Khul kơdră tang măt Kuô̆k hô̆i dêh char Gia Lai pơgơ̆r hop akom tơƀơ̆p pơma dơnuh hăm bơngai tăh hla đơ̆ng rŏng ‘măng Hop akŏm mă blŭng, Kuô̆k hô̆i jăl XVI kiơ̆ trong pơgơ̆r kơtă atŭm hăm trư̆k tuyên truh hăm rim tơring, phương. Tơ̆ pơgơ̆r, bơngai tăh hla 2 hơnih pôk rơih pơma tơbăt lơ tơdrong đei ƀơm truh trong nơnăm, tơdrong jang tơgŭm djru kon pơlei, sơđơ̆ng tơpôl, pơm hla bơar, proh hơmet khul kang ƀô̆, tơgŭm djru hăm kang ƀô̆ bơ̆ jang găh Đảng năm jang tơ̆ tơring mưh khul kơdră tơring vă jê̆ đei pơjao ăn lơ tơdrong gơh tơchơ̆t. Bơngai tăh hla akhan, tơdrong pơm hla bơar ăn kon pơlei tơ̆ mĭnh ƀar tơring oei bơ̆ jang hiơ hiơ̆, ưh kơ gan tơnăp; kơ yuơ lơ loh, khul kơdră tơring kăl tơplih ‘nao trong chĕp pơgơ̆r, pơm hơtŏk hơnăp jang pơvih pơvăn ăn  Kon pơlei, veh ver pơm ăn kon pơlei năm pơm hla bơar vih vơ̆t lơ ‘măng nhen dang ei.

Iung pơma tơ̆ Hop akom, Kơ iĕng Kơdră chĕp pơgơ̆r Kuô̆k hô̆i Nguyễn Hồng Diên tơgoăt iŏk rim nơ̆r tơgop tơpăt, trŏ lăp yan ou đơ̆ng bơngai tăh hla păng tơbăt Khul kơdră tang măt Kuô̆k hô̆i dêh char Gia Lai gô chih akom tôm tong vă pơtruh ăn hơnih bơ̆ jang kơpal lăng hơlen, xek tơlang ăn.“Hlŏh đơ̆ng chih akom nơ̆r tơgop, nhôn hơlen kiơ̆ rim tơdrong pơjing đei ƀar tơdrong tơm ‘noh: găh mŭk drăm-tơmơ̆t jên jang păng khul bơ̆ jang-trong tơgŭm djru. Mĭnh poăt dôm nơ̆r tơgop ou găh dêh char păng tơring gơh xek tơlang ăn. Hơpơi ăn rim kơdră chĕp pơgơ̆r tơring, phương kăl akŏm kơtang vă xek tơlang ăn, kơ yuơ tơdrong gơh jang dang ei kơ khul kơdră tơring, phương jĭ tôch tih tên. Mă kăl, Khul kơdră chĕp pơgơ̆r Teh đak tŏk bŏk pơjao ăn tơring. Kơna, tơdrong bơ̆ jang, tơdrong jang păng gơh jang đơ̆ng khul kơdră tơring lơ̆m khei năr kơnh gô đei hơtŏk kơtang hloh dơ̆ng. Tơring, phương jĭ hơnih iung jang hloi tơƀơ̆p păng bơ̆ jang hăm kon pơlei, kơna kăl hơdrin hloh dơ̆ng, tơnăp hloh dơ̆ng vă xek tơlang keh đang dôm tơdrong đei ƀơm truh tơdrong hơrih sa kơ kon pơlei”.

Tơ̆ tơring Phúc Thọ Lâm Hà, ƀok Lâm Văn Đoan - Kơ iĕng Kơdră Hơnih bơ̆ jang vei lăng Oei sa joh ayŏ păng Tơpôl kơ Kuô̆k hô̆i, găh Khul kơdră tang măt Kuô̆k hô̆i dêh char Lâm Đồng, hlôi tơƀơ̆p pơma dơnuh hăm bơngai tăh hla đơ̆ng rŏng ‘măng hop akŏm mă Blŭng, Kuô̆k hô̆i jăl XVI. Lơ̆m tơdrong pơgơ̆r pơma dơnuh dih băl tơpăt ‘lơ̆ng, bơngai tăh hla hlôi pơma tơbăt jơhngơ̆m đon tôch lăp đon hăm pơtôch ‘măng hop akŏm, adoi pơma tơroi tơbăt lơ tơdrong tơnap tap, tơhlăk tơhlĭn tơ̆ tơring.

Lơ nơ̆r tơgop găh mĭnh ƀar tơdrong vă jang, tơlĕch jang hiơ hiơ̆ lơ̆m mă bơ̆ jang iŏk tơvih teh đei iung jang tĕnh koăng, pơm ăn kon pơlei pơngơ̆t kơtang. Bơngai tăh hla jei tơroi tơbăt tơdrong pơm hla bơar oei tim gan ‘lơ̆ng, pơm ăn kon pơlei năm pơm hla bơar yak năm lơ ‘măng; adoi athei lăng ba kơjăp tơdrong tơmơ̆t jên jang, ming hơmet pơ ‘lơ̆ng trong nơnăm pơlei pơla, pơjing rơvơn ăn kon pơlei chă yơ yak, chơ pơdŭ tơmam drăm păng đei sơng iŏk tơdrong rơvơn ‘lơ̆ng hơ iă găh tơdrong ming hơmet jĭ jăn, hŏk pơhrăm tơ̆ tơring hơtăih yăih.

Iung pơma tơ̆ Hop akom, ƀok Lâm Văn Đoan hôn bơnê kơtang tơnăp jang ‘lơ̆ng, dôm nơ̆r tơgop đơ̆ng bơngai tăh hla; sơkơ̆t hơdăh Khul kơdră tang măt Kuô̆k hô̆i dêh char gô tơgoăt iŏk tôm tong vă pơtruh ăn Kuô̆k hô̆i, Khul kơdră chĕp pơgơ̆r Teh đak păng rim hơnih tơm, hơnih bơ̆ jang. Adoi athei rim hơnih bơ̆ jang dêh char, tơring atŏk kơtang iung jang hơdoi ‘lơ̆ng, akom xek tơlang keh đang dôm tơdrong găh hơnih gơ̆h tơchơ̆t, veh ver pơdui đunh khei ‘năr pơm kơnê̆ truh tơdrong đei iok yoa sa hơpăh kơ kon pơlei.

Tơ̆ Dak Lăk, ƀok Ngô Trung Thành - Kơ iĕng Kơdră Hơnih bơ̆ jang Khôi luơ̆t păng Tư pháp kơ Kuô̆k hô̆i atŭm hăm Khul kơdră tang măt Kuô̆k hô̆i dêh char Dak Lăk hlôi tơƀơ̆p pơma dơnuh hăm bơngai tăh hla tơ̆ rim tơring Krông Bông, Cư̆ Pui păng Hòa Sơn. Bơngai tăh hla apĭnh athei Teh đak lăng ba kơjăp trong nơnăm, pơnơ̆t đak, hơnih ƀôm đak, hơboong thoong đak chŭn na tơ̆ mĭnh ƀar tơring ngăl răm ‘mi kial đak hơbông pơrăm; ming hơmet pơ ‘lơ̆ng rim trong nơnăm tơ̆ tơring, pơlei pơla, atŏk kơtang ming man trong nơnăm, gơng, hơlŏng đak tŏk bŏk ming hơmet đunh khei ‘năr ưh kơ jăh keh đang. ‘Ngoăih kơ ‘noh, bơngai tăh hla hơpơi ‘meh vă đei trong tơgŭm djru krao tơmơ̆t ƀok thây kô pơtho ăn tơring hơtăih yăih; hrôih pơjing đei tơdrong tơchơ̆t kơchư̆k, tơgŭm djru kon jên khei ăn kang ƀô̆ pơlei pơla; hrôih klăh asong kon jên tơmơ̆t jang đơ̆ng teh đak păng kon jên jang rim tơdrong jang tơm teh đak vă iung jang jơnei rim trong tơlĕch jang tŏk mŭk drăm ƀar kơsô̆; hơnơ̆ng lăng ba kơjăp bơ̆ jang pơtăm ‘long tơ̆ groi teh phui phang tơnang kŏ, vei lăng năng tông bri păng hơmet pơ ‘lơ̆ng rơ̆m rek tơring kon pơlei choh jang sa.