Hnuz 18 thiêz 19/5 zuôr txos no, tỉnh Sơn La zuôr krêz côngz uô ntâu dưv anr công nghiệp thiêz tênhv tênhz zov chênhr, muôz qơư chuôz jos cxơưz cxiz huôv tsar kinh tế hur, tênhv tênhz hur hâur thax tsav. Hnuz 18/5 zuôr krêz côngz uô dưv anr tsêr meir tsiv uô Công ty Bắc Phương têx xiv huv zak zưr, muôx zuôr xar 4 xưv phaz, iz shông tsiv uô 758 cxênhz xiv huv, xav hur si pênhr yưv uô tas 317 tyv đeiv. Krêz uô dưv anr tênhv yar ntux sâuv pak đêx tênhv Sơn La muôx 800MW ntơưv xã Chiềng lao. Lok hnuz 19/5, tỉnh Sơn La cux zuôr krêz uô dưv anr tsêr meir tênhv chuô Risen Phù Yên muôx 80MW ntơưv thax tsav đơưv trôngz Diệt, xã Phù Yên./.

                                                                                            Thanh Thủy-Riê Lâux cxeik, nhênhv

Ntơưv phêv ziv cxơưz cxiz yưv pênhr tỉnh Điện Biên shông 2026, tập đoàn FPT tưz côngz fur chêx cuk njuôs siv ứng dụng za tsi muôx lênhx nênhs tsar UAV hâur uô kôngz nuv, krêz tơưv ntâu siêz njênhs njôngr trâu huôv tsar kinh têr nhoz tox siêz. Hâux lưv zôngv UAV zuôr paz txu grês six hơưv tsuôk yuôx por vêv đrox tsuôk hâur muôx nhos 4 six hơưv grês yuôr 10 phênhz iz hecta. Hâux lưv tsêz chos, zuôv qir cux muôx chêx cuk đuô, txix 0,5-1 hecta iz lênhx nênhs iz hnuz ndê txos 40-64 hecta iz hnuz, txơưv zos nhoz thax tsav tox siêz ar nxaz...Đrâuv co,  nhiêx txiêx thâux xiv huv kôngz nuv tâu njuôs pov txu grês muôx nhos 40%. Chêx cuk no tâu uô siv sâuv 51 cxênhz hecta tsoz chos tsênhv nhoz Điện Biên li blêx, cà phê, mắc ca thiêz yuôx zêx Shan tuyết, trâur nuv no paz txu grês 15-20% nhiêx txiêx yưv tsêz chos, cxênhx txuôk muôx nhos 62 tsov iz yiv ndis iz shông thiêz txu grês muôx nhos 30% nhiêx côngz. Tsôngv px li phênhv sâu njuôs xav chuôz ndê 9-18 tsov đeiv iz hecta iz shông, gôngr muôx nhos 2 cênhz 630 tỷ đeiv trâu tỉnh li phênhv sâu./.

                                                                                                          Vũ Lợi-Txâur Vax cxêik nhênhv

Yuôr 2, 3 ciêz xưz, tưz txos jiês tưr thik cơưv tiêr ntơưr lớp 12 shông 2026. No zos ntu yênhx cxênhz lênhx shux xênhz hâur thax tsav tỉnh Lào Cai cux li ntâu thax tsav qơư faz Tây Bắc tsênhv sir jos cơưv cxaz nzir iz cxiê txux chi yuôr trâus chiê bax tưr thik tâu jông. Txix lớp cơưv, qar cơưv cxaz nzir txux chi chiê bax tưr thik txos trâu têx paz cơưv nzir sâuv mạng xã hội....., iz chas ntơư, ngênhx zoz zux thiêz chor lưv lươngv muôx vax huôv cux tsênhv zênhx max bax cxuô luôs hâux lưv chiê tưr thik truôx tuk, ntov jông, yênhx côngz. Cưk kriê Bùi Thị Thúy, Phưv Thơưx seiz car tsêr cơưv cxênhx 3 Nguyễn Huệ, phường Yên Bái, tỉnh Lào Cai heik pâuz:“Tsêr cơưv tưz thiêz tsênhv sir jos kriê nzir iz cxiê txux chi yuôr trâus trâu shux xênhz chiê bax tưr thik tâu jông. Tsêr cơưv cux tưz kriê trâu chor nhuôs shux xênhz têx txux chi, tsưr ziv lok six tsênhv tsênhz, tưz chiê shux xênhz buôk ti, shâuv uô siv lok six ntâu têx jax thik  trơưk li Bộ zoz zux tso tơưv”./.

                                                                                                      Thừa Xuân-Riê Lâux cxeik, nhênhv

Li tưz tso mông uô ntêx co, tar su hnuz 12/5, niêv lâuk L.T.T xênhz shông 1991 thiêz T.T.H xênhz shông 2003 nhoz jos Huổi Pàn, xã Bó Sinh muk suô muôz njêk sâuv tul đêx Mã. Taz sik, viv đêx pur siêz, ntưs lox đhâu ntâu hnuz ntux lok nas lox tưz uô 2 lênhx pox niêv no trâus đêx cuôr yôngz thiêz tuôs. Ciês thâuv jênhv tâu xor mông, lênhs tov xã Bó Sinh tưz huiz tôngv lưx lươngv muôx txơưx jênhv đros tsôngv px tsưr tsix nriêr. Txos thâuv 12 six đros hnuz, lưx lươngv muôx txơưx jênhv tưz nriêr tâu niêv lâuk L.T.T thiêz tror tsưr tsix nriêr lênhx nênhs tsênhv yuôr. Đhâu ntâu six hơưv sir jos nriêr, txos 8 six 30 phênhz tas cik hnuz 13/5, lưx lươngv muôx txơưx jênhv tưz nriêr tâu lênhx pox niêv tsênhv yuôr ntơưv thax tsav jos Mé Bon, xã Sông Mã thiêz choz trâu chuôz zis chiê uô đaz uô kruô. Têx hnuz jê ntơưv no, ntâu tiv phaz hâur tỉnh Sơn La muôx ntux nas lox, viv li tsôngv px tsi cxoz muk đa đêx, suô muôz njês, tiv zix zos thâuv đêx pur siêz, ntưs lox chiê phax tar trâus txiêz nanv pôngz đês muôx yưv./.

                                                                                                    Trấn Long-Txâur Vax cxêik nhênhv