Sang ia jrao pơjrao tơlơi ruă čơđai muai mrô I ƀôn prong Hồ Chí Minh phrâo djru pơjrao hơdip kơ sa čô čơđai đah kơmơi 12 thun (dô̆ ƀơi tơring čar Trà Vinh) kơ-añăk pơ-iă drơi jăn kơ-añăk kriah hmâo tôm ƀlĕ drah ƀơi kian pruăi, ƀuh băn ƀu thâo khô̆t. Ơi ia jrao Phạm Văn Quang – Khua Anom hơkrŭ glăi pran jua klă, Sang ia jrao pơjrao tơlơi ruă čơđai muai mrô I brơi thâo, anai lĕ mơnuih duam pơđung drah kơ-añăk yua ƀlĕ drah lu amăng kian pruăi kraih, phara hăng lu mơnuih kơ-añăk yua kơ tơlơi ruă hơtai, bôh ƀleh. Tơdah ba nao pơ̆ sang ia jrao kaih thơ, amra ba truh kơ djai mơtăm:

“Duam pơđung drah ngă prung amăng drah yua nun čơđai anai ƀuh băn ƀu thâo khô̆t. Dua lĕ yua kơ čơđai ƀlĕ drah amăng kian pruăi anun ƀing gơmơi pơphun pơčrang lăng ječ. Tơlơi duam pơđung drah ƀơi lu anih anun kâo kơnong kơ thâo ngă brơi drah rô hơđong ƀơi hơdôm anih drah ƀlĕ lu, bơ̆ ƀơi hơdôm anih pơkon ăt dô̆ ƀlĕ drah mơn, gir rum jur drah mut pioh djru huăi ƀlĕ drah. Tơdơi kơ anun ƀing gơmơi pơkă lăng hăng Sang ia jrao kơsem min drah hăng jur drah pioh pơphun tlâ̆o jrao rơnuk phrâo djru huăi ƀlĕ drah”.

Sang ia jrao pơjrao tơlơi ruă čơđai muai ƀôn prong ăt phrâo hmao pơjrao brơi hmao tlôn sa čô čơđai đah kơmơi 5 blan kơañăk duam pơđung drah kraih, prung amăng drah kơtang. Hlâo kơ anun, čơđai duam pơ-iă drơi kơtang 3 hrơi, hmâo pơkă lăng tui tơkai tơngan ƀơi sang ia jrao mơnuih ƀôn sang. Truh hrơi tal 4, khă plai ƀiă pơ-iă drơi jăn, čơđai pit wor hlăk hluai, brŏp ƀô̆ mơta, tơnok tơdu, ƀlĕ pơtah hmâo ia mriah khŭ, ƀlĕ drah ƀu thâo kŏng. Kơnang kơ pơjrao klă hăng jrao jur pơdơi kơañăk, hơdôm mơta drah hăng bruă djru suă jua, tơdơi kơ 3 hrơi, čơđai dưi rơgao tơlơi huĭ rơhyưt.

Ơi ia jrao Nguyễn Minh Tiến, Kơ-iăng Khua Sang ia jrao pơjrao tơlơi ruă čơđai muai ƀôn prong brơi thâo, čơđai anai lĕ tơlơi brơi ƀuh kiăng đing nao kơ tơlơi duam pơđung drah ƀơi čơđai muai:

“Ƀing gơmơi khom kơđiăng na nao, ơi ia jrao pơtă pơtăn na nao yua kơ mơnuih ruă hmâo hơdôm gru nam bơhmutu ñu kah hăng ruă hlung, ƀu mơ-ak amăng drơi jăn, ƀlĕ drah adung, tơgơi, tơkai tơngan rơ-ŏt, prung amăng akô̆ glô, čơđai đih ha bit ƀu hor ngui ngor, ƀlĕ pơtah hmâo tom drah, nao juăt glai jŭ. Đing nao hơdôm gru nam anai lĕ khom ba čơđai nao pơ̆ sang ia jrao mơtăm, yap wot mơnuih prong hmâo tơlơi ruă anai hai”.

Ƀơi Sang ia jrao pơjrao tơlơi ruă čơđai muai mrô 2, mrô mơnuih duam pơđung drah ba nao pơ̆ sang ia jrao đĭ lu 2 wot bơhmu hăng rơwang hrơi tơjuh hlâo. Amai Nguyễn Thị Lan, glăk bơwih brơi kơ ană anet ƀơi Sang ia jrao prong pơjrao tơlơi ruă čơđai muai 2 brơi thâo, wot 3 čô ană ñu leng kơ hmâo tơlơi ruă duam pơđung drah:

“Sang kâo ăt hmâo mơn sa bôh bling ia mơ̆ bơyan hơjan, čơđai dô̆ pơ̆ sang lu ƀu hmâo hyu pơ̆ hơpă. Ană phun kâo ƀu pơmin nao ôh duam pơđung drah. Truh hrơi tal 2 pơčrăng lăng lĕ hmâo duam pơđung drah. Hơdôm čô ană tơdơi ăt ƀuh tui anun mơn anun đing đăo duam pơđung drah".

Tui hăng hơdôm bôh anom lăng tui tơlơi ruă tưp mơ̆ng ƀôn prong Hồ Chí Minh, mơ̆ng akô̆ thun truh ră anai, mrô mơnuih duam pơđung drah Dengue đĭ tui giăm truh 3 wot bơhmu hăng thun 2024 (đĭ giăm truh 4.000 čô mơnuih). Hơdôm bôh sang ia jrao hmâo čih pioh giăm truh 300 čô mơnuih ruă kraih (amăng anun rơbêh kơ ha mơkrah lĕ mơ̆ng hơdôm bôh tơring čar, ƀôn prong pơkon ba nao pơjrao ječ). Ră anai ƀôn prong akă čih pioh hlơi djai yua kơ duam pơđung drah ôh.

Gơnong bruă ia jrao ƀôn prong Hồ Chí Minh pơtă hlâo, hơdôm hrơi blan hmâo lu duam pơđung drah pơphun đĭ lu amăng krah blan 6 hăng pơkă hlâo amra sui truh abih blan 10 rim thun. Kiăng gơgrong hlâo bŏng glăi klin ruă, hơdư̆ ƀiă djai, hơdôm khul, grŭp hăng abih bang mơnuih ƀôn sang ngă tui hơdôm bruă pơgang, pơgăn hlôm hlâo tơlơi duam pơđung drah Dengue.

Gơnong bruă ia jrao iâo pơthưr mơnuih ƀôn sang gơgrong hlâo ngă tui hơdôm bruă pơgang pơgăn tơlơi ruă na nao. Rơđah biă ñu, khom gôm sir hơdôm gơnam dưm ia yua, pơhrui pơƀut hăng djuai gơnam glom lui hmâo ia dŏng amra hmâo keč čeh bôh amăng anun, blŏ bơnga, pông rơdêh sô hơđăp...

Ngă tui agaih rơnăk anih anom dô̆ jum dar sang, gôm sir klep anih ia dŏng, đih pit kă mung, mă yua get jrao xit, phong pơgang keč. Lơm ƀuh pơ-iă drơi jăn, khom nao mơtăm pơ̆ sang ia jrao pioh hơduah ĕp lăng hăng pơjrao ñu, ƀu rŏng pơjrao mă ƀơi sang./.