Dom caong takre hu peih tabiak tuk Can Tho, Hau Giang saong Soc Trang hu pagam jeng 1 jabat karja bahrau mek angan Ban raya Can Tho. Hadei di pagam, ban raya Can Tho praong labaih 6.300km2, rahra hu labaih 4 trieu urang. Ban raya Can Tho bahrau oh sa janih lac hu kraong, jalan raya peih nduac samar, mblang kapal ahaok par, blaoh nyu daok hu tasik, gam saong oh suai lavik daok hu jalan radaih apui.

Ong Ngô Văn Chơn, sa urang bhap bini rahra brei thau, ban raya Can Tho bahrau hu ngak jeng biak praong, brei mboh cambaih laih sa pasak kinh te pakat asal dalam bhum, dui pachreih urang buh jien tame ka jalan ngak, ngak jeng dom chuoi yaom kaom ngak nong – ngak kong – jitvu hu jalan kuhria tani tanat, jhul tagok salih bahrau hadah krah:

Khol dahlak hulin brei mboh prein khang, sa bruk salih biak praong di karja, meng majam karja saong bruk salih drei di taneh ia. Nan lac sa bruk daong prein piah ka taong abih dom gah ngak mbang pablei salih, dom po ngak mbang, urang ngak bruk hu daong prein piah kham merat siam sampurna jang, tuk pagam blaoh ye dom bruk harak gar hu ngak tani tanat saong hu siam jang dahlau di pagam. 

Dalam tukvak blaoh tapa, Mbang kapul bhian ngak bruk di Pakat Ndang pan akaok 3 Ban uy, Tinh uy Can Tho, Hau Giang saong Soc Trang hu ba ngak dom bruk cakrok patagok kinh te thun 2025 ngan haong jalan ngak patagok hu meng 8% ba tagok. Ong Đồng Văn Thanh, Bi thu Tinh uy Hau Giang hu ndom mayai cambaih laih, dom pakat, gah di bhum palei hu ngak saong daok peih ngak catang, samar drah piah daong ba tame ngak jalan ngak bruk padang bhum palei ban Can Tho hadei pagam hu patagok samar drah, karo kajap, taong abih; gam haong taong abih dalam negar karo kajap yam tame jaman bahrau – jaman pok drei patagok di bangsa:

Tinh uy Hau Giang hu brei thau pahacih saong padang dom danak dak, jalan ngak, dalam nan hu ngak njauk tui Sarak 57 tinh Hau Giang ba tabiak sa Sarak karei di tinh, hu padang tabiak dom gah pato tacei, dom kapul daong bruk saong peih ngak padang. Dalam nan jao bruk ka njauk urang, njauk bruk, njauk bruk di drei, njauk tukvak saong njauk bruk hit.

Daok ban raya Can Tho urak ini yaom ieu lac jeng sa baoh pasak dalam bhum praong, min tukvak patagok, bruk dui ba, pambak praong dalam bruk pambuak patagok bhum jeng oh ka samu dil saong kein lagaih hu dahlau. Kayua yau nan ye Bi thu ban uy Can Tho ong Đỗ Thanh Bình ndom mayai lac tuk vak anak tal, bruk di ban raya Can Tho hadei di tuk pagam blaoh, brei hu kham merat biak rilo, kham merat biak praong glaong piah pabak hatai caong dalam tukvak uak drei pok tagok di dalam negar:

Patagok siam lagaih, sarak, adat bahrau ba tabiak, patagok rilo abih kein lagaih, bruk pasak di bhum, bruk sarak karei, kein lagaih meraik gauk piah jhul cakrok patagok kinh te, xa hoi. Ngak catang bruk ngak mbang pablei salih, blei pandar, pablei tabiak langiu negar, jirah rivang, kham merat mek hu tanut cakrok thun 2025 meng 8%  ba tagok saong kham merat thun hadei dua lek taka dom thun patui veik. Paglaong hatai ngak njauk tui adat, hukum dalam bruk bayar phun jien karja thun 2025 hu taong abih 100% tui jalan ngak di Rajaei.

Bruk dak ramik, cih jalan patagok kinh te – xa hoi di ban raya Can Tho bahrau oh lac sa janih pagam dom kein lagaih hu dahlau di 3 bhum palei, blaoh daok brei kein lagaih dom chuoi yaom kaom bahrau. Ndang saong rahra caong takre sa ban Can Tho bahrau lac gah cakrok patagok siam lagaih di pasak bhum sit Taneran kraong Cuu Long, ngak bruk pambuak pablei salih saong pambak praong tabiak dalam bhum praong./.