdôm boh tơring glông, plơi prong kơtưn amăng bruă pơgang klin Covid-19 ƀơi hơdôm anih tuai čuă ngui, anih ngui ngor. Laih dong kơtưn amăng bruă pơhŭi hlâo mơnuih ƀôn sang ngă tui hơdôm hơdră pơgang klin. Lơm ƀuh duam, pơtuk, tơnap suă jua kiăng nao pơ sang ia jrao giăm hloh khăm, kiăo tui lăng hăng pơjrao hmao tlôn”.

Hăng bruă tlâo vaccine Covid-19, tui kơ-iăng Khua gơnong bruă ia jrao tơring čar Kon Tum, ră anai bruă tlâ̆o vaccine amăng abih bang mơnuih amăng tơring čar giăm 83%. Ơi ia jrao Đỗ Ngọc Hòa pơhŭi hlâo, tơdah mơnuih ƀôn sang kiăng tlâ̆o vaccine Covid-19, ăt dưi nao tơl hơdôm anom bruă ia jrao giăm hloh čih anăn. Mơng anun, gơnong bruă ia jrao amra pơƀut glăi, rơkâo anom bruă pơgang klin kual Dap kơdư jao vaccine kiăng tlâ̆o brơi mơnuih ƀôn sang. Mơng akŏ thun 2025 truh ră anai, amăng tơring čar Kon Tum aka ƀu hơmâo mơnuih ƀă klin Covid-19.

Gơnong bruă ia jrao tơring čar Lâm Đồng hơmâo git gai hơdôm anom bruă khăm, pơjrao amăng ƀon lan kơtưn amăng bruă khăm, tañ ĕp ƀuh, pơjrao brơi mơnuih ƀă klin Covid-19. Pel ĕp hăng ngă tui akŏ bruă tŭ mă, pơjrao brơi mơnuih ƀă klin Covid-19 ƀơi anom bruă tui tơlơi đăo lăng hlâo kơ klin kheng, anăm brơi ƀuh bruă ngă sư̆ rơbư̆, ƀu hmao thâo. Prap lui gơnam măi mok, anih pơčlah, gơnam gah ia jrao kiăng pơphun tŭ mă, pơčlah, đăo lăng hlâo, pơjrao brơi ƀing mơnuih ƀă klin, pơhlôm rơnuk rơnua brơi mơnuih ƀă klin, anai lĕ ƀing mơnuih amuñ ruă kraih (anun lĕ đah kơmơi pi kian, mơnuih ƀă tơlơi ruă pơkŏn, mơnuih ruă kraih, ƀing tha rơma…), anih pơsuaih brơi, pơjrao bơdjơ̆ nao hơtai boh, yua boh ƀleh pơkra mă, anih breh pơjrao...Ngă tui khut khăt hơdôm hơdră pơgang klin, pơhlôm brơi kơ bruă pơgang kman ƀong, sit biă ñu lĕ kman ƀă hyu tui jơlan suă jua, anăm brơi ngă lar hyu klin amăng sang ia jrao. Kơtưn amăng bruă pơgang gah rơngiao, pơgang amăng lăm, pơjrao brơi, prap lui anih pơjrao brơi klă hloh, lăp djơ̆ hăng tơlơi sit nik hăng pơhlôm jum dar mơtah, agaih rơnăk.

Gơnong bruă ia jrao tơring čar Lâm Đồng git gai anom bruă pơgang klin kman tơring čar ngă phun kơtưn amăng pel ĕp, krăo lăng bruă ngă tui hơdôm hơdră pơgang klin ƀơi hơdôm anom bruă ia jrao amăng tơring čar. Pel ĕp, ngă kiăo tui akŏ bruă, prap lui hlâo, djop mơnuih mă bruă, pơhlôm gơnam măi mok, ia jrao pơhlôm brơi bruă pơgang klin, kiăng gơgrong lăp djơ̆ hăng tơlơi sit nik amăng pơgang klin, anăm pơtah hơtai amăng tơlơi pơmĭn hăng bruă mă, pok pơhai klă ngă tui bruă jao./.