Bilan pandiak mai, nan jeng lac vaktu masa blaoh hadiuk pasang ong Chế Quốc Minh saong amuk Qua Thị Hồng Loan palih ruah piah pato dom janih kadha janih ilamo siam gheih di bangsa drei brei ka anek taco dalam but pajaih saong dalam palei.

 Meng akaok bilan 6 tal ini, melam yaoak melam di dom harei puac adit, dalam baoh sang sit sot di hadiup pasang ong Minh, amuk Loan bak katial dom sap ndom panuac klao meluk pablak saong sap daoh yao di uranaih. Pak nan, urang dak dalikan, pato daoh kadha daoh bhap bani Cam oh thei karei nan lac amuk Qua Thị Hồng Loan, urang daok khik ramik ilamo Cham dalam baoh sang, dalam talei but pajaih di drei.

Dom kadha dalikan ndom mayai ceriata brei ka amaik Po Ina Nagar, dom damneiy pambuak pagam saong rai diuk bhian harei, makna di dom adat cambat tanarakun meng kan atau bruk ndom puac daok dang di urang dalam sang, but pajaih... hu amuk cih vak gilac jeng tapuk piah pato tacei.

Amuk Loan khan brei thau, meyah drei ngak sa janih roh duah blaoh oh hu khan gilac, oh dang pato ye harei hadei rai rah ranaih meda van drei lac urang Cam, van abih dom panuac pandap panuac pandip, dom dalikan cerita yao klak.

Dom kadha daoh Ariya, dom sap daoh di uranaih lai la-ar gam haong sap pah tangin pachreih di dom urang prong hu ngak jeng sa bản hòa âm ilamo gam mộc mạc gam sahanak ginreih.

Gam amuk Loan saong dom urang praong thun dalam but pajaih, ini oh lac sa dakdalikan blaoh bo daok lac jalan ngak piah khik ramik ilamo. Daok ngan haong dom uranaih sit, nan lac melam tuổi thơ pambuak pagam haong sap ndom panuac puac di amaik menek, ngan haong asal ilamo, ngan haong dom kadha meda ngak ka dom adei hu hatai jia jang tuk thau cambaih inem krung ilamo bangsa.

Di kreh rai diuk bahrau daok laik luak tame yaok canah jalan, hadiuk pasang umo labaih 70 min jeng daok tari tareng, pambuak pagam haong yaok ragam ginang, yaok kadha daoh, ine akhar di ong akaok ong kei ba drei. Hadiuk pasang ong Cek hadah tanjak, kham merat khik ka bahu asal ilamo Cam dalam rai diuk bhian harei...

Tui hadiuk pasang ong Minh amuk Loan, khik ramik ilamo oh njauk lac panuac ndom saoh blaoh nyu daok njauk mek tangin tame ngak yaok harei, yaok van, oh padeih padei. Yaok ine akhar Cam hu vak tagok, yaok kadha daoh pandip pandao, yaok ragam Gi-năng pato tacei gilac nan jeng lac sa dang talei kak pagam tukvak nao tapa saong dom hagait daok hu mboh di anak meta.

Ong Trượng Văn Xô, daok di Ninh Thuan sa mbang vaih rivang baoh sang ong Minh amuk Loan di palei Cawait Lạc Trị, xa Phú Lạc, huyen Tuy Phong, tinh Binh Thuan drut droi khan lac:

“Talei but pajaih Qua hu peih sa van dak dalikan ka dom anek taco uranaih saong dom urang dalam but pajaih di drei, dahlak mboh biak drut droi. Saong dahlak caong khin bruk ngak yau ini meda hu pambak prong tabiak tal dom kapul nyaom atau dom talei but pajaih karei. Bruk ngak yau nan meda jhul patagok kadha hadah mbaok hadah meta dalam bhap bani jeng yau ngak jeng pren khang piah ka dom rai rah harei hadei nao roh duah, pataom mek saong khik ramik dom dalikan yao klak atau dom kadha daoh bhap bani di bangsa drei.”

Bruk ngak suai lavik di ong Chế Quốc Minh saong amuk Qua Thị Hồng Loan oh lac bruk kham merat di ta-eng blaoh nyu daok ngak brei pambak prong tabiak dalam bhap bani Cam. Dak harei dak hu rilo ayut ranaih duah mai tal bac taong Gineng, tal bac akhar Cam; rilo urang kamei bac gilac kadha daoh Cam piah peih ngak ma-in dalam dom harei raya rija di puk palei.

Meda mboh lac manuacsia mbuan van nao halau gha di drei, min ong Minh saong amuk Loan, mai meng rom bruk ngak sit nan hu brei mboh ka bruk khik ramik ilamo oh lac kadha prong prang bo mai meng bruk tari tareng, that triak saong bak hatai ranam. Bruk ngak nan hu mikva dalam palei Cam ini taduan raok saong iek prong.

Tui diuk pasang amuk Hồng Loan saong ong Quốc Minhdi palei Cawait Lạc Trị, xa Phú Lạc, huyen Tuy Phong, tinh Binh Thuan tal pato tacei ilamo Cam  oh lac hu sa janih tacei pato ka rai rah ranaih patui khik saong cak rok patagok meng rilo jalan ngak, blaoh nyu dapk daok pambak prong, pamedeih hatai ranam ilamo halau gha olamu muk kei di drei./.