Langik mada pandiak atau hajan, sa-ai kamei angan Ma Rương, Akaok HTX Hanjo kain Đạ M’rông, xa Đạ M’rông, huyen Đam Rông, tinh Lam Dong tuk halei jeng hu mbaok dil samu tuk dom baoh sang raong anek kain dalam xa meng daong pato. Meng bruk hu dom baoh sang raong kain takik, sit dalam kapul pambuak bruk, tal ini, HTX patagok hu 9 urang saong yaok pluh urang ngak nong dalam bhum palei hu mbaok tame.

Sa-ai kamei Ma Rương brei thau, phun hanjo di Đạ M’Rông patagok siam, yaom baoh kain ye tuk halei jeng karo tani tanat di tanut glaong meng 180.000 - 200.000 dong/kg nan urang pala hanjo piah raong kain hu patruh kathaot saong maong ini lac bruk ba mai bruk ngak suai atah saron mbon karo piah patagok bruk ngak mbang di dalam sang.

“Bruk pala hanjo raong kain urak ini jeng lac biak mbuan, yau pandar hu urang ngak bruk di bhum palei, uranaih saong urang taha jeng ngak hu. Adei sa-ai kamei dalam kapul ye ndom meyai haong gauk ka ilamo ky thuat, bruk sangka, jalan raong blaoh daong gauk. HTX ye pabak jitvu ka bruk ngak nong, pato kakei ka bruk pala hanjo raong kain, daong gauk jalan pala saong iek glang nyu. Kuhria rah tapa yaok thun jeng peih tabiak sa tal bac pasram piah pato bruk ka dom baoh sang bahrau tame ngak bruk ini”.

Tui ong Kră Jăn Ha Siêng, Phaok akaok UB Bhap bini xa Đạ M’Rông, pala hanjo raong kain jeng sa bruk patruh eik patrun kathaot di ini. Urak ini dalam xa patagok hu 118ha taneh pala phun hanjo ngan haong yaok rituh baoh sang rahra tame raong kain. Bruk ini hu xa cih jalan piah patui veik peih praong patagok dalam tukvak anak tal.

“Pala hanjo raong kain hu ba mai siam lagaih glaong, dom baoh sang srap gap hu ka raidiuk yaok harei, blei hu dom jamraik piah duh ka bruk ngak mbang. Dom baoh sang jeng khang hatai bac megru sua tangi haong gauk, meng baoh sang ini ndom meyai haong baoh sang karei. Dalam tukvak anak tal khol dahlak hulin patui veik pathau khan, jak ba dom baoh sang hu ngak bruk ini piah pato pakai, tacei ba ka dom baoh sang oh ka thau tani tanat bruk ngak piah ba gauk patagok bruk ngak mbang dalam sang, daong ka bhum palei cakrok patagok kinh te – xa hoi”.

Gam haong dom janih phun pala, athur raong karei, pala hanjo raong kain hu huyen Đam Rông ba tame sarak patagok kinh te – xa hoi, pachreih rahra salih dom taneh pala phun oh ba mai kein lagaih tapa pala hanjo raong kain. Ong Liêng Hót Ha Hai, Phaok Akaok UB Bhap bini huyen Đam Rông brei thau, jalan ngak di huyen lac peih praong taneh pala hanjo raong kain piah daong rahra patrun kathaot karo kajap. Kham merat tal thun 2030, taneh pala hanjo patagok labaih 1.350ha, hala hanjo mek hu 27 tan/ha saong anek kein hu labaih 2.200 tan/thun. Hu takik abih labaih 2.500 baoh sang bhian raong kain, dalam nan hu labaih 1.000 baoh sang lac urang bangsa takik. Ong Liêng Hót Ha Hai, ndom meyai lac:

“Raidiuk di mikva hu rilo salih bahrau, salih meng bruk mbang, bruk daok, ngak mbang duah jien. Dahlau daih mikva nao pala drak pambak tame langik langik, jalan sahaneng ta-eng ngak ta-eng pabak, urak ini mikva ngak mbang jeng thau patak pataom, thau pandar ilamo KHKT, thau pala phun raong anek hu yaom kaom jien padai glaong”.

Meng bhum taneh lac “kathaot” di dalam negar, huyen Đam Rông di tinh Lam Dong harei ini daok dak harei dak salih mbaok meta. Je lac, ngan haong Gam saong bruk ngak mbang njauk lagaih, bruk ngak hadah krah saong bruk daong di karja palei, jalan patrun kathaot, ngak meda njauk ka urang bangsa takik di Đam Rông brei daok patui veik peih praomng jang dalam dom thun anak tal./.