Dom thaik thaot ka palei jirah ChaPi daok di xa Phước Bình, huyen Bác Ái, atau dom raya adat bhap bini di urang bangsa Cam atau Raglai, bruk ngak gaok glah lan am, menyim jih dalah palei Caklaing, bimong kalan Cam atau dom ndap nda chiat jien di tinh Ninh Thuan tuk hu ba tagok riyak papar sap, papar binguk hu daong khik ramik dom thaik thaot video clip hu yaom glaong, yaih khan rilo tal bol bhap rahra.

Tapa harak, bilan pandiak ini, baoh sang sa-ai kamei Trần Thị Ngọc Dung daok di ban ine Ha Noi hu pilih ruah Ninh Thuan piah mai jirah me-in saong palei ngak lan am gaok glah Hamu Craok ieu lac sa palei akaok meti sang sa-ai mai tal. Sa-ai Dung ndom meyai lac, kayua khau tin angaok harak brei ka sa-ai thau hu bruk ngak lan am gaok glah meng kal di urang bangsa Cam hu UNESCO brei angan drap ar ilamo oh mboh di meta brei hu paacang khik samar chip. Sa-ai Trần Thị Ngọc Dung brei thau:

Tapa harak gal, tui papar binguk ye adei jeng hu thau bruk ngak lan am gaok glah di palei Hamu Craok ini hu meng kal mai paje. Dalam mbang jirah me-in ini, adei ba anek mai di ini jirah rivang bruk ngak lan am ka dom anek thau. Adei mboh rahra di ini khik ramik palei ngak gaok glah lan am biak gheih. Biak nao lac pak di ini hu urang taha pato ka anek taco meng bruk mek gluh, mbeik jeng thaik thaot, ngak jeng ndap nda yau habar, paying kadun vil taom dan biak karei, bruk ini di gah Barak negar oh hu.

Tui kuhria di So Ilamo, Padhih saong Jirah riavang, Ninh Thuan hu 239 drap ar ilamo. Dalam nan, hu 2 inem mek pakat negar hu makna ieu lac bimong Hòa Lai saong Bimong Po Klaong Girai; 18 inem mek pakat negar, 57 inem mek pakat tinh. Dom kadha vak, video clip saong thaik thaot siam gheih angaok harak hu daong paglaong jalan sahaneng ka yaom kaom di dom drap ar ini. Tapa nan, harak oh lac daong khik ramik ilamo bo daok daong jhul tagok jirah rivang saong patagok kinh te di bhum palei. Ong Lê Xuân Lợi, Yam ndok Pasak Roh duah Ilamo saong Gilang khik drap ar Ninh Thuan ndom meyai lac:

Gam saong bruk hu rilo ilamo di tinh Ninh Thuan ye harak jeng daong rilo meng bruk yaih khan, pathau khan ka drap ar ilamo tapa di nan brei yaih khan ka bhum taneh Ninh Thuan, ka drap ar ilamo Ninh Thuan. Meng di nan, hu dom labik caik hatai sangka saong thau rilo ka bhum taneh, manuac urang Ninh Thuan tapa harak. Tapa di nan, daong khik ramik saong patagok ilamo dom bangsa.

Tui ong NGUYỄN VĂN LINH, Phaok Yam ndok So Ilamo, Padhih saong Jirah rivang tinh Ninh Thuan, piah paglaong siam lagaih bruk pathau khan, dom khau tin, kadha, video clip, phim sajarah ka kadha ilamo, manuac urang di Ninh Thuan oh lac tok ba tagok riyak, ba tagok riyak papar sap, papar binguk bhum palei bo daok pambuak saong Rayo papar binguk Viet Nam; dom rayo papar sap saong papar binguk bhum Kreh negar, Tay Nguyen, tapa nan, dom yaom kaom ilamo meng kal karei siam gheih di mikva dom bangsa di Ninh Thuan hu pambak praong.

Meng hu bruk pathau khan, dom kadha vak, dom khau tin ba tagok dom blah harak gal bhum palei saong dom blah harak mbao pakat nagar nan urang pang maong, urang roh duah thau tal Ninh Thuan saong thau tal drap ar ini saong mai tal Ninh Thuan dak harei dak rilo jang. Ini lac sa bruk bui sambai ka bruk khik ramik saong pasang iek dom drap ar ilamo di bhum palei. Ini jeng lac bruk daong patagok KTXH bhum palei dak harei dak siam jang, daong ka gah Ilamo, Padhih saong Jirah rivang pasang iek drap ar dak harei dak tani tanat jang.

Gam saong jalan labaih 100 thun padang saong patagok di harak mbao katmang Viet Nam, harak mbao Ninh Thuan oh lac tuk halei jeng salah blaoh bruk ngak talei pambuak di ndang haong Rahra. Tapa harak gal bhum palei, dom bruk gheih di ilamo meng kal di bol bhap dom bangsa Ninh Thuan hu pambak dil samu, siam gheih, tapa nan, daong gam khik ramik drap ar gam jhul tagok cakrok patagok jirah rivang, bruk ngak mbang di bhum palei./.